ନାଗାବଳୀର ନାଲି ଆଖି ; ଭୟଭୀତ ୭୧ଖଣ୍ଡ ଗ୍ରାମବାସୀ

କନକ ବ୍ୟୁରୋ : ଉପରମୁଣ୍ଡରେ ଲଗାଣ ବର୍ଷା ଯୋଗୁଁ ରାୟଗଡ଼ା ନାଗାବଳୀ ନଦୀର ଜଳସ୍ତର ବଢ଼ୁଛି । ନଈର ରୂପ ଦେଖିଲେ ଲାଗୁଛି କେତେବେଳେ ଗାଁକୁ ବି ଗିଳିଦେବ । ନଦୀ ଅବବାହିକାରେ ଥିବା ଜିଲ୍ଲାର ୭୧ ଖଣ୍ଡ ଗାଁରେ ଏବେ ବିପଦ ଦେଖାଦେଇଛି । ମାଟି ଅତଡ଼ା ଖସି ନଦୀ ଗାଁ ମୁହାଁ ହେବାରେ ଲାଗିଛି । ଫଳରେ ଅନେକ ଚାଷ ଜମି ନଷ୍ଟ ହେବା ସହ ଲୋକେ ଭୟରେ ରାତ୍ରିଯାପନ କରୁଛନ୍ତି । ଚାଷ ଜମି ନଦୀ ଗର୍ଭରେ ଲୀନ ହୋଇଯାଇଛି । ଜମି ଗଲାଣି, କେତେବେଳେ ଗାଁ ବି ବୁଡ଼ିଯିବ ତା’ କହିହେବନି । ଭୟଭୀତ ହୋଇ ସ୍ଥାନୀୟ ଲୋକ କାମ ଧନ୍ଦା ଛାଡ଼ି ନଦୀ ପାଖରେ ଜଗି ବସୁଛନ୍ତି । 

ଗାଁ ଲୋକଙ୍କ ବହୁ ଦାବି ପରେ ଜଳସେଚନ ବିଭାଗ ପକ୍ଷରୁ ଆଡ଼ିବନ୍ଧ ନିର୍ମାଣ ହେଉଛି, ହେଲେ ତାହା ଏଯାଏଁ ସରିନି । ଅର୍ଦ୍ଧନିର୍ମିତ କାମ ପାଇଁ ମାଟି ଅତଡ଼ା ଖସିବା ସହ ପଥର ମଧ୍ୟ ଖସିବାରେ ଲାଗିଛି। ଅନ୍ୟପଟେ ଜଳସେଚନ ବିଭାଗ ପକ୍ଷରୁ ପ୍ରାୟ ୧୦ କୋଟି ବ୍ୟୟରେ ପଥର ପ୍ୟାକିଂ କରାଯାଉଥିଲେ ମଧ୍ୟ କୌଣସି ଫଳ ଶୂନ। ଫଳରେ ନାଗାବଳୀ ଅବବାହିକାରେ ଥିବା କଲ୍ୟାଣସିଂହପୁର ବ୍ଲକର ୪୫ ଖଣ୍ଡ ଗାଁ, କୋଲନରାର ୪ଟି ଗାଁ ଓ ରାୟଗଡ଼ାର ୨୨ ଖଣ୍ଡ ଗାଁ ବିପଦପୂର୍ଣ୍ଣ ଅବସ୍ଥାରେ ରହିଛି। ବେଲକଣା, ତଳସଜ୍ଜା, ରେବତିଗୁଡ଼ା, ରାୟଗଡ଼ାରେ ନଦୀ ଗତିପଥ ବଦଳାଇଛି। ଅନ୍ୟପଟେ ଗାଁକୁ ଯାଇ ସ୍ଥିତି ଅନୁଧ୍ୟାନ କରିବା ସହ ବିକଳ୍ପ ବ୍ୟବସ୍ଥା ଗ୍ରହଣ କରାଯିବ ବୋଲି ପ୍ରତିଶ୍ରୁତି ଦେଇଛନ୍ତି ରାୟଗଡ଼ା ଉପଜିଲ୍ଲାପାଳ । ୨୦୧୭ ବନ୍ୟା ପରେ ସଙ୍କଟ ଘନେଇ ଆସୁଛି । ବିଭିନ୍ନ ସ୍ଥାନରେ ନଦୀଗର୍ଭ ପୋତି ହୋଇଯାଇଛି । ସାମାନ୍ୟ ବର୍ଷାରେ ବନ୍ୟା ପରିସ୍ଥିତି ସୃଷ୍ଟି ହେଉଛି । ସରକାର ତୁରନ୍ତ ଏଦିଗରେ ଉଚିତ ପଦକ୍ଷେପ ଗ୍ରହଣ କରିବାକୁ ଦାବି ହୋଇଛି