ଧାମରାରେ ରାଜା ରାଜୁଡ଼ା ଶାସନ ଭଳି ଜୁଲମ: ରାଜାଙ୍କ ଗୁମାସ୍ତା କହି ଚାଷୀଙ୍କୁ ହତ୍ୟା

କନକ ବ୍ୟୁରୋ: ରାଜାଙ୍କ ଗୁମାସ୍ତା କହି ଭାଗଚାଷୀଙ୍କୁ ମାରିଦେଲେ ।  ଭଦ୍ରକ ଜିଲ୍ଲା ଧାମରା ଅଂଚଳରୁ ଆସିଛି ଏଭଳି ଲୋମଟାଙ୍କୁରା ଘଟଣା ।  କାଲି ପ୍ରାୟ ୩ ଜଣ ଯୁବକ ଆସି ରାଜାଙ୍କ ଜମି କାହିଁକି ଚାଷ କରୁଛି କହି ଚାଷୀଙ୍କୁ ମରଣାନ୍ତକ ଆକ୍ରମଣ କରିଥିଲେ । ପରେ ତାଙ୍କର ମେଡିକାଲରେ ମୃତ୍ୟୁ ହୋଇଥିଲା । ପରେ ନ୍ୟାୟ ଦାବିରେ ପରିବାର ଲୋକେ ରାସ୍ତା ଅବରୋଧ କରିଛନ୍ତି ।

ଭଦ୍ରକ ଜିଲ୍ଲା ଧାମରା ଅଂଚଳରୁ ଆସିଛି ଏମିତି ଚାଂଚଲ୍ୟକର ଖବର। କନିକା ରାଜାଙ୍କ ଗୁମାସ୍ତା କହି  କିଛି ଲୋକ ଭଦ୍ରକ ଧାମରା ମେରାଇନ ଥାନା ଅନ୍ତର୍ଗତ ଜୟଦୁର୍ଗାପାଟଣା ଗାଁରେ ଭାଗଚାଷୀ ଅମର ମାଇତିଙ୍କୁ ବାଡେଇ ବାଡେଇ ମାରିଦେଇଥିବା ଅଭିଯୋଗ ହୋଇଛି ।  ଆଉ ଏତେ ବଡ ଘଟଣା ଘଟିଛି ଜମିକୁ ନେଇ । ଅଭିଯୋଗ ଅନୁସାରେ, କନିକା ରାଜ ପରିବାରର ଏକ ଜମିକୁ  ଦୀର୍ଘଦିନ ହେବ ଚାଷ କରୁଥିଲେ ଅମରଙ୍କ ପରିବାର । ସୋମବାର ସେ ଜମିରେ ମାଟି ପକାଉଥିବାବେଳେ ଧାମରା ଗାଁର କିଛି ଯୁବକ ତାଙ୍କ ଉପରେ  ଅତର୍କିତ ଆକ୍ରମଣ କରିଥିଲେ । ପରେ ମେଡିକାଲରେ ତାଙ୍କର ମୃତ୍ୟୁ ହୋଇଥିଲା ।  

କନିକା ରାଜାଙ୍କ ଗୁମସ୍ତା କହି କ୍ୟାମେରା ଆଗରେ ଧମକାଉଛନ୍ତି ଜଣେ ବ୍ୟକ୍ତି । ଦୀର୍ଘଦିନ ଧରି  ଅମର ମାଇତି କନିକା ରାଜାଙ୍କ ଜମିରେ ଚାଷ କରି ପରିବାର ପ୍ରତିପୋଷଣ କରୁଥିଲେ । ତେଣୁ ରାଜାଙ୍କ ଗୁମାସ୍ତା କହି ଏମିତି ତାଙ୍କୁ କେହି ମାରିଦେବ, ତାକୁ ସହଜରେ ଗ୍ରହଣ କରିପାରୁନାହାନ୍ତି ପରିବାର ଲୋକେ । ଅମରଙ୍କ ସାନଭାଇ ଧାମରା ମେରାଇନ ଥାନାରେ  ଲିଖିତ ଅଭିଯୋଗ କରିବା ସହ  ମୃତଦେହକୁ ରାସ୍ତା ଉପରେ ରଖି ଦୃଢ କାର୍ୟ୍ୟାନୁଷ୍ଠାନ ନେବାକୁ ଦାବି କରିଛନ୍ତି । ଘଟଣା ପରେ ଅଭିଯୁକ୍ତମାନେ ଘଟଣାସ୍ଥଳରୁ ଫେରାର ହୋଇଯାଇଛନ୍ତି । 

ଆକ୍ରମଣକାରୀମାନେ ଅମର ମାଇତିଙ୍କୁ ଆକ୍ରମଣ କରି ଲହୁଲୁହାଣ କରିବା ପରେ ତାଙ୍କ ଭାଇ, ସ୍ତ୍ରୀ ଓ ପୁଅକୁ ବି ଆକ୍ରମଣ କରିଛନ୍ତି । ମୋଟ ୩ ଜଣ ଆସି ଏଭଳି କାଣ୍ଡ କରିଥିଲେ । ପୁଲିସ ଏଫଆଇଆର ରଖିବାରେ ବିଳମ୍ବ କରିଥିବା ବି ଅଭିଯୋଗ ହୋଇଛି । ପ୍ରଶ୍ନ ଉଠୁଛି, କନିକା ରାଜାଙ୍କ ନାଁ କହି ଯୁବକ ଆଇନକୁ ହାତକୁ ନେବାକୁ କିଏ?  ଅଭିଯୁକ୍ତଙ୍କ ପଛରେ କିଏ? ଅଭିଯୁକ୍ତଙ୍କ ବିରୋଧରେ ହେବ କି ଦୃଢ଼ କାର୍ୟ୍ୟାନୁଷ୍ଠାନ?