କନକ ବ୍ୟୁରୋ :  କ୍ରିକେଟରେ ସେ ହେଉଛନ୍ତି ଅନେକ ଖେଳାଳୀଙ୍କର ଆଦର୍ଶ । ଫ୍ୟାନ୍ସ ତାଙ୍କର ଖାଲି ଭାରତରେ ନୁହଁନ୍ତି ବରଂ ବିଶ୍ବର ଯେଉଁ ଜାଗାରେ କ୍ରିକେଟ ଖେଳ ହୁଏ ସେଠି ଥାନ୍ତି ।   ଆଜି ହେଉଛି କ୍ରିକେଟ ଦୁନିଆର କିଙ୍ଗ କୁହାଯାଉଥିବା ବିରାଟଙ୍କ ଜନ୍ମ ଦିନ । ୩୬ବର୍ଷରେ ପଂହଚିଛନ୍ତି ବିରାଟ । କ୍ରିକେଟ ଜଗତରେ ନିଜର ଏକ ସ୍ବତନ୍ତ୍ର ପରିଚୟ ଖୁବ କମ ଦିନରେ ପାଇଥିଲେ ବିରାଟ । ଖାସ କରି ଫିଲ୍ଡରେ ଆଗ୍ରେସିଭ ଓ ମଜାଳିଆ ଢଙ୍ଗରେ ନଜର ଆସିଥାନ୍ତି ବିରାଟ ଯାହା ଫ୍ୟାନ୍ସ ମାନଙ୍କୁ ପସନ୍ଦ ଆସିଥାଏ । ଭାରତକୁ ଅନେକ ମ୍ୟାଚ ବିରାଟ ଏକାକୀ ନିଜ ବଳରେ ଜିତାଇଛନ୍ତି ତ ପୁଣି କେତେବେଳେ ସାଥୀ ଖେଳାଳୀଙ୍କ ପାଇଁ ପଡିଆ ମଧ୍ୟରେ ବିପକ୍ଷ ଦଳ ସହ ଲଢିଛନ୍ତି । ଖାସ କରି ଅଷ୍ଟ୍ରେଲିଆରେ ପାକିସ୍ତାନ ବିପକ୍ଷ ୨୦୨୨ଟି-ଟ୍ବେଂଟି ବିଶ୍ବକପରେ ବିରାଟ ଭାରତକୁ ବିଜୟୀ କରାଇଥିଲେ ଆଉ ଏହି ଇନିଙ୍ଗସକୁ ପ୍ରତ୍ୟେକ ଭାରତୀୟ କ୍ରିକେଟପ୍ରେମୀ ମାନେ ମନେରଖିଥିବେ । ଚଳିତବର୍ଷ ଟି-୨୦ବିଶ୍ବକପରେ ଭାରତ ଚାମ୍ପିୟନ ପରେ ଟି-୨୦ ଫରମାର୍ଟରୁ ବିଦାୟ ନେଇଥିଲେ ବିରାଟ ।