ଅପରେସନ ସିନ୍ଦୂର ଚର୍ଚ୍ଚା ପାଇଁ ଡାକରା ନମିଳିବାରୁ ମନୀଷ ତିୱାରୀଙ୍କ ଅଭିମାନ, ଗତକାଲି ବି ଚର୍ଚ୍ଚାରୁ ଦୂରେଇ ରହିଥିଲେ ଶଶୀ ଥରୁର୍

କନକ ବ୍ୟୁରୋ : ଚଣ୍ଡୀଗଡ଼ର ସାଂସଦ ମନୀଷ ତିୱାରୀ ନିଜର କ୍ଷୋଭ ଗୋଟିଏ ଲୋକପ୍ରିୟ ଗୀତ ମାଧ୍ୟମରେ ପ୍ରକାଶ କରିଛନ୍ତି । ନିଜ ସୋସିଆଲ ମିଡିଆ ପୋଷ୍ଟ ଏକ୍ସରେ ଲେଖିଥିବା ଗୀତର ଅର୍ଥ ହେଉଛି ସେ ଜଣେ ଭାରତୀୟ । ଭାରତର ପାଣିପବନର ଗୀତ ଗାଆନ୍ତି ଓ ଭାରତର କଥା କୁହନ୍ତି । ଯାହା ଦଳର ହାଇକମାଣ୍ଡଙ୍କ ଉଦ୍ଦେଶ୍ୟରେ ଲେଖାଯାଇଛି ବୋଲି ଚର୍ଚ୍ଚା ହେଉଛି

ଗତକାଲିଠୁ ଅପରେସନ୍‌ ସିନ୍ଦୂର ଉପରେ ଲୋକସଭାରେ ସ୍ବତନ୍ତ୍ର ଆଲୋଚନା ଆରମ୍ଭ ହୋଇଛି । ଏଥିରେ ଭାଗନେବା ପାଇଁ କଂଗ୍ରେସ ପକ୍ଷରୁ ପ୍ରଥମେ ସାଂସଦ ଶଶୀ ଥରୁରଙ୍କୁ ନିମନ୍ତ୍ରଣ କରାଯାଇଥିଲା ।  ମାତ୍ର ଅପରେସନ ସିନ୍ଦୂର ଅସଫଳ ବୋଲି କଂଗ୍ରେସ ଅଫିସିଆଲ ଲାଇନ ମାନିବାକୁ ପ୍ରସ୍ତୁତ ନଥିବା ଦଳୀୟ ସାଂସଦ ଶଶୀ ଥରୁର ଏଥିରୁ ଭାଗ ନେବାକୁ ମନା କରିଥିଲେ । ଅନ୍ୟପକ୍ଷରେ ଏଥିରେ ଭାଗ ନେବାକୁ ଦଳୀୟ ସାଂସଦ ମନୀଷ ତିୱାରୀ ଆଗ୍ରହୀ ଥିଲେ । ମାତ୍ର ଅପରେସନ ସିନ୍ଦୂର ପରେ ବିଦେଶ ଯାଇଥିବା ସର୍ବଦଳୀୟ ପ୍ରତିନିଧିମଣ୍ଡଳୀରେ ଭାଗ ନେଇଥିବା କାରଣରୁ ସାଂସଦ ମନୀଷ ତିୱାରୀଙ୍କୁ ବିତର୍କରେ ଭାଗ ନେବାକୁ କଂଗ୍ରେସ ଅନୁମତି ଦେଇ ନାହାଁନ୍ତି । ଆଲୋଚନା ଭାଗ ନେଇ ସାଂସଦ ମନୀଷ ସରକାରଙ୍କୁ ପ୍ରଶଂସା କରିପାରନ୍ତି ବୋଲି କଂଗ୍ରେସ ଆଶଙ୍କା କରୁଛି ।

କଂଗ୍ରେସର ଆଭ୍ୟନ୍ତରୀଣ ଗଣତନ୍ତ୍ର ପୁନଃପ୍ରତିଷ୍ଠା ପାଇଁ ଜି-୨୩ରେ ସାମିଲ ଥାଇ ଉପରୋକ୍ତ ଦୁଇ ସାଂସଦ ଶଶୀ ଓ ମନୀଷ ତତକାଳୀନ କଂଗ୍ରେସ ଅଧ୍ୟକ୍ଷକଙ୍କୁ ଚିଠି ଲେଖିଥିଲେ। ସେହିଭଳି କଂଗ୍ରେସର ସାଂସଦ ମନୀଷ ତିୱାରୀ ଦଳର ବିରୋଧ ସତ୍ତ୍ବେ ଅଗ୍ନିବୀର ସ୍କିମକୁ ସମର୍ଥନ କରି ମଧ୍ୟ ଚର୍ଚ୍ଚାରେ ଥିଲେ । କଂଗ୍ରେସର ବିନା ସୁପାରିସ ସତ୍ତ୍ବେ ଅପରେସନ ସିନ୍ଦୂର ପାଇଁ ସର୍ବଦଳୀୟ ପ୍ରତିନିଧିମଣ୍ଡଳୀରେ ଉପରୋକ୍ତ ଦୁଇ ସାଂସଦ ସମେତ ଅନ୍ୟତମ ସଦସ୍ୟ ଅମର ସିଂ ମଧ୍ୟ ସାମିଲ ହୋଇଥିଲେ ।  ଉଭୟ ଶଶି ଓ ମନୀଷ ଭଲ ବକ୍ତା ହେବା ସହ ତଥ୍ୟ ସହ ଆଲୋଚନାରେ ଭାଗ ନିଅନ୍ତି, ମାତ୍ର ଆଲୋଚନାର ଭାଗନେବାରୁ ବଞ୍ଚିତ କରି ହାଇକମାଣ୍ଡଙ୍କ ସହ ଏମାନଙ୍କ ଦୂରତା ଆହୁରି ବଢ଼ିବାକୁ ସୁଯୋଗ ଦିଆଗଲା