ନିରବ ପ୍ରତିବାଦ , ସାଧୁ-ସନ୍ଥ ଓ ନେତାଙ୍କ ଦ୍ବାରା ବିରୋଧ ପ୍ରଦର୍ଶନ … ହାତୀ ମାଧୁରୀ ପାଇଁ ଅମ୍ବାନୀଙ୍କ ସହ ମୁହାଁମୁହିଁ ହେବାକୁ ପ୍ରସ୍ତୁତ ହେଉଛନ୍ତି ଲୋକ

କନକ ବ୍ୟୁରୋ : ମହାରାଷ୍ଟ୍ରର କୋଲ୍ହାପୁରରେ ହାତୀ ମହାଦେବୀ ଯାହାକୁ ମାଧୁରୀ ନାମରେ ମଧ୍ୟ ଜଣାଯାଏ ଗୁଜରାଟର ଜାମନଗରରେ ଥିବା ୱାଇଲ୍ଡ ଲାଇଫ୍ ରିହାବିଲିଟେସନ୍ ସେଣ୍ଟର ବନତାରାକୁ ଫେରାଇ ଆଣିବା ଦାବିରେ ୪୫ କିଲୋମିଟରର ଏକ ମୌନ ପଦଯାତ୍ରା କରାଯାଇଥିଲା । ଏହି ପଦଯାତ୍ରାରେ ହଜାର ହଜାର ଲୋକ ସାମିଲ ହୋଇଥିଲେ । କହିରଖୁଛୁ ଯେ ବନତାରା ଉଦ୍ୟୋଗପତି ମୁକେଶ ଅମ୍ବାନୀଙ୍କ ପୁଅ ଅନନ୍ତ ଅମ୍ବାନୀଙ୍କ ଚିନ୍ତାଧାରାର ରୂପ ଏବଂ ଏହାକୁ ରିଲାଏନ୍ସ ଇଣ୍ଡଷ୍ଟ୍ରିଜ୍ ଲିମିଟେଡ୍ ଓ ରିଲାଏନ୍ସ ଫାଉଣ୍ଡେସନ୍ ଫଣ୍ଡ୍ କରନ୍ତି । ସ୍ୱାଭିମାନୀ ଶେତକାରୀ ସଙ୍ଗଠନର ଅଧ୍ୟକ୍ଷ ଏବଂ ହାତକଣଙ୍ଗଲେର ପୂର୍ବ ସାଂସଦ ରାଜୁ ସେଟ୍ଟୀଙ୍କ ନେତୃତ୍ୱରେ ନାନ୍ଦଣୀ ମଠରୁ ଆରମ୍ଭ ହୋଇଥିବା ଏହି ପଦଯାତ୍ରାରେ ମହିଳା, ଯୁବକ, ଜୈନ ସମ୍ପ୍ରଦାୟର ଲୋକ, ଧାର୍ମିକ ସନ୍ଥ ଏବଂ ସ୍ଥାନୀୟ ନାଗରିକ ବହୁ ସଂଖ୍ୟାରେ ସାମିଲ ହୋଇଥିଲେ । ପ୍ରଦର୍ଶନକାରୀ 'ମାଧୁରୀ ଫେରାଅ' ଏବଂ 'ଜିଓ ବଏକଟ୍' ଲେଖାଥିବା ଟୋପି ପିନ୍ଧିଥିଲେ । ଲୋକମାନେ ହାତୀର ମୂର୍ତ୍ତି ଏବଂ ବ୍ୟାନର ନେଇ ମହାଦେବୀ ହାତୀ ଉପରେ ନିଜର ଆସ୍ଥା ପ୍ରକଟ କରିଥିଲେ । ପଦଯାତ୍ରା ଭୋରରୁ ଆରମ୍ଭ ହୋଇ ସନ୍ଧ୍ୟାରେ କୋଲ୍ହାପୁର ଜିଲ୍ଲା କଲେକ୍ଟରେଟରେ ଶେଷ ହୋଇଥିଲା ।

ନାନ୍ଦଣୀରେ ଥିବା ଜୈନ ମଠରେ ୩୪ ବର୍ଷ ଧରି ରହୁଥିବା ମହାଦେବୀ ହାତୀଙ୍କୁ ହାଇକୋର୍ଟଙ୍କ ଆଦେଶ ଅନୁସାରେ ନିକଟରେ ଗୁଜରାଟରେ ଥିବା ବନ୍ୟଜୀବ ପୁନର୍ବାସ କେନ୍ଦ୍ର ବନତାରାକୁ ପଠାଯାଇଛି । ଏହି ନିଷ୍ପତ୍ତିରେ କୋଲ୍ହାପୁରର ନାଗରିକଙ୍କ ମଧ୍ୟରେ ଗଭୀର ଅସନ୍ତୋଷ ରହିଛି । ଗତ ଏକ ସପ୍ତାହ ଧରି ଲଗାତାର ବିରୋଧ ପ୍ରଦର୍ଶନ ଏବଂ ବୈଠକ କରାଯାଉଥିଲା ଏବଂ ଗତ ରବିବାରର ପଦଯାତ୍ରା ଏହି ଆନ୍ଦୋଳନର ଏକ ଅଂଶ ଥିଲା । ସାଙ୍ଗଲୀ- କୋଲ୍ହାପୁର ରୋଡ୍, ଶିରୋଲୀ ଫାଟା, ତାୱଡେ ହୋଟେଲ, ତାରାରାନୀ ଚୌକ, ଦାଭୋଲକର କର୍ଣ୍ଣର, ଷ୍ଟେସନ ରୋଡ୍ ଦେଇ ପଦଯାତ୍ରା କଲେକ୍ଟର କାର୍ଯ୍ୟାଳୟରେ ପହଞ୍ଚିଥିଲା । ଏହି ସମୟରେ ଅନେକ ସ୍ଥାନରେ ଭାରି ଟ୍ରାଫିକ ଜାମ୍ ଲାଗି ରହିଥିଲା । ପୁଲିସ ଦ୍ୱାରା ବିକଳ୍ପ ମାର୍ଗରେ ଟ୍ରାଫିକ ଡାଇଭର୍ଟ କରାଯିବା ସତ୍ତ୍ୱେ ଶିରୋଲୀ ଫାଟା, ରୁଇକର କଲୋନୀ ଚୌକ ଏବଂ ଅନ୍ୟ କ୍ଷେତ୍ରରେ ଗାଡ଼ିର ଲମ୍ବା ଧାଡ଼ି ଲାଗିଥିଲା । ରାଜୁ ସେଟ୍ଟୀଙ୍କ ନେତୃତ୍ୱରେ ପ୍ରଦର୍ଶନକାରୀ ଅତିରିକ୍ତ ଜିଲ୍ଲା କଲେକ୍ଟର ସଞ୍ଜୟ ସିନ୍ଦେ ଏବଂ ନିବାସୀ ଜିଲ୍ଲା କଲେକ୍ଟର ସଞ୍ଜୟ ତେଲୀଙ୍କୁ ହାତୀ ମହାଦେବୀକୁ ବନତାରାରୁ ଫେରାଇ ଆଣିବା ଦାବି ସମ୍ବଳିତ ଏକ ସ୍ମାରକପତ୍ର ପ୍ରଦାନ କରିଥିଲେ ।

ଏହି ପଦଯାତ୍ରାରେ କୋଲ୍ହାପୁରର ଲକ୍ଷ୍ମୀସେନ ଭଟ୍ଟାରକ ମହାରାଜ, ରାମନାଥ ଗିରି ମଠର ଭଗବାନଗିରି ମହାରାଜ, ଆଦି ମଠର ମଣିରଞ୍ଜନ ପ୍ରଣବସ୍ୱରୂପୀ ଗୁରୁ, ଶ୍ରବଣବେଲଗୋଲ ମଠର ଚାରୁକୀର୍ତ୍ତି ସ୍ୱାମୀଜୀ, ସାଂସଦ ବିଶାଳ ପାଟିଲ, ବିଧାୟକ ବିଶ୍ୱଜିତ କଦମ, ବେଲଗାମ ବିଧାୟକ ଅଭୟ ପାଟିଲ, ପୂର୍ବ ବିଧାୟକ ଉଲ୍ହାସ ପାଟିଲ, ସଞ୍ଜୟ ପାଟିଲ, ସାଂସଦ ଧୈର୍ଯ୍ୟଶୀଳ ମାନେ, ବିଧାୟକ ରାହୁଲ ଆୱଡେ, ପୂର୍ବ ବିଧାୟକ ପ୍ରକାଶ ଆୱଡେ, ମହିଳା ଏବଂ ବହୁ ସଂଖ୍ୟାରେ ସାଧାରଣ ଲୋକ ସାମିଲ ହୋଇଥିଲେ ।