ବେଆଇନ କାରବାର ମାମଲାରେ ବଡ଼ କାର୍ଯ୍ୟାନୁଷ୍ଠାନ: ଭିଜିଲାନ୍ସ କୋର୍ଟରେ ୧୪ ଦୋଷୀ ସାବ୍ୟସ୍ତ , ଅନେକଙ୍କୁ ଜେଲ କାରାଦଣ୍ଡ

କନକବ୍ୟୁରୋ : ବେଆଇନ୍ କାରବାର ସହିତ ଜଡ଼ିତ ଥିବା ବ୍ୟକ୍ତିମାନଙ୍କ ବିରୋଧରେ ଓଡ଼ିଶା ଭିଜିଲାନ୍ସର କାର୍ୟ୍ୟାନୁଷ୍ଠାନ। ଭିଜିଲାନ୍ସ ବିଭାଗର ବିଭିନ୍ନ କୋର୍ଟରେ ୧୪ ଜଣ ଦୋଷୀ ସାବ୍ୟସ୍ତ ହୋଇଛନ୍ତି। ଏଥିରେ ୫ ଜଣ ପୂର୍ବତନ ସରପଞ୍ଚ ସାମିଲ ଅଛନ୍ତି। ୨୦୦୫ରେ ମୟୂରଭଂଜ ଜିଲ୍ଲା ଉଦଳାରେ ଲାଇଟ୍ ସଂଯୋଗ ନାଁରେ ବ୍ୟାପକ ଅନିୟମିତତା ମାମଲାରେ ବାରିପଦା ସ୍ବତନ୍ତ୍ର ଭିଜିଲାନ୍ସ କୋର୍ଟ ୫ ଜଣ ପୂର୍ବତନ ସରପଞ୍ଚ ଓ ଜଣେ ବିଦ୍ୟୁତ ସାମଗ୍ରୀ ଯୋଗାଣକାରୀଙ୍କୁ ୩ ବର୍ଷ ଲେଖାଏଁ ଜେଲଦଣ୍ଡ ଶୁଣାଇଛନ୍ତି ।

ସେପଟେ କେନ୍ଦୁଝର ଜିଲ୍ଲା ଚମ୍ପୁଆ ଆଇଟିଡିଏର ପୂର୍ବତନ ସହକାରୀ ଯନ୍ତ୍ରୀ (ଅବସରପ୍ରାପ୍ତ ) ଶିବାନନ୍ଦ ପଟ୍ଟନାୟକ, ପୂର୍ବତନ କନିଷ୍ଠ ଯନ୍ତ୍ରୀ ଶକ୍ତିରଂଜନ ସିଂହସାମନ୍ତ ଓ ଚତୁର୍ଭୁଜ ବେହେରାଙ୍କୁ କେନ୍ଦୁଝର ସ୍ବତନ୍ତ୍ର ଭିଜିଲାନ୍ସ କୋର୍ଟ ୪ବର୍ଷ ଜେଲଦଣ୍ଡ ଶୁଣାଇଛନ୍ତି । କଟକ ମହାନଗର ନିଗମର ପୂର୍ବତନ (ସେବାନିବୃତ୍ତ) ଟାକ୍ସ କଲେକ୍ଟର ଏସ୍କେ ଉସମାନ ଖାନଙ୍କୁ ୪ ବର୍ଷ ଜେଲ ଦଣ୍ଡ ଶୁଣାଇଛନ୍ତି ।

 କଟକ ଭିଜିଲାନ୍ସ କୋର୍ଟ ସିଟି ଲେଭେଲ ଟେକ୍ନିକାଲ ସେଲ୍ର ଶ୍ରୀକାନ୍ତ ମହାପାତ୍ରଙ୍କୁ ଚାକିରିରୁ ବହିଷ୍କାର କରିଛନ୍ତି। ଭିଜିଲାନ୍ସ କୋର୍ଟ ସୁନ୍ଦରଗଡ଼ ଡିଏଫ୍ଓ କାର୍ୟ୍ୟାଳୟର ପୂର୍ବତନ ହିସାବରକ୍ଷକ ହେମନ୍ତ କୁମାର ମିଶ୍ରଙ୍କୁ ୩ ବର୍ଷ ଜେଲ ଓ ୧ ଲକ୍ଷ ଟଙ୍କା ଜରିମାନା ଦଣ୍ଡ ଶୁଣାଇଛନ୍ତି। ଗଂଜାମ ଜିଲ୍ଲା ଜଗନ୍ନାଥପୁର ମାର୍କଫେଡର ପୂର୍ବତନ ପ୍ରବନ୍ଧକ ଭୁବନ ମୋହନ ଦାଶ ଓ ପୂର୍ବତନ ପ୍ରଭାରୀ ଏସ୍କେ ଅବଦୁଲଙ୍କୁ ବ୍ରହ୍ମପୁର ଭିଜିଲାନ୍ସ କୋର୍ଟ ୩ ବର୍ଷ ଜେଲଦଣ୍ଡ ଶୁଣାଇଛନ୍ତି।