କେଉଁମାନଙ୍କୁ ମିଳିବନି ସୁଭଦ୍ରା କାର୍ଡ ?

କନକ ବ୍ୟୁରୋ: ସୁଭଦ୍ରା ଯୋଜନା ନେଇ ଆସିଲା ଗାଇଡଲାଇନ୍ । ଯୋଜନାରେ ଯୋଗ୍ୟ ହିତାଧିକାରୀଙ୍କୁ ମିଳିବ ସୁଭଦ୍ରା ଯୋଜନାର କାର୍ଡ । ଯୋଜନାର ଲାଭ ପାଇବା ପାଇଁ ହେଲେ ହିତାଧିକାରୀ ଓଡ଼ିଶାର ହୋଇଥିବା ଆବଶ୍ୟକ । ଏଥିସହ ସେମାନଙ୍କ ଆଧାରକାର୍ଡ ଓ ମୋବାଲ ନମ୍ବର ଲିଙ୍କ ହେବା ମଧ୍ୟ ବାଧ୍ୟତାମୂଳକ । ଆବେଦନକାରୀଙ୍କ ବୟସ ୨୧ରୁ ୬୦ ବର୍ଷ ମଧ୍ୟରେ ହୋଇଥିବା ନେଇ ଗାଇଡଲାଇନରେ ସ୍ପଷ୍ଟ ଉଲ୍ଲେଖ କରାଯାଇଥିବା ବେଳେ କେଉଁମାନଙ୍କୁ ଯୋଜନାର ଲାଭ ମିଳିବନି ସେନେଇ ବି ଅଯୋଗ୍ୟତାର ମାନଦଣ୍ଡ ପ୍ରକାଶ କରିଛନ୍ତି ସରକାର ।

ଅଯୋଗ୍ୟ ନେଇ ଅନେକ ମାନଦଣ୍ଡ ରହିଥିବା ବେଳେ ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ୪ ଚକିଆ ଥିଲେ ମିଳିବନି ସୁଭଦ୍ରା ସହାୟତା । ଘରେ ଯଦି ଟ୍ରାକ୍ଟର କିମ୍ବା ମିନି ଟ୍ରକ ଥାଏ କିମ୍ବା କୌଣସି ଛୋଟ ବାଣିଜ୍ୟିକ ଯାନ ଅବା ଅନ୍ୟ ୪ ଚକିଆ ଯାନ ରହିଥାଏ ତେବେ ଏହି ସୁଭଦ୍ରା ସୁବିଧା ଉପଲବ୍ଧ ହେବନି । ତେବେ ନଜର ପକାନ୍ତୁ କେଉଁମାନେ ସୁଭଦ୍ରା ଯୋଜନାର ଲାଭ ପାଇବାକୁ ଅଯୋଗ୍ୟ ?

୧ ଜୁଲାଇ, ୨୦୨୪ ସୁଦ୍ଧା ୨୧ ବର୍ଷରୁ କମ୍ ଏବଂ ୬୦ ବର୍ଷରୁ ଅଧିକ କୌଣସି ମହିଳା ୨୦୨୪-୨୫ ଆର୍ଥିକ ବର୍ଷ ପାଇଁ ଯୋଗ୍ୟ ହେବେ ନାହିଁ
ଯେକୌଣସି ମହିଳା ମାସକୁ ମୋଟ ୧୫୦୦ ଟଙ୍କା କିମ୍ବା ତାଠାରୁ ଅଧିକ କିମ୍ବା ବାର୍ଷିକ ମୋଟ ୧୮,୦୦୦ ଟଙ୍କା ବା ତାଠାରୁ ଅଧିକ କୌଣସି ରାଜ୍ୟ କିମ୍ବା କେନ୍ଦ୍ର ସରକାରୀ ଯୋଜନା ଯଥା- ପେନସନ, ଛାତ୍ରବୃତ୍ତି ଇତ୍ୟାଦି ସହାୟତା ଗ୍ରହଣ କରୁଛନ୍ତି ତେବେ ସେମାନେ ଯୋଗ୍ୟ ବିବେଚିତ ହେବେ ନାହିଁ
ଜଣେ ମହିଳା ନିଜେ କିମ୍ବା ତାଙ୍କ ପରିବାର ସଦସ୍ୟ ଯଦି, ବର୍ତ୍ତମାନର କିମ୍ବା ପୂର୍ବତନ ସାଂସଦ କିମ୍ବା ବିଧାନସଭା ସଦସ୍ୟ ହୋଇଥିବେ ତାହାଲେ ମିଳିବନି
ଆୟକର ଦେୟ ହେଉଥିଲେ ଅଯୋଗ୍ୟ ବିବେଚିତ ହେବେ
ସରକାରୀ ଚାକିରିଆ ହୋଇଥିଲେ ମିଳିବନି ସୁଭଦ୍ରା ସୁବିଧା