ରାସନ ଚାଉଳ ପାଇଁ ବାଜିରେ ଜୀବନ ; ବିପଦରେ ନଦୀ ପାର ହେଉଛନ୍ତି ଗାଁ ଲୋକେ

କନକ ବ୍ୟୁରୋ: ଭରା ନଦୀରେ ବାଜିରେ ଲାଗିଛି ଜୀବନ । ଗାଁକୁ ରାସ୍ତାଟିଏ ନଥିବାରୁ ବର୍ଷା ୪ ମାସ ଲୋକମାନେ ଏଭଳି ହଇରାଣ ହେଉଛନ୍ତି । ରାସନ ଚାଉଳ ପାଇଁ ଲୋକଙ୍କୁ ନଦୀ ପାର ହୋଇ ଯିବାକୁ ପଡ଼ୁଛି । କେନ୍ଦୁଝର ଜିଲ୍ଲା ତେଲକୋଇ ବ୍ଲକ ବଡଖମଣ ଗାଁରୁ ଆସିଛି ଏଭଳି ଖବର । ବଡ଼ଖମଣ ଗାଁକୁ ବାଟ ଓଗାଳିଛି ସମାକୋଇ ନଦୀ । ନଦୀରେ ପୋଲ ନଥିବାରୁ ଲୋକେ ନାହିଁ ନଥିବା ଅସୁବିଧାର ସମ୍ମୁଖିନ ହେଉଛନ୍ତି  । 

ଅନ୍ୟ ଦିନରେ ପାଦ ଚଲା ରାସ୍ତାରେ କାମ ଚଳାଇଥାନ୍ତି ଲୋକେ । ହେଲେ ବର୍ଷା ୪ମାସ ଗାଁ ଚାରିପଟେ ସମାକୋଇ ନଦୀ ଘେରି ରହିଥିବାରୁ ଜଳବନ୍ଦୀ ଅବସ୍ଥାରେ ରହୁଛନ୍ତି । ଗର୍ଭବତୀ ମହିଳାଙ୍କ ଠାରୁ ଆରମ୍ଭ କରି ଗୁରୁତର ରୋଗୀମାନଙ୍କୁ ଡାକ୍ତରଖାନା ନେବା କାଠିକର ପାଠ ହେଉଛି । ରୋଗୀଙ୍କୁ ଖଟିଆରେ ବୋହି ନଦୀ ପାର କରାଇଥାନ୍ତି ଗ୍ରାମବାସୀ । ନଈର ଜଳସ୍ତର ବୃଦ୍ଧି ହେଲେ ଗର୍ଭବତୀ ମହିଳା ଓ ଗୁରୁତର ରୋଗୀ ଭଗବାନଙ୍କ ଭରସାରେ ରହିଥାନ୍ତି । ସେହିଭଳି ପଞ୍ଚାୟତରୁ ଖାଦ୍ୟ ସୁରକ୍ଷା ଯୋଜନାରେ ଚାଉଳ ନେବାପାଇଁ ମଧ୍ୟ ଲୋକଙ୍କୁ  ସମାକୋଇ ନଦୀ ପାର ହେବାକୁ ପଡ଼ିଥାଏ । ଗାଁର ୨ଟି ସାହିରେ ୧୫୦ରୁ ଅଧିକ ପରିବାର ବସବାସ କରୁଛନ୍ତି । ହେଲେ ରାସ୍ତା ଘାଟର ଅସୁବିଧା ସେମାନଙ୍କ ଜୀବନକୁ ଦୁର୍ବିସହ କରିଦେଉଛି ।