କନକ ବ୍ୟୁରୋ : ଲଦାଖର ଗଲୱାନର ଚାରବାଗ ଅଞ୍ଚଳରେ ଏକ ବଡ଼ଧରଣର ଦୁର୍ଘଟଣା ଘଟିଛି । ସେନାର ଏକ ଗାଡ଼ି ଉପରେ ପଥର ଖସି ପଡ଼ିଛି । ଫଳରେ ଗାଡ଼ିଟି କ୍ଷତିଗ୍ରସ୍ତ ହୋଇଛି । ଗାଡ଼ିରେ ଥିବା ଦୁଇ ଜଣ ଅଧିକାରୀ ସହିଦ ହୋଇଥିବା ବେଳେ ୩ ଅଧିକାରୀ ଗୁରୁତର ଭାବେ ଆହତ ହୋଇଛନ୍ତି । ଆହତମାନଙ୍କୁ ଏୟାରଲିଫ୍ଟ କରାଯାଇଛି । ଆହତମାନଙ୍କ ମଧ୍ୟରେ ୨ ଜଣ ମେଜର ଏବଂ ଜଣେ କ୍ୟାପଟେନ୍ ଅଛନ୍ତି । ତେବେ ଯବାନମାନଙ୍କ ଗାଡ଼ି ଦୁରବୁକରୁ ଚୋଙ୍ଗଟାସ ଟ୍ରେନିଂ ପାଇଁ ଯାଉଥିଲା । 

Advertisment

ବୁଧବାର ସକାଳ ପ୍ରାୟ ୧୧:୩୦ ସମୟରେ ଏହି ଦୁର୍ଘଟଣା ଘଟିଥିଲା ଯେତେବେଳେ ଦୁରବୁକରୁ ଚୋଙ୍ଗଟାଶ ଯାଉଥିବା ଏକ ସାମରିକ ଗାଡ଼ି ଭୂସ୍ଖଳନର ଶିକାର ହୋଇଥିଲା । ଏଥିରେ ୧୪ ସିନ୍ଧ ହର୍ସର ଲେଫ୍ଟନାଣ୍ଟ କର୍ଣ୍ଣେଲ ମନକୋଟିଆ ଏବଂ ଦଲଜିତ ସିଂ ସହିଦ ହୋଇଛନ୍ତି । ଅନ୍ୟପଟେ ମେଜର ମୟଙ୍କ ଶୁଭମ (୧୪ ସିନ୍ଧ ହର୍ସ), ମେଜର ଅମିତ ଦୀକ୍ଷିତ ଏବଂ କ୍ୟାପଟେନ୍ ଗୌରବ (୬୦ ଆର୍ମଡ) ଆହତ ହୋଇଛନ୍ତି । ଆହତ ଯବାନମାନଙ୍କୁ ୧୫୩ ଜିଏଚ, ଲେହ ନିଆଯାଇଛି । ଏହି ଦୁର୍ଘଟଣାକୁ ନେଇ ଭାରତୀୟ ସେନାର ଫାୟାର ଏଣ୍ଡ ଫ୍ୟୁରି କର୍ପସ ସୂଚନା ଦେଇଛି ଯେ ୩୦ ଜୁଲାଇରେ ପ୍ରାୟ ୧୧:୩୦ ସମୟରେ ଲଦାଖରେ ଏକ ସାମରିକ କାଫିଲାର ଗାଡ଼ି ଉପରେ ପାହାଡ଼ରୁ ଏକ ପଥର ଖସି ପଡ଼ିଥିଲା । ଯାହାର ଉଦ୍ଧାର କାର୍ଯ୍ୟ ଜାରି ରହିଛି । ଏ ହେଉଛି ଚଳିତ ମାସରେ ସାମରିକ ଗାଡ଼ି ସହ ଘଟିଥିବା ସବୁଠାରୁ ବଡ଼ ଦୁର୍ଘଟଣା । ଏହା ପୂର୍ବରୁ ଚଳିତ ବର୍ଷ ମେ ମାସରେ ଜମ୍ମୁ-କାଶ୍ମୀରର ରାମବନ ଜିଲ୍ଲାରେ ସେନାର ଏକ ଗାଡ଼ି ଦୁର୍ଘଟଣାର ଶିକାର ହୋଇଥିଲା । ଏହି ଦୁର୍ଘଟଣା ଜିଲ୍ଲାରେ ବ୍ୟାଟେରୀ ଚଷମା ନିକଟରେ ଘଟିଥିଲା ଯେଉଁଠାରେ ସେନାର ଟ୍ରକଟି ୨୦୦-୩୦୦ ମିଟର ଗଭୀର ଖାଇକୁ ଖସି ପଡ଼ିଥିଲା । ଦୁର୍ଘଟଣାରେ ୩ ଜଣ ଯବାନ ସହିଦ ହୋଇଥିଲେ ।