କନକ ବ୍ୟୁରୋ : ଚୀନ ତିବ୍ୱତ ଦେଇ ପ୍ରବାହିତ ହେଉଥିବା ବ୍ରହ୍ମପୁତ୍ର ନଦୀର ଉପରମୁଣ୍ଡରେ ଏକ ଡ୍ୟାମ ନିର୍ମାଣ କରୁଛି । ଏହି ଡ୍ୟାମର ନିର୍ମାଣ ଗ୍ରେଟ୍ ବ୍ୟାଣ୍ଡ ନାମକ ଏକ ସ୍ଥାନରେ ଚୀନ କରୁଛି । ଏହି ଠାରୁ ବ୍ରହ୍ମପୁତ୍ର ନଦୀ ଏକ ବଡ଼ ମୋଡ଼ ନେଇ ଅରୁଣାଚଳ ପ୍ରଦେଶ ଦେଇ ଭାରତକୁ ପ୍ରବେଶ କରୁଛି । ଏହି କ୍ଷେତ୍ରରେ ଏହି ନଦୀ ସିୟାଙ୍ଗ ନାମରେ ପରିଚିତ  । 
ଅରୁଣାଚଳ ପ୍ରଦେଶ ମୁଖ୍ୟମନ୍ତ୍ରୀ ପ୍ରେମା ଖାଣ୍ଡୁ ଏହି ଡ୍ୟାମକୁ ଭାରତ ପାଇଁ ବଡ଼ ବିପଦ ବୋଲି କହିଛନ୍ତି । ସେ କହିଛନ୍ତି କି, ଯଦି କେବେ ଚୀନ ଅଚାନକ ଏହି ଡ୍ୟାମରୁ ପାଣି ଛାଡେ ତେବେ ପୂରା ସିୟାଙ୍ଗ କ୍ଷେତ୍ର ପାଣିରେ ବୁଡ଼ିଯିବ । ଏହି ଡ୍ୟାମ୍ ନୁହେଁ ବରଂ ଏକ ୱାଟର ବମ୍ ବୋଲି କହିଛନ୍ତି ପ୍ରେମା ଖାଣ୍ଡୁ । ସେ ଆହୁରି ଚିନ୍ତା ପ୍ରକଟ କରିଛନ୍ତି କି, ଏହି ଡ୍ୟାମ ନିର୍ମାଣ ହେବା ଫଳରେ ଆଗାମୀ ଦିନରେ ବ୍ରହ୍ମପୁତ୍ର ଓ ସିୟାଙ୍ଗ ନଦୀର ଜଳସ୍ତର କମିଯିବ । ଏହା ସ୍ଥାନୀୟ ଲୋକଙ୍କ ଜୀବନ ଜୀବିକା ଉପରେ ଗମ୍ଭୀର ପ୍ରଭାବ ପକାଇବ । 

Advertisment

ସେପଟେ କିଛି ବିଶେଷଜ୍ଞଙ୍କ ମତ ହେଉଛି ଏହି ଡ୍ୟାମ୍ ଏକ ଭୂକମ୍ପ ସମ୍ବେଦନଶୀଳ ଅଞ୍ଚଳରେ ନିର୍ମାଣ ହେଉଛି । ଯଦି କେତେବେଳେ ଭୂସ୍ଖଳନ କିମ୍ବା ଭୂମିକମ୍ପ ଆସେ ତେବେ ଏହି ଡ୍ୟାମ୍ ଭାଙ୍ଗିଯିବ । ଫଳରେ ତଳିଆ ଅଞ୍ଚଳ ସର୍ବଧିକ କ୍ଷତି ସହିବ । ଏହାସହ ଏହା ସ୍ଥାନୀୟ ପରିବେଶ ସନ୍ତୁଳନକୁ ବି ବିଗାଡ଼ି ପାରେ । 

ଅନ୍ୟପଟେ ଏହି ପ୍ରସଙ୍ଗରେ ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱଶର୍ମା କିଛି ଅଲଗା କଥା କହିଛନ୍ତି । ସେ କହିଛନ୍ତି କି, ବ୍ରହ୍ମପୁତ୍ର ନଦୀ ଏକ ବିଶାଳ ନଦୀ । ଏହା କେବଳ ତିବ୍ୱତ ନୁହେଁ ବରଂ ଭୂଟାନ, ଅରୁଣାଚଳ ଓ ଆସାମର ବର୍ଷା ପାଣିରେ ଭରିଯାଏ । ଯଦି ଚୀନ ପାଣି ଅଟକାଇଦିଏ ତେବେ ଏହା ଆସାମରେ ବାରମ୍ବାର ଆସୁଥିବା ବନ୍ୟାକୁ ରୋକି ପାରିବ । ଏହାସହ ସେ କହିଛନ୍ତି କି, ଏହି ପ୍ରସଙ୍ଗରେ କେନ୍ଦ୍ର ସରକାର ଚୀନ ସହ ଆଲୋଚନା କରିବା ନିହାତି ଜରୁରି । 

ଭାରତ ସରକାର ଚୀନର ଏହି ଡ୍ୟାମ୍ ନିର୍ମାଣକୁ ନେଇ କୌଣସି ଔପଚାରିକ ବୟାନ ଦେଇନାହାଁନ୍ତି । ହେଲେ ସରକାର କହିଛନ୍ତି କି, ଏଡି ଯୋଜନା ଉପରେ ତୀକ୍ଷ୍ଣ ନଜର ରଖାଯାଇଛି ଓ ଚୀନ ସହ ଏନେଇ ଆଲୋଚନା ହୋଇଛି । ଭାରତର ବିଦେଶ ମନ୍ତ୍ରଣାଳୟ କହିଛି କି, ଚୀନକୁ ଏଭଳି କାମରେ ପାରଦର୍ଶିତା ରଖିବା ଦରକାର ଓ ବାଂଲାଦେଶ ଭଳି ବ୍ରହ୍ମପୁତ୍ର ତଳ ଭାଗରେ ଥିବା ଦେଶମାନଙ୍କ ସହ ଚୀନ ଆଲୋଚନା କରିବା ଦରକାର । 

ଏହି ପ୍ରସଙ୍ଗରେ ଚୀନ କହିଛି, ଏହି ପରିଯୋଜନା ପୁରା ଚୀନର ସଂପ୍ରଭୂତା କ୍ରମରେ କରାଯାଉଛି । ଏହାସହ ଚୀନ ଭାରତ ଓ ବାଂଲାଦେଶ ସହ ବନ୍ୟା ନିୟ୍ନ୍ତ୍ରଣ ଓ ଜଳସ୍ତର ନେଇ ସହଯୋଗ ଜାରି ରହିବ । 

ଭାରତ ବି ଏଭଳି ସ୍ଥିତିରୁ ମୁକୁଳିବା ପାଇଁ କିଛି ରଣନୀତି ପ୍ରସ୍ତୁତ କରିଛି । ଅରୁଣାଚଳ ପ୍ରଦେଶ ଦେଇ ପ୍ରବାହିତ ହେଉଥିବା ସିୟାଙ୍ଗ ନଦୀର ଉପରମୁଣ୍ଡରେ ସିୟାଙ୍ଗ ପରିଯୋଜନା ନାମରେ ଏକ ଡ୍ୟାମ୍ ନିର୍ମାଣ କରିବାକୁ ଯୋଜନା କରିଛି । ଏହି ଡ୍ୟାମ୍ କେବଳ ବିଜୁଳି ଉତ୍ପାଦନ କରିବ ନାହିଁ ବରଂ ଯଦି ଚୀନ ପାଣି ଛାଡିଦିଏ କିମ୍ବା ବନ୍ଦ କରିଦିଏ ତେବେ ଏହି ବନ୍ଧ ସୁରକ୍ଷା କବଚ ହେବ । ହେଲେ ଭାରତ ସରକାରଙ୍କ ଏହି ପରିଯୋଜନାକୁ ସ୍ଥାନୀୟ ଲୋକ ବିରୋଧ କରୁଛନ୍ତି ।