ଖଲ୍ଲିକୋଟ୍‌ ଖାରପଲ୍ଲି ଟ୍ରିପଲ ମର୍ଡର ଘଟଣା; ଏବେ ବି ଗାଁ ପୁରୁଷଶୂନ୍ୟ, ଗାଁକୁ ଫେରିବାକୁ ଚାହୁଁଛନ୍ତି ମୃତକଙ୍କ ପରିବାର

କନକ ବ୍ୟୁରୋ : ଗଞ୍ଜାମ ଜିଲ୍ଲା ଖଲ୍ଲିକୋଟ୍‌ ଖାରପଲ୍ଲି ଗାଁରେ ଗୁଣି ଗାରେଡ଼ି ପାଇଁ ଟ୍ରିପଲ୍ ମର୍ଡର ଘଟଣାରେ ଗାଁରେ ଶାନ୍ତି ପ୍ରତିଷ୍ଠା ପାଇଁ ଉଦ୍ୟମ ଆରମ୍ଭ କରିଛି ପ୍ରଶାସନ । ଏଥିପାଇଁ ଏକ ଶାନ୍ତି କମିଟି ଗଠନ କରି ଗାଁ ଲୋକଙ୍କୁ ବୁଝାଇବାକୁ ଚେଷ୍ଟା କରାଯାଉଥିବା କହିଛନ୍ତି ଏସ୍‌ପି ।

ବର୍ବରତାର ସବୁ ସୀମା ଟପିଯାଇଥିଲା ଧରାକୋଟ ବ୍ଲକ ଖାରିପଲ୍ଲି ଗାଁ । ଗୁଣି ଗାରେଡ଼ିକୁ କେନ୍ଦ୍ର କରି ୨ ଗୋଷ୍ଠୀ ସଂଘର୍ଷରେ ଜୀବନ ହରାଇଥିଲେ ୩ ଜଣ । ଖଦାଳ ବେହେରା, ତାଙ୍କ ପୁଅ ରତ୍ନାକର ବେହେରା ଓ ରମେଶ ବେହେରାଙ୍କ ମୃତ୍ୟୁ ହୋଇଥିଲା । ସେହି ଘଟଣାରେ ୧୮ ଜଣଙ୍କୁ ଗିରଫ କରି ଜେଲ୍‌ ପଠାଇଦେଇଛି ପୁଲିସ୍‌ । ସେବେଠୁ ପୁରୁଷ ଶୂନ୍ୟ ପୂରା ଗାଁ ।

ଭୟରେ ଗାଁକୁ ଫେରିପାରୁନାହାନ୍ତି ହତ୍ୟାର ଶିକାର ଖଦାଳ ବେହେରାଙ୍କ ପରିବାର ଓ ସମ୍ପର୍କୀୟ । ନିଜ ଘରକୁ ଫେରିବା ପାଇଁ ଗଞ୍ଜାମ ଏସ୍‌ପିଙ୍କ ସମେତ ଜିଲ୍ଲାପାଳଙ୍କୁ ଲିଖିତ ଅନୁରୋଧ କରିଛନ୍ତି । ଗତ ୧୨ରେ ଧରାକୋଟ ତହସିଲରେ ଗାଁ ଲୋକ ଓ ମୃତକଙ୍କ ଅନ୍ୟ ପୁଅଙ୍କୁ ଡାକି ଶାନ୍ତି କମିଟି ଗଠନ ପାଇଁ ପ୍ରୟାସ କରୁଛି ପ୍ରଶାସନ । ଖୁବଶୀଘ୍ର ସମାଧାନ ହୋଇଯିବ ବୋଲି କହିଛନ୍ତି ଗଞ୍ଜାମ ଏସ୍‌ପି ।