ଘୋଷଣାପତ୍ରର ନାମ, "ତେଜସ୍ୱୀ ପ୍ରଣ'

କନକ ବ୍ୟୁରୋ : ବିହାର ବିଧାନସଭା ନିର୍ବାଚନକୁ ନେଇ ରାଜନୀତି ଜୋର ଧରିଛି । ନିର୍ବାଚନ ତାରିଖ ଯେତେ ପାଖେଇ ଆସୁଛି ରାଜନୈତିକ ଦଳମାନେ ଲୋକଙ୍କୁ ପ୍ରତିଶ୍ରୁତିର ହିମାଳୟ ଉପରେ ଠିଆ କରାଉଛନ୍ତି । ଏହି କ୍ରମରେ ଆଜି ମହାଗଠବନ୍ଧନ ତରଫରୁ ପ୍ରତିଶ୍ରୁତି ପତ୍ର ପ୍ରକାଶ ପାଇଛି । ଘୋଷଣାପତ୍ରରେ ବିହାରରେ ମଦ ବନ୍ଦ ଆଇନକୁ ନେଇ ବଡ଼ ଘୋଷଣା କରାଯାଇଛି । କୁହାଯାଇଛି କି, ମହାଗଠବନ୍ଧନର ସରକାର ଆସିଲେ ବିହାରର ମଦ ବନ୍ଦ ଆଇନ ଉପରେ ପୁଣିଥରେ ସମୀକ୍ଷା କରାଯାଇ ସୁସଂଗତ ନୀତି ଲାଗୁ କରାଯିବ । ଏହାସହ ଚୋରା ମଦ କାରବାର ଅଭିଯୋଗରେ ଜେଲରେ ଥିବା ଦଳିତ ଓ ଅନ୍ୟ ଗରିବ ଲୋକଙ୍କ ତକ୍ରାଳ ବାହାର କରାଯିବ । ତାଡ଼ି ଓ ମହୁଆ ଭଳି ପାରମ୍ପରିକ ରୋଜଗାର ଉପରେ ମଦ ବନ୍ଦ ଆଇନ ଲାଗୁ ହେବ ନାହିଁ ।

Advertisment

ଘୋଷଣାପତ୍ର ଜାରି ହେବା ପରେ ମହାଗଠବନ୍ଧନର ନେତା ତଥା ମୁଖ୍ୟମନ୍ତ୍ରୀ ଚେହେରା ତେଜସ୍ୱୀ ଯାଦବ ସୋସିଆଲ ମିଡିଆରେ ଏକ ପୋଷ୍ଟ କରିଛନ୍ତି । ଏଥିରେ ସେ ଲେଖିଛନ୍ତି କି, ଏହା ଇଣ୍ଡିଆ ମେଣ୍ଟର ସଂକଳ୍ପପତ୍ର, ପ୍ରତିଟି ସଂକଳ୍ପ ହୃଦୟରୁ ନିଆଯାଇଥିବା ଏକ ପ୍ରଣ । ଆମେ ସରକାରକୁ ଆସିଲେ ପ୍ରତିଟି ପ୍ରତିଶ୍ରୁତି ପୂରଣ କରିବାକୁ ଜୀବନ ବାଜିରେ ଲଗାଇଦେବୁ । ଜଣେ ବିହାରୀ ଯେତେବେଳେ ପ୍ରତିଶ୍ରୁତି ଦିଏ, ସେତେବେଳେ ତାକୁ ପୂରଣ କରିବାକୁ ପୂରା ଦମ୍ ଲଗାଇଦିଏ ।

ଘୋଷଣାପତ୍ରରେ ରହିଛି କ'ଣ ?

ପ୍ରତି ପରିବାରକୁ ୨୦୦ ୟୁନିଟ୍ ପର୍ଯ୍ୟନ୍ତ ମାଗଣା ବିଜୁଳି
ଗରିବ ପରିବାରକୁ ୫୦୦ ଟଙ୍କାରେ ଗ୍ୟାସ ସିଲିଣ୍ଡର
ତ୍ରୁଟିପୂର୍ଣ୍ଣ ସ୍ମାର୍ଟ ମିଟର ସମସ୍ୟାର ସମାଧାନ
ଯୁବା ସାହାନୀ ପୁରସ୍କାର ଆରମ୍ଭ
ନିଶା ନିୟନ୍ତ୍ରଣ ପାଇଁ କଠୋର ଆଇନ
ୱାକଫ୍ ସଂଶୋଧନ ବିଧେୟକ ଉପରେ ପ୍ରତିବନ୍ଧକ
ଧାର୍ମିକ ସ୍ଥଳ ଉପରେ ଆକ୍ରମଣ ରୋକିବାକୁ କଠୋର ଆଇନ ପ୍ରଣୟନ
ଦିବ୍ୟାଙ୍ଗଙ୍କୁ ମାସିକ ୩ ହଜାର ଟଙ୍କାର ଭତ୍ତା
ବିଧବା ଓ ବୟସ୍କଙ୍କୁ ମାସିକ ୧୫ ଶହ ଟଙ୍କା ଭତ୍ତା
ଗାଁରେ ରହୁଥିବା ଭୂମିହୀନମାନଙ୍କୁ ମାଗଣାରେ ୫ ଡେସିମିଲ ଜମି
ସହରରେ ରହୁଥିବା ଭୂମିହୀନମାନଙ୍କୁ ମାଗଣାରେ ୩ ଡେସିମିଲ ଜମି
ମନରେଗାରେ ମଜୁରୀ ୩୦୦ ଟଙ୍କାକୁ ବୃଦ୍ଧି
ପୁରୁଣା ପେନସନ ଯୋଜନା ପୁଣି ଲାଗୁ
୨୦୦୦ ଏକର ଜମିରେ ଏଜୁକେଶନାଲ ସିଟି
ସବୁ ଅସ୍ଥାୟୀ କର୍ମଚାରୀଙ୍କୁ ସ୍ଥାୟୀ ଚାକିରି