ମନମୋହନ ସିଂହଙ୍କ ସ୍ମାରକ ସ୍ଥଳକୁ ନେଇ ବିବାଦର ଅନ୍ତ । କେନ୍ଦ୍ରର ନେଲା ବଡ଼ ନିଷ୍ପତ୍ତି

କନକ ବ୍ୟୁରୋ : ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂହଙ୍କ ସ୍ଥାୟୀ ସ୍ମାରକସ୍ଥଳ ନିର୍ମାଣ ବିବାଦ ଭିତରେ କେନ୍ଦ୍ର ସରକାର ବଡ଼ ଘୋଷଣା କରିଛନ୍ତି । ମନମୋହନ ସିଂହଙ୍କ ସ୍ମାରକସ୍ଥଳୀ ନିର୍ମାଣ ପାଇଁ ଆଗାମୀ ୩ରୁ ୪ ଦିନ ମଧ୍ୟରେ ସ୍ଥାନ ନିର୍ଦ୍ଧାରଣ ହେବା ନେଇ ସୂଚନା ମିଳିଛି । ମନମୋହନ ସିଂଙ୍କ ପରିବାରକୁ ସ୍ମାରକ ସମ୍ବନ୍ଧରେ ସୂଚନା ଦିଆଯାଇଛି । ଶୁକ୍ରବାର ବିଳମ୍ବିତ ରାତିରେ ଗୃହ ମନ୍ତ୍ରାଳୟ ପକ୍ଷରୁ ପୂର୍ବତନ ପ୍ରଧାନମନ୍ତ୍ରୀଙ୍କ ସ୍ମାରକୀ ସମ୍ପର୍କିତ ମାମଲାରେ ଏକ ବିଜ୍ଞପ୍ତି ଜାରି କରାଯାଇଚି । ଏଥିରେ କୁହାଯାଇଛି ଯେ ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂହଙ୍କ ସ୍ମାରକୀ ସ୍ଥାନ ସମ୍ପର୍କରେ କେନ୍ଦ୍ର ସରକାର, କଂଗ୍ରେସ ସଭାପତି ମଲ୍ଲିକାର୍ଜୁନ ଖଡ଼ଗେଙ୍କୁ ଅବଗତ କରାଇଥିଲେ । 

ବିବୃତିରେ କୁହାଯାଇଛି ଯେ, କ୍ୟାବିନେଟ୍ ବୈଠକର କିଛି ସମୟ ପରେ ଗୃହମନ୍ତ୍ରୀ ଅମିତ ଶାହ ସ୍ମାରକୀ ପାଇଁ ସରକାର ଜମି ଆବଣ୍ଟନ କରିବେ ବୋଲି କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାଡ଼ଗେ ଓ ଡକ୍ଟର ମନମୋହନ ସିଂହଙ୍କ ପରିବାରକୁ ଜଣାଇଛନ୍ତି । ଏହା ପୂର୍ବରୁ କଂଗ୍ରେସ ଅଧ୍ୟକ୍ଷ ଖଡଗେ ପ୍ରଧାନମନ୍ତ୍ରୀଙ୍କୁ ଚିଠି ଲେଖି ମନମୋହନ ସିଂହଙ୍କ ସ୍ମୃତିରେ ସ୍ବତନ୍ତ୍ର ସ୍ଥାନ ଚିହ୍ନଟ କରାଯାଇ ସେଠାରେ ସ୍ମାରକସ୍ଥଳୀ ନିର୍ମାଣ କରିବାକୁ ଅନୁରୋଧ କରିଥିଲେ । ଏକ ସାଧାରଣ ପୃଷ୍ଠଭୂମିରୁ ଆସି ବିଭାଜନର ଯନ୍ତ୍ରଣା ଅନୁଭବ କରୁଥିବା ମନମୋହନ ସିଂହ ଏବଂ ତାଙ୍କର ଦୃଢ଼ ସଂକଳ୍ପ ଯୋଗୁଁ ବିଶ୍ୱର ଜଣେ ଆଗଧାଡ଼ିର ରାଜନେତା ହୋଇପାରିଥିଲେ । ତେଣୁ ତାଙ୍କ ରାଜନୈତିକ ମର୍ୟ୍ୟାଦା ଅନୁସାରେ ତାଙ୍କ ସ୍ମାରକୀ ନିର୍ମାଣ କରାଯାଇପାରୁଥିବା ସ୍ଥାନରେ ଅନ୍ତିମ ସଂସ୍କାର କରାଯାଉ ବୋଲି ଚିଠିରେ ଉଲ୍ଲେଖ କରିଥିଲେ ଖଡଗେ ।