ଆସୁଛି ବଡ ବନ୍ୟା ; ବିପଦ ସଂକେତ ଡେଇଁଛି ସୁବର୍ଣ୍ଣରେଖା, ବୈତରଣୀ

କନକ ବ୍ୟୁରୋ : ଉପରମୁଣ୍ଡରେ ଲଗାଣ ବର୍ଷା ଫଳରେ ବିଭିନ୍ନ ନଦୀରେ ଜଳସ୍ତର ବଢ଼ିବାରେ ଲାଗିଛି । ବିପଦ ସଙ୍କେତ ଟପୁଛି ସୁବର୍ଣ୍ଣରେଖା, ଜଳକା, ବୈତରଣୀ ଓ ଦେଓ ନଦୀ । ତଳିଆ ଅଞ୍ଚଳରେ ପାଣି ପଶିଛି । କେଉଁଠି ରାସ୍ତା ଉପରେ ପାଣି ଚାଲୁଛି ତ, କେଉଁଠି ଗାଁ ଭିତରେ ଆଣ୍ଠୁଏ ଉଚ୍ଚର ପାଣି । ଉତ୍ତରଓଡ଼ିଶାରେ ପ୍ରବଳ ବର୍ଷା ପରେ ଫୁଲୁଛି ସୁବର୍ଣ୍ଣରେଖା, ବୈତରଣୀ, ବୁଢ଼ାବଳଙ୍ଗ ଓ ଜଳକା । ସୁବର୍ଣ୍ଣରେଖା ଅବବାହିକାରେ ବଡ ବର୍ଷା ହୋଇଛି । ଉପରମୁଣ୍ଡରେ ବର୍ଷା ପରେ ଗାଲଡିହି ଗେଟ୍ ଖୋଲାଯାଇଛି । ନିଷ୍କାଷିତ ହେଉଥିବା ବନ୍ୟା ଜଳ କାଲି ଦିନ ୧୦ଟାରେ ରାଜଘାଟ ଅତିକ୍ରମ କରିବ । ଯାହାଫଳରେ ସୁବର୍ଣ୍ଣରେଖାର ତଳିଆ ଅଂଚଳରେ କାଲି ଆହୁରି ପାଣି ପଶିବ । ମୟୂରଭଞ୍ଜ ଜିଲ୍ଲାର ୧୩ ବ୍ଲକରେ ୧୦୦ ମିଲିମିଟର ରେକର୍ଡ ବର୍ଷା ହୋଇଛି । ଏଥିପାଇଁ ସୁବର୍ଣ୍ଣରେଖାରେ ବଡ଼ ବନ୍ୟାର ଆଶଙ୍କା ସୃଷ୍ଟି ହୋଇଛି । ବୁଢାବଳଙ୍ଗକୁ ବି ବିପଦ ଅଛି । ଜଳକା ବିପଦ ସଂକେତ ଉପରେ ପ୍ରବାହିତ ହେଉଛି । ବୈତରଣୀ ବେସିନ ଆଖୁଆପଦାରେ ବିପଦ ସଂକେତ ଉପରେ ଅଛି । 

ବଢୁଛି ଜଳକା ନଦୀର ଜଳସ୍ତର । ମଥାନୀ ଠାରେ ବିପଦ ସଙ୍କେତ ୬.୫୦ ମିଟର ରହିଥିବା ବେଳେ ବନ୍ୟାଜଳ ଏହା ଉପରେ ପ୍ରବାହିତ ହେଉଛି । ବସ୍ତା ଅଞ୍ଚଳର ୮ଟି ପଞ୍ଚାୟତର ୩୦ରୁ ଅଧିକ ଗାଁ ଏବେ ପାଣି ଘେରରେ । ପାଣି ପଶିବା ପରେ ଏନଡିଆରଏଫ ଟିମ୍ ପହଞ୍ଚି ଜଳବନ୍ଦୀ ଥିବା ଲୋକଙ୍କୁ ଉଦ୍ଧାର କରିଛି । ପୋଲ ଉପରେ ୪ ଫୁଟର ପାଣି । ଉଦଳା - ବାଲେଶ୍ୱର ରାସ୍ତାର କଇଁସାରି ଠାରେ ବନ୍ୟା ପାଣି ପ୍ରବାହିତ ହେଉଛି । ଫୁଲିବାରେ ଲାଗିଛି ଦେଓ ନଦୀ।  ଉଦଳା - ବାଲେଶ୍ୱର ଯୋଗାଯୋଗ ବାଧାପ୍ରାପ୍ତ ହୋଇଛି । 

ବୈତରଣୀ ବନ୍ୟା ଜଳରେ କେନ୍ଦୁଝର କପୁଣ୍ଡି ଗ୍ରାମ ପଞ୍ଚାୟତର ପଇଦା ନାଳ ଉପରେ ପାଣି ଚାଲୁଛି । ଫଳରେ ପାଟଣା ଭାୟା କପୁଣ୍ଡି, ମିରିଗିଖୋଜି, କୁଣ୍ଡଳା, ବନବୀର ଠାକୁରମୁଣ୍ଡା ରାସ୍ତା ଯୋଗାଯୋଗ ବିଚ୍ଛିନ୍ନ ହୋଇଛି । ଇବ୍ ନଦୀରେ ବନ୍ୟା ପାଣି ସୁନ୍ଦରଗଡ଼ ସହରର ରାଣୀବଗିଚା, ଗୁଆଲାପଡ଼ା ଅଞ୍ଚଳରେ ପଶି ଜଳବନ୍ଦୀ ସ୍ଥିତି ସୃଷ୍ଟି ହୋଇଛି । ପିଏଚ୍‌ ଡି ପମ୍ପ ହାଉସରେ ପାଣି ପଶିବାରୁ ଜଳଯୋଗାଣ ବାଧାପ୍ରାପ୍ତ ହୋଇଛି । ଛତିଶଗଡ଼ର ସମଡମା ଆନିକଟର ଗେଟ୍‌ ଖୋଲିଦେବାରୁ ଏପଟେ ବନ୍ୟା ପରିସ୍ଥିତି ସୃଷ୍ଟି ହୋଇଛି ।    

ବଡ଼ ବନ୍ୟା ଆଶଙ୍କାକୁ ନଜରରେ ରଖି ବାଲେଶ୍ବର, ଭଦ୍ରକ, ଯାଜପୁର ଓ ମୟୂରଭଞ୍ଜ ଜିଲ୍ଲାପାଳଙ୍କୁ ସତର୍କ କରିଛନ୍ତି ସରକାର । ସବୁ ପରିସ୍ଥିତିର ମୁକାବିଲା ପାଇଁ ପ୍ରସ୍ତୁତ ରହିବାକୁ ଏସଆରସି ନିର୍ଦ୍ଦେଶ ଦେଇଛନ୍ତି । ତେବେ ମହାନଦୀ ଅବବାହିକାରେ ଏବେ ବନ୍ୟା ନାହିଁ । ହେଲେ ଛତିଶଗଡରେ ବର୍ଷା ଲାଗି ରହିଥିବାରୁ ହୀରାକୁଦରେ ଜଳସ୍ତର ବଢ଼ିବ ।