ସୀମାରେ ପୁଣି ମାଓ ଗତିବିଧି : ଜଙ୍ଗଲରୁ ମାଓ କ୍ୟାମ୍ପ ଠାବ

କନକ ବ୍ୟୁରୋ : ଓଡ଼ିଶା-ଛତିଶଗଡ଼ ସୀମାନ୍ତରେ ପୁଣି ମାଓ ଗତିବିଧି ଦେଖାଦେଇଛି । ନୂଆପଡା ଜିଲ୍ଲା ବୋଡ଼େନ ଥାନା କାଠଫାର-ଛତାପାଣି ଜଙ୍ଗଲରୁ ଏକ ମାଓ କ୍ୟାମ୍ପ ଠାବ ହୋଇଛି । କୌଣସି ଏକ ବଡ଼ ଯୋଜନାକୁ ପଣ୍ଡ କରିଛନ୍ତି ଯବାନ । ମାଓକ୍ୟାମ୍ପରୁ ବନ୍ଧୁକ ସହ ବିପୁଳ ପରିମାଣର ବିସ୍ଫୋରକ ଜବତ କରାଯାଇଛି । ଓଡ଼ିଶା-ଛତିଶଗଡ ସୀମାନ୍ତରେ ମାଓବାଦୀମାନେ ସକ୍ରିୟ ହେଉଥିବା ଗୁଇନ୍ଦା ସୂତ୍ରରୁ ଖବର ମିଳିଥିଲା । ପରେ ନୂଆପଡ଼ା ଡିଭିଏଫ ଟିମ ଓ ସିଆରପିଏଫ-୧୯ ଅପରେସନ ଆରମ୍ଭ କରିଥିଲା । ମାଓବାଦୀମାନେ ଖବର ପାଇ ସେଠାରୁ ଛତ୍ରଭଙ୍ଗ ଦେଇଥିଲେ । ପରେ ଯବାନମାନେ ଏକ ମାଓ କ୍ୟାମ୍ପ ଠାବ କରିଥିଲେ । 

ସେଠାରୁ ଗୋଟିଏ ଦେଶୀ ବନ୍ଧୁକ, ୨୪ଟି ଗୁଳି, ୧୦ଟି ଜିଲୋଟିନ୍‌ ଷ୍ଟିକ, ଡିଟୋନେଟର ୩ଟି, ବାରୁଦ ୫୦ ଗ୍ରାମ ସମେତ ବହୁ ମାଓ ସାମଗ୍ରୀ କରିଥିଲେ । ଚଳିତ ମାସ ୮ତାରିଖ ସିନାପାଲି ଥାନା ଝାରବନ୍ଧ ଗାଁ ନିକଟ ନାରାୟଣ ଡୁଙ୍ଗୁରୀ ସଂରକ୍ଷିତ ଜଙ୍ଗଲରୁ ଏକ ମାଓକ୍ୟାମ୍ପ ଠାବ ହୋଇଥିଲା । ଜିଲ୍ଲାରେ ମାଓବାଦୀମାନେ କ୍ରମାଗତ ଭାବେ ସେମାନଙ୍କ ଉପସ୍ଥିତ ଜାହିର କରୁଥିବାରୁ ଜିଲ୍ଲା ପୁଲିସ ପାଇଁ ଚିନ୍ତାର କାରଣ ପାଲଟିଛି । ସ୍ଥାନୀୟ ଲୋକଙ୍କ ସୁରକ୍ଷାକୁ ଦୃଷ୍ଟିରେ ରଖ୍ ସମ୍ପୃକ୍ତ ଜଙ୍ଗଲରେ ଯବାନଙ୍କ କମ୍ବିଂ ଅପରେସନ ଚାଲିଥିବା ଏସପି ଜିଆର ରାଘବେନ୍ଦ୍ର ସୂଚନା ଦେଇଛନ୍ତି ।