‘ଗଙ୍ଗାରେ ଶବ ଭସେଇଛନ୍ତି ଯୋଗୀ ସରକାର । ମହାକୁମ୍ଭ ଦଳାଚକଟା ପରେ ନଦୀରେ ଫିଙ୍ଗିଛନ୍ତି ଶବ’

କନକ ବ୍ୟୁରୋ: ମହାକୁମ୍ଭ ଦଳାଚକଟାରେ ଅନେକ ଲୋକ ପ୍ରାଣ ହରେଇବା ପରେ, ଯୋଗୀ ସରକାର ଉପରେ କିଛି ଏଭଳି ଅଭିଯୋଗ କରିଛନ୍ତି ଲୋକପ୍ରିୟ ବଲିଉଡ୍ ଅଭିନେତ୍ରୀ ତଥା ସାଂସଦ ଜୟା ବଚ୍ଚନ । ସିଧା ସିଧା ଯୋଗୀ ସରକାରକୁ ଟାର୍ଗେଟ କରିବା ସହ, ମହାକୁମ୍ଭ ଦଳାଚକଟାରେ ଜୀବନ ହାରିଥିବା ଲୋକଙ୍କୁ ସରକାର ଗଙ୍ଗା ନଦୀରେ ଭସେଇ ଦେଇଛନ୍ତି ବୋଲି ଅଭିଯୋଗ କରିଛନ୍ତି ଜୟା ।

ସିଧା ସିଧା କହିଛନ୍ତି, ମହାକୁମ୍ଭ ଦଳାଚକଟାରେ ଜୀବନ ହାରିଥିବା ଲୋକଙ୍କ ଶବକୁ ନଦୀରେ ଫୋପାଡିଦେଲେ, ଯେଉଁ କାରଣରୁ ଗଙ୍ଗା ନଦୀର ପାଣି ଦୂଷିତ ହେଲା । ସରକାର ଏ ଦିଗରେ କିଛି ବି ଠୋସ୍ ଜବାବ ଦେଉନି, ଆଉ ଏ ମୁଦ୍ଦା ଉପରେ ପୂରାପୂରି ସରକାର ଚୁପ୍ ଅଛି ବୋଲି କହିବା ସହ, ଗମ୍ଭୀର ଅଭିଯୋଗ ଆଣିଛନ୍ତି ଜୟା ବଚ୍ଚନ । 

ଜୟା ବଚ୍ଚନ ଆହୁରି କହିଛନ୍ତି ଯେ, ମହାକୁମ୍ଭକୁ ନେଇ ସରକାର ମିଛ ଦାବି କରୁଛି । ଭିଆଇପିମାନଙ୍କୁ ବିଶେଷ ସୁବିଧା ମିଳୁଥିବାବେଳେ, ସାଧାରଣ ଲୋକଙ୍କ ପାଇଁ କିନ୍ତୁ କିଛି ବି ସୁବିଧା ନାହିଁ । ଯେଉଁ ଲୋକମାନେ ଗରିବ, ମହାକୁମ୍ଭରେ କିଛି ବି ବ୍ୟବସ୍ଥା ନାହିଁ ବୋଲି କହି, ଯୋଗୀ ସରକାରକୁ ତୀର ମାରିଛନ୍ତି ଜୟା । ଆଉ ସେପଟେ ଜୟାଙ୍କ ଏଭଳି ସାଙ୍ଘାତିକ ଅଭିଯୋଗ ପରେ, ବିଜେପି ସାଂସଦ ରବିଶଙ୍କର ପ୍ରସାଦ ଲୋକସଭାରେ ହିଁ ଏହାର ଜବାବ ଦେଇଛନ୍ତି । କହିଛନ୍ତି, ମହାକୁମ୍ଭ ଘଟଣାର ଯାଞ୍ଚ ଚାଲିଛି, ଆଉ ଏ ଘଟଣାରେ ଷଡଯନ୍ତ୍ରର ଗନ୍ଧ ମିଳୁଛି । 

ଗତ ଜାନୁୟାରୀ ୨୯ ତାରିଖ,ମହାକୁମ୍ଭ ମୌନୀ ଅମାବାସ୍ୟା ସମୟରେ ପ୍ରୟାଗ ସଙ୍ଗମରେ ଦଳାଚକଟା ହେଇଥିଲା । ଯେଉଁଥିରେ ୩୦ରୁ ଅଧିକ ଲୋକ ଜୀବନ ହାରିଥିଲେ । ୬୦ ଅଧିକ ଲୋକ ଏହି ଘଟଣାରେ ଆହତ ହେଇଥିଲାବେଳେ,ଏହାକୁ ପ୍ରସଙ୍ଗ କରି ଏବେ ସରକାରକୁ ଘେରିବା ଆରମ୍ଭ କରିଛନ୍ତି ବିରୋଧୀ ।