ପୁଲିସ ପାଖରୁ ଗାଡ଼ି ଛଡ଼ାଇନେଲେ ମାଫିଆ, ବେଆଇନ ବାଲି ଉତ୍ତୋଳନ ବେଳେ ଟ୍ରାକ୍ଟର ଜବତ କରିଥିଲେ ଖଣି ଅଧିକାରୀ ଓ ପୁଲିସ

କନକ ବ୍ୟୁରୋ: ପୁଲିସ ପାଖରୁ ଜବତ ଟ୍ରାକ୍ଟର ଛଡାଇନେଲେ ବାଲି ମାଫିଆ । ବାଲେଶ୍ବର ନୀଳଗିରି ଥାନା ପ୍ରତାପପୁର ଛକରେ ଏହି ଘଟଣା ଘଟିଛି । ସୋନ ନଦୀରେ ବେଆଇନ ଭାବେ ବାଲି ଉତ୍ତୋଳନ ଚାଲିଥିବା ବେଳେ ନୀଳଗିରି ଖଣି ଅଧିକାରୀ ଓ ପୁଲିସ ମିଳିତ ଭାବରେ ଚଢାଉ କରିଥିଲେ ।

 ଚଢାଉ ସମୟରେ ଗୋଟିଏ ଟ୍ରାକ୍ଟର ଜବତ କରି ନିକଟସ୍ଥ ଅଯୋଧ୍ୟା ଫାଣ୍ଡିକୁ ନେଇ ଯାଉଥିଲେ । ଏହି ସମୟରେ ପ୍ରତାପପୁର ଛକ ନିକଟରେ ବାଇକରେ ୧୦ରୁ ୧୫ ଜଣ ଯୁବକ ଆସି କନେଷ୍ଟବଳଙ୍କୁ ମାରଣାସ୍ତ୍ର ଦେଖାଇ ଟ୍ରାକ୍ଟରଟିକୁ ନେଇଯାଇଥିଲେ । ପରେ ନୀଳଗିରି ଥାନାରେ ଅଭିଯୋଗ ପରେ ପୋଲିସ ତଦନ୍ତ ଆରମ୍ଭ କରିଛି ।