ମିଠା ଦୋକାନୀକୁ ୫ ଲକ୍ଷ ଦାଦା ବଟି ମାଗି ବନ୍ଧା ହେଲା ରଘୁଆ

କନକ ବ୍ୟୁରୋ : ମିଠା ଦୋକାନୀକୁ ୫ ଲକ୍ଷ ଦାଦା ବଟି ମାଗିଲେ ଓ ଗିରଫ ହେଲେ । ଘଟଣା ଘଟିଛି ଏୟାର ଫିଲ୍ଡ ଥାନା ଚଣ୍ଡୀ ବଜାର ନିକଟରେ । ଜଣେ ମିଠା ବ୍ୟବସାୟୀଙ୍କୁ ୫ ଲକ୍ଷ ଟଙ୍କା ଦାଦା ବଟି ମାଗି ଧରା ପଡିଛି ମୁଖ୍ୟ ଅଭିଯୁକ୍ତ ରଘୁନାଥ ବାରିକ । ଏୟାର ଫିଲ୍ଡ ଥାନା ପୋଲିସ ଅଭିଯୁକ୍ତ ରଘୁନାଥଙ୍କୁ କାବୁ କରିଛି ।  କନକ ନ୍ୟୁଜ ହାତରେ ଲାଗିଛି ଏହାର ଏକ୍ସକ୍ଲୁସିଭ୍ ଫୁଟେଜ ।

ସିସିଟିଭି ଫୁଟେଜରେ ରଘୁଆ ଓ ତାର ଗ୍ୟାଙ୍ଗ ମିଠା ଦୋକାନ ଭିତରେ ପ୍ରବେଶ କରି ଦୋକାନ ମାଲିକକୁ ଭୟଭୀତ କରାଉଛନ୍ତି ଓ ଦୋକାନୀ ଜଣକ ଟଙ୍କା ଦେବାକୁ ମନା କରିବାକୁ ଦୋକାନ ଆଗରେ ପଥର ପକାଉଛନ୍ତି । ଯାହାକୁ ନେଇ ଏୟାର ଫିଲ୍ଡ ଥାନାରେ ଅଭିଯୋଗ ହେବା ପରେ ପୋଲିସ ରଘୁନାଥଙ୍କୁ ଧରିବାରେ ସଫଳ ହୋଇଛି ।

ପୂର୍ବରୁ ରଘୁଆ ନାଁରେ ହତ୍ୟା ଅଭିଯୋଗ ମଧ୍ୟ ରହିଛି । କିଛି ବର୍ଷ ତଳେ ଅମରେଶ ନାୟକ ନାମକ ଯୁବକୁ ହତ୍ୟା କରିଥିଲା ରଘୁଆ । ହତ୍ୟାକାଣ୍ଡ ଘଟଣାରେ ଜେଲରେ ମଧ୍ୟ ଥିଲା ରଘୁଆ ।