ରାଜ୍ୟରେ ସାର ସଙ୍କଟ ! ସାର ପାଇଁ ସଂଘର୍ଷ କରୁଛନ୍ତି ଚାଷୀ

କନକ ବ୍ୟୁରୋ : ଖରିଫ ଋତୁରେ ଚାଷ ସମୟରେ ପ୍ରତିବର୍ଷ ରାସାୟନିକ ସାରର ସଙ୍କଟ ଦେଖାଦେଇଥାଏ । କିନ୍ତୁ ଚଳିତ ବର୍ଷ ଅନ୍ୟ ବର୍ଷ ତୁଳନାରେ ଅସହ୍ୟ ହେଉଛି ସାର ସମସ୍ୟା । ବିଶେଷ କରି ୟୁରିଆ ସାରର ଅଭାବ ଯୋଗୁଁ ରାଜରାସ୍ତାରେ ବସୁଛନ୍ତି ଚାଷୀ । ଚାଷ ପାଇଁ ୟୁରିଆ ସାରର ନିହାତି ଆବଶ୍ୟକତା ରହିଥିବା ବେଳେ କିଛି କଳାବଜାରୀ ଚଢ଼ା ଦରରେ ସାର ବିକ୍ରୟ କରିବା ଫଳରେ ଚାଷୀ ଠିକ ପରିମାଣରେ ସାର ପାଇପାରୁନାହିଁ ।

ସାର ପାଇଁ ଭିଡ଼ । ସାରର ଅଭାବ ଭିତରେ ୟୁରିଆ ସାର ନେବାକୁ ମାଲକାନାଗିରି ମାଥଲି ଲ୍ୟାମ୍ପସ ବାହାରେ ଚାଷୀଙ୍କ ଭିଡ ଦେଖିବାକୁ ମିଳିଛି । କିଏ ଲ୍ୟାମ୍ପସର ଛାତ ଉପରେ, ତ ଆଉ କିଏ ପାଚେରୀ ଉପରେ ଚଢ଼ି ହୋଇଛନ୍ତି । ପ୍ରଶାସନ ପକ୍ଷରୁ ସାର ଯୋଗାଇ ଦେବାକୁ ଅନୁମତି ମିଳିବା ପରେ ହଜାର ହଜାର ଚାଷୀ ଆସିଥିଲେ । ପରିସ୍ଥିତି ଏମିତି ହୋଇଥିଲା ଭିଡ଼ ନିୟନ୍ତ୍ରଣ କରିବାକୁ ପୋଲିସ ମୁତୟନ କରିବାକୁ ପଡିଥିଲା । କେବଳ ମାଥଲି ନୁହେଁ ନବରଙ୍ଗପୁର, ଗଞ୍ଜାମ ଜିଲ୍ଲାରେ ଏଭଳି ଚିତ୍ର ଦେଖିବାକୁ ମିଳିଛି ।

ଗଞ୍ଜାମରେ ଆସ୍କା ପରେ ସୋରଡ଼ାରେ ୟୁରିଆ ସାର ନେବା ପାଇଁ ଚାଷୀଙ୍କ ମଧ୍ୟରେ ଠେଲା ପେଲା ପରିସ୍ଥିତି ଉପୁଜୁଛି । ମାତ୍ର ୯୦୦ ବସ୍ତା ସାର ଆସିଥିବା ବେଳେ ଶହ ଶହ ଚାଷୀ ଆସିଯିବାରୁ ଶେଷରେ ପୋଲିସ ଉପସ୍ଥିତିରେ ୟୁରିଆ ସାର ବଣ୍ଟାଯାଇଛି । ସବୁ କାମ ଛାଡି ରାତିରୁ ଆସି ଲାଇନରେ ଛିଡା ହେବା ସତ୍ତ୍ୱେ ବି କିଛି ଚାଷୀଙ୍କୁ ନିରାଷ ହୋଇ ଫେରିବାକୁ ପଡ଼ିଛି । ସେପଟେ ନବରଙ୍ଗପୁର ଉମରକୋଟରେ ସାର ଗାଡ଼ିକୁ ଅଟକାଇ ନିଜ ନିଜ ମଧ୍ୟରେ ବାଣ୍ଟିନେଇଛନ୍ତି ଗ୍ରାମବାସୀ । ସରକାରଙ୍କ ପକ୍ଷରୁ ଟ୍ରାକ୍ଟରରେ ସାର ବାଣ୍ଟିବା ପାଇଁ ଅଣାଯାଉଥିବା ବେଳେ ଚାଷୀମାନେ ଗାଡିକୁ ଅଟକାଇଥିଲେ । ପରେ ଗାଡ଼ିରେ ଥିବା ୧୦୦ ବସ୍ତା ସାରକୁ ପୁଲିସ ପ୍ରଶାସନ ଉପସ୍ଥିତିରେ ନିଜ ନିଜ ଭିତରେ ବାଣ୍ଟିନେଇଛନ୍ତି ।

ବସ୍ତା ପିଛା ୨୭୦ ଟଙ୍କା ଦରରେ ସରକାରଙ୍କ ତରଫରୁ ୟୁରିଆ ସାର ଯୋଗାଇ ଦିଆଯାଉଛି । କିନ୍ତୁ ସାରର ଅଭାବ ଯୋଗୁ ବଜାରରେ ବସ୍ତା ପିଛା ୭୦୦ ରୁ ୯୦୦ ଟଙ୍କା ସାର ବିକ୍ରି କରାଯାଉଛି । ଅଧିକ ଅମଳ ପାଇଁ ସାରର ଆବଶ୍ୟକତା ରହିଥିବା ବେଳେ ଦରକୁ ନେଇ ଚିନ୍ତାରେ ପଡିଯାଛନ୍ତି ଚାଷୀ ।