କନକ ବ୍ୟୁରୋ: ନିକଟରେ କନକ ନ୍ୟୁଜର ଏକ ଇଣ୍ଟରଭ୍ୟୁରେ ମନର କ୍ଷୋଭକୁ ପ୍ରକାଶ କରିଥିଲେ ଓଡ଼ିଆ ମାଟିର ସିଙ୍ଗର କ୍ରିଷ୍ଣା ବେଉରା, ଯିଏ ତାଙ୍କ ଭିନ୍ନ ସ୍ବର ପାଇଁ ବେଶ୍ ପରିଚିତ । ଓଲିଉଡକୁ ଅନେକ ସୁପରହିଟ୍ ଗୀତ ସେ ଭେଟି ଦେଇଛନ୍ତି । ’ତୁମ କଥା ମନେ ପଡ଼େ’, ’ନିଝୁମ ରାତିର ସହରରେ ’, ଆଜି ମଙ୍ଗନ କାଲି ତୋ ବାହାଘର’, ’ଯଦି ତମ କଥା ମନେପଡ଼େ’, ’ମା’ ଖୋଜେ ମମତା’, ’ପ୍ରେମ ଆସେ ଥରେ ଜୀବନରେ’, ’ଲାଗେ ଏକା ଏକା’, ’ ସମୟର ଖେଳ, ’ ମୁଁ ଓଡ଼ିଆ ପୁଅ’ ପରି ଗୀତ ସମସ୍ତଙ୍କ ମନ ଛୁଇଁଥିଲା । 

Advertisment

ବଲିଉଡରେ ’ ଦିଲ କାଞ୍ଚ କାଞ୍ଚ’, ’ମୌଲା ମେରେ’ , ’ମେରା ଇନ୍ତକାମ ଦେଖେଗି’ , ’କୈସେ ଜୀଉଁ ତେରେ ବିନ୍’, ’ତୁ ହୈ ରବ୍ ମେରା’, ’ଉଡ଼ି ଉଡ଼ି ’, ’ଶାହକା ରୁତବା…’,  ପରି ଅନେକ ସୁପର ହିଟ୍ ମଧ୍ୟ ଗାଇଛନ୍ତି । ତାଙ୍କୁ ଭଏସ୍ ଟିମ୍ବର ସବୁଠୁ ଭିନ୍ନ ହୋଇଥିବାରୁ ସେ ବାରି ହୋଇପଡ଼ନ୍ତି  । କିନ୍ତୁ ଅବଶୋଷ,  ଓଲିଉଡରେ ତାଙ୍କୁ ଅନେକ ବର୍ଷ ଧରି ଅଣଦେଖା କରାଗଲା । କୌଣସି କାମ ମିଳିଲାନି । ଏହାକୁ ନେଇ ଗଣମାଧ୍ୟମରେ ଅସନ୍ତୋଷ ପ୍ରକାଶ କଲେ କ୍ରିଷ୍ଣା । କହିଲେ , ଓଲିଉଡରେ କ’ଣ ଶହେ ଗୀତରୁ ତାକ ପାଇଁ  ଦୁଇଟି ଗୀତ ପାଇଁ ବି ସ୍ଥାନ ନାହିଁ? ବାହାରୁ ସିଙ୍ଗର ଆଣି ଏଠି ସୁଯୋଗ ଦିଆଯାଉନି । କିନ୍ତୁ ତାଙ୍କୁ ଅଣଦେଖା କରାଯାଉଛି । ସବୁଠି ନେପୋଟିଜିମ୍ କମ୍ ଚେପୋଟିମ୍ ବେଶି ଚାଲିଛି । ଏ ଇଣ୍ଡଷ୍ଟ୍ରିରେ ଯିଏ ଯେତେ ଯାହାର ଗୋଡ଼ାଣିଆ ହେବ ତାକୁ ସେତେ କାମ ମିଳିବ  । ମୁଁ ବଲିଉଡରେ ଯାହା ପ୍ରାପ୍ୟ ନିଏ ଓଡ଼ିଶାରେ ଗାଇଲେ ସେଥିରେ ଲାଭ ଦେଖେନି  । ତଥାପି ମୋତେ ଅଣଦେଖା କରାଯାଉଛି’ ।

ଏଭଳି ଅସନ୍ତୋଷ ପ୍ରକାଶ କରିବା ପରେ ବୋଧହୁଏ କ୍ରିଷ୍ଣାଙ୍କ ଅଭିମାନକୁ ବୁଝିପାରିଛି ଓଲିଉଡ୍ ଇଣ୍ଡଷ୍ଟ୍ରି । ପୁଣି ତାଙ୍କୁ ମିଳିଛି ସୁଯୋଗ । ଆଗକୁ ରିଲିଜ୍ ହେବାକୁ ଥିବା ’ମୋ ବାପା ମା’ ମୋ ଚାରି ଧାମ୍’ରେ ତାଙ୍କୁ ପୁଣି ମିଳିଛି ସୁଯୋଗ । ହିମାଦ୍ରି ତନୟା ଦାସଙ୍କ ପ୍ରଯୋଜନା, ତାପସ ସରଗରିଆଙ୍କ ନିର୍ଦ୍ଦେଶନାରେ ନିର୍ମିତ ଏହି ସିନେମାରେ ଅରୁଣ ମନ୍ତ୍ରୀଙ୍କ  ଲେଖାକୁ ସଙ୍ଗୀତରେ ସଜେଇଛନ୍ତି ବିମୁଗ୍ଧ ଦାସ । ଯାହାକୁ କଣ୍ଠ ଦେଇଛନ୍ତି କ୍ରିଷ୍ଣା ବେଉରା ।କ୍ରିଷ୍ଣାଙ୍କ କଣ୍ଠରେ ଫିଲ୍ମର ଟାଇଟଲ ସଙ୍ଗକୁ ଦର୍ଶକ ଓ ଶ୍ରୋତା ଖୁବକ୍ ପସନ୍ଦ କରିବେ ବୋଲି ଫିଲ୍ମ କ୍ରୁ ମେମ୍ବର୍ସ ବେଶ୍ ଆଶାବାଦୀ ଅଛନ୍ତି ।