ଦେହରେ ୬୩୬ ସହିଦଙ୍କ ନାଁର ଟାଟୁ

କନକ ବ୍ୟୁରୋ : ଅଗଷ୍ଟ ୧୫ ତାରିଖ ଆସିଲେ ଭାରତ ନିଜର ସ୍ୱାଧୀନତାକୁ ଉତ୍ସାହର ସହିତ ପାଳନ କରେ । କିଏ କେମିତି ପ୍ରକାରେ ସ୍ବାଧୀନତା ଦିବସକୁ ପାଳନ କରିଥା’ନ୍ତି । ଯେତେବେଳେ ଲାଲକିଲ୍ଲାରେ ତ୍ରିରଙ୍ଗା ଫରଫର ଉଡ଼େ ସେତେବେଳେ ପ୍ରତ୍ୟେକ ଭାରତୀୟଙ୍କ ଛାତି ଗର୍ବରେ ଫୁଲିଯାଏ । ଆଉ ସେହି ସମୟରେ ମନେ ପଡ଼ନ୍ତି ଭାରତ ମା’ପାଇଁ ଜୀବନ ଦେଇଥିବା ବୀର ସହିଦ । ଯେଉଁମାନେ ନିଜର ବୀରତ୍ୱ ଏବଂ ପରାକ୍ରମ ଦ୍ୱାରା ଭାରତକୁ ସ୍ୱାଧୀନତାର ସ୍ବାଦ ଚଖାଇବାରେ ଗୁରୁତ୍ୱପୂର୍ଣ୍ଣ ଭୂମିକା ନିଭାଇଥିଲେ ।

Advertisment

ଅନେକ ଯୁବକ ସ୍ବାଧୀନତା ସଂଗ୍ରାମୀ ଏବଂ ବୀର ସହିଦଙ୍କୁ ନିଆରା ଉପାୟରେ ଶ୍ରଦ୍ଧାଞ୍ଜଳୀ ଦେଇଥା’ନ୍ତି । ଆଉ ଏହି ତାଲିକାର ଯଦି ପୃଷ୍ଠା ଲେଉଟାଇବା ତା’ହେଲେ ଦେଶଭକ୍ତ ଅଭିଷେକ ଗୌତମଙ୍କ ନାଁ ଆଗ ଆସିବ । ଉତ୍ତରପ୍ରଦେଶର ହାପୁଡ଼ ଜିଲ୍ଲାର ଅଭିଷେକଙ୍କୁ ଦେଶଭକ୍ତିର ଏପରି ନିଶା ଘାରିଛି ଯେ ସେ ପ୍ରତିଦିନ ବୀର ସହିଦଙ୍କୁ ସ୍ମରଣ କରିବା ପାଇଁ ନିଜ ଦେହରେ ୬୩୬ ସହିଦଙ୍କ ନାଁର ଟାଟୁ କରିଛନ୍ତି । ଖାଲି ସହିଦଙ୍କ ନୁହେଁ ଦେଶକୁ ସ୍ବାଧୀନ କରିଥିବା ସ୍ବାଧୀନତା ସଂଗ୍ରାମୀଙ୍କ ଚିତ୍ର , ୱାର୍ ମେମୋରିଆଲ୍ ଚିତ୍ର ସବୁର ଚିତ୍ର ପିଠିରେ ଟାଟୁ କରାଇଛନ୍ତି ଅଭିଷେକ । ତାଙ୍କର ଏହି ଦେଶଭକ୍ତି ଯୋଗୁ ଇଣ୍ଡିଆ ବୁକ୍ ଅଫ୍ ରେକର୍ଡସରେ ତାଙ୍କ ନାଁ ଲିପିବଦ୍ଧ ହୋଇଛି । ଏମିତିକି ତାଙ୍କୁ ‘ଲିଭିଙ୍ଗ ୱାଲ ମେମୋରିଆଲ’ର ପରିଚୟ ମଧ୍ୟ ମିଳିଛି ।

ହାପୁଡ଼ର ବାସିନ୍ଦା ଅଭିଷେକ କହିଛନ୍ତି ଯେ ସେ ଲେହ ଲଦାଖ ରାଇଡରେ ଯାଇଥିଲେ । ଯେଉଁଠାରୁ ତାଙ୍କ ମନରେ ଦେଶଭକ୍ତିର ଭାବନା ଜାଗ୍ରତ ହୋଇଥିଲା ଏବଂ ସେ କାରଗିଲରେ ସହିଦ ହୋଇଥିବା ଯବାନଙ୍କ ବୀର ଗାଥା ବିଷୟରେ ପଢ଼ିଥିଲେ । ଏହିଠାରୁ ହିଁ ତାଙ୍କୁ ଅନୁଭବ ହୋଇଥିଲା ଯେ ସାଧାରଣ ଲୋକଙ୍କ ପାରିବାରିକ ପରିବେଶରେ ଏବଂ ଜଣେ ଯବାନଙ୍କ ପରିବାରର ପରିବେଶରେ କେତେ ପାର୍ଥକ୍ୟ ରହିଛି । ଏହିଠାରୁ ହିଁ ସେ ସେହି ଯବାନଙ୍କ ପରିବାରର ନିକଟତର ହେବାକୁ ଚିନ୍ତା କରିଥିଲେ ଏବଂ ଏଥିପାଇଁ ସେ ପ୍ରଥମେ କାରଗିଲରେ ସହିଦ ହୋଇଥିବା ୬୩୬ ଯବାନଙ୍କ ନାମ ଏକ ସହିଦ ସ୍ତମ୍ଭ ସହିତ ନିଜ ଶରୀରରେ ଟାଟୁ କରାଇଥିଲେ । ଅଭିଷେକ ଗୌତମ କହିଛନ୍ତି ଯେ ଯବାନଙ୍କ ପରିବାର ଲୋକଙ୍କୁ ନିଜର ଲୋକ ବୋଲି ଅନୁଭବ କରାଇବା ପାଇଁ ସେ ପ୍ରଥମେ ସହିଦଙ୍କ ନାମକୁ ନିଜ ଶରୀରରେ ଟାଟୁ କରାନ୍ତି ଏବଂ ତା’ପରେ ସେମାନଙ୍କୁ ଭେଟନ୍ତି । ଏହି କାରଣରୁ ତାଙ୍କ ଶରୀରରେ ସହିଦ ଯବାନଙ୍କ ନାମ ଲେଖା ହୋଇଛି । ଆଉ ଏହି ମହାନ ଚିନ୍ତାଧାରା ଯୋଗୁ ଇଣ୍ଡିଆ ବୁକ୍ ଅଫ୍ ରେକର୍ଡସ ମଧ୍ୟ ତାଙ୍କୁ ସମ୍ମାନିତ କରିଛି । ଏଥିସହିତ ସମାଜ ଆଗରେ ‘ଲିଭିଙ୍ଗ ୱାଲ ମେମୋରିଆଲ’ ନାମରେ ସେ ଖୁବ୍ ଜଣାଶୁଣା ।