କନକ ବ୍ୟୁରୋ : ଛୋଟ ଛୋଟ କୋମଳମତି ପିଲାମାନେ ଦେଶର ଭବିଷ୍ୟତ , ସେମାନେ ଓଦା ମାଟି ସଦୃଶ, ଯାହାକୁ ଯେଉଁଭଳି ଗଢ଼ାଯାଏ, ସେ ସେହିଭଳି ଆକାର ନିଏ । ତେଣୁ ପିଲାଦିନରୁ ସେମାନଙ୍କ ମନରେ ଦେଶପ୍ରେମର ମଞ୍ଜି ବୁଣିବା ପ୍ରତ୍ୟେକ ଅଭିଭାବକ, ଶିକ୍ଷକ ଏବଂ ସମାଜର ପରମ କର୍ତ୍ତବ୍ୟ । ଦେଶପ୍ରେମ କେବଳ ସ୍ୱାଧୀନତା ଦିବସ ବା ସାଧାରଣତନ୍ତ୍ର ଦିବସରେ ପତାକା ଉତ୍ତୋଳନ ଏବଂ ସ୍ଲୋଗାନ ଦେବାରେ ସୀମିତ ନୁହେଁ, ବରଂ ଏହା ଏକ ଗଭୀର ଭାବନା ଯାହା ଆମର କାର୍ଯ୍ୟ, ଆଚରଣ ଏବଂ ଦାୟିତ୍ୱବୋଧରେ ପ୍ରତିଫଳିତ ହେବା ଉଚିତ୍ ।

କୋମଳମତି ପିଲାମାନଙ୍କ ଦେଶପ୍ରେମ ଭାବନା ଜାଗ୍ରତ କରିବାର ମାଧ୍ୟମ :

Advertisment

ସ୍ୱାଧୀନତା ସଂଗ୍ରାମୀଙ୍କ କାହାଣୀ ଶୁଣାନ୍ତୁ : ପିଲାମାନଙ୍କୁ ମହାତ୍ମା ଗାନ୍ଧୀ, ସୁଭାଷ ଚନ୍ଦ୍ର ବୋଷ, ଭଗତ ସିଂହଙ୍କ ସହିତ ଓଡ଼ିଶାର ବୀରପୁତ୍ର ବାଜି ରାଉତ, ବକ୍ସି ଜଗବନ୍ଧୁ, ବୀର ସୁରେନ୍ଦ୍ର ସାଏଙ୍କ ଭଳି ସଂଗ୍ରାମୀମାନଙ୍କର ସାହସିକତା ଓ ବଳିଦାନର କାହାଣୀ ଶୁଣାନ୍ତୁ । ଏହା ସେମାନଙ୍କ ମନରେ ଦେଶ ପାଇଁ କିଛି କରିବାର ପ୍ରେରଣା ସୃଷ୍ଟି କରିବ ।

ଜାତୀୟ ପ୍ରତୀକର ମହତ୍ୱ ବୁଝାନ୍ତୁ : ଜାତୀୟ ପତାକା, ଜାତୀୟ ସଙ୍ଗୀତ ଏବଂ ଜାତୀୟ ପ୍ରତୀକଗୁଡ଼ିକର ସମ୍ମାନ କରିବା ଶିଖାନ୍ତୁ । ତ୍ରିରଙ୍ଗାର ତିନୋଟି ରଙ୍ଗ ଓ ଅଶୋକ ଚକ୍ରର ଅର୍ଥ କ’ଣ, ତାହା ସରଳ ଭାଷାରେ ବୁଝାନ୍ତୁ ।

ଜାତୀୟ ପର୍ବ ପାଳନ କରନ୍ତୁ: ସ୍ୱାଧୀନତା ଦିବସ ଓ ସାଧାରଣତନ୍ତ୍ର ଦିବସକୁ କେବଳ ଛୁଟି ଦିନ ଭାବରେ ନୁହେଁ, ବରଂ ଏହାର ମହତ୍ୱକୁ ବୁଝାଇ ଉତ୍ସାହର ସହ ପାଳନ କରନ୍ତୁ ।

ବିଦ୍ୟାଳୟ ଓ ଶିକ୍ଷକଙ୍କ ଦାୟିତ୍ୱ : ଶିକ୍ଷକମାନେ ଇତିହାସକୁ କେବଳ ପାଠ୍ୟକ୍ରମ ଭାବରେ ନୁହେଁ, ବରଂ ଏକ ଗୌରବମୟ ଗାଥା ଭାବରେ ଉପସ୍ଥାପନ କରିବା ଉଚିତ୍ । ବିଦ୍ୟାଳୟରେ ଦେଶଭକ୍ତି ସଙ୍ଗୀତ, ବକ୍ତୃତା, ଚିତ୍ରାଙ୍କନ ଓ ପ୍ରବନ୍ଧ ପ୍ରତିଯୋଗିତା ଆୟୋଜନ କରାଯିବା ଆବଶ୍ୟକ ନିହାତି ଆବଶ୍ୟକ ।

ସୈନିକମାନଙ୍କ ପ୍ରତି ସମ୍ମାନ: ଦେଶର ସୁରକ୍ଷା ପାଇଁ ସୀମାରେ ନିୟୋଜିତ ସୈନିକମାନଙ୍କ ତ୍ୟାଗ ଓ କଷ୍ଟ ବିଷୟରେ ପିଲାମାନଙ୍କୁ ଅବଗତ କରାନ୍ତୁ । ଏହା ସେମାନଙ୍କ ମନରେ ସୈନିକମାନଙ୍କ ପ୍ରତି ସମ୍ମାନ ସୃଷ୍ଟି କରିବ । ବଡ଼ ହେଲା ପରେ ଦେଶ ପାଇଁ ସେମାନେ ମଧ୍ୟ ସେନାରେ ଯିବାକୁ ଇଚ୍ଛା ପ୍ରକାଶ କରିବେ ।

ବିବିଧତାରେ ଏକତା : ଭାରତ ବିଭିନ୍ନ ଧର୍ମ, ଭାଷା ଓ ସଂସ୍କୃତିର ଦେଶ । ସମସ୍ତଙ୍କୁ ସମ୍ମାନ ଦେବା ଏବଂ ମିଳିମିଶି ରହିବା ହିଁ ପ୍ରକୃତ ଦେଶପ୍ରେମ ବୋଲି ପିଲାମାନଙ୍କୁ ଶିଖାଇବା ଜରୁରୀ ।

ପ୍ରକୃତ ଦେଶପ୍ରେମର ଅର୍ଥ ଅନ୍ୟ ଦେଶକୁ ଘୃଣା କରିବା ନୁହେଁ, ବରଂ ନିଜ ଦେଶକୁ ଭଲ ପାଇବା ଏବଂ ଏହାର ଉନ୍ନତି ପାଇଁ ନିଜ କର୍ତ୍ତବ୍ୟ ସମ୍ପାଦନ କରିବା । ଯଦି ପିଲାମାନଙ୍କୁ ପିଲାଦିନରୁ ଏହି ସଂସ୍କାର ଦିଆଯାଏ, ତେବେ ସେମାନେ ଭବିଷ୍ୟତରେ ଜଣେ ଜଣେ ଦାୟିତ୍ୱବାନ, ସଚ୍ଚୋଟ ଏବଂ ସଚେତନ ନାଗରିକ ହୋଇପାରିବେ, ଯାହା ଏକ ସୁଦୃଢ଼ ଓ ଉଜ୍ଜ୍ୱଳ ଭାରତ ନିର୍ମାଣରେ ସହାୟକ ହେବ ।