ଓଟିଇଟି ପ୍ରଶ୍ନପତ୍ର କେଳେଙ୍କାରୀ  ଘଟଣା : ରିମାଣ୍ଡରେ ଆସିବେ ନିହାରଙ୍କ ସମେତ ୩ ଅଭିଯୁକ୍ତ

କନକବ୍ୟୁରୋ : ଓଟିଇଟି ପ୍ରଶ୍ନପତ୍ର କେଳେଙ୍କାରୀ  ଘଟଣାରେ ମାଧ୍ୟମିକ ଶିକ୍ଷା ପରିଷଦ(ବୋର୍ଡ)ର ଉପସଭାପତି ଡକ୍ଟର ନିହାର ରଞ୍ଜନ ମହାନ୍ତିଙ୍କ ସମେତ ତିନି ଜଣଙ୍କୁ ରିମାଣ୍ଡରେ ଆଣିବା ପ୍ରକ୍ରିୟା ଆରମ୍ଭ ହୋଇଛି ।  ୬ ଜିଲ୍ଲାରେ ଡକ୍ଟର ମହାନ୍ତିଙ୍କ ପରୋକ୍ଷ ସହଯୋଗରେ ପ୍ରଶ୍ନପତ୍ର ବିକ୍ରି ହୋଇଥିଲା । ତେବେ କେଉଁମାନଙ୍କ ନିକଟକୁ ଏହି ପ୍ରଶ୍ନପତ୍ର ଯାଇଛି , ସେ ନେଇ କ୍ରାଇମବ୍ରାଞ୍ଚ ରିମାଣ୍ଡରେ ଆଣି ଖୋଳତାଡ଼ ଆରମ୍ଭ କରିବାକୁ ଯାଉଛି । ଏମାନଙ୍କ ବ୍ୟାଙ୍କ ଆକାଉଣ୍ଟ ଯାଞ୍ଚ ପାଇଁ କ୍ରାଇମବ୍ରାଞ୍ଚ ପକ୍ଷରୁ ବ୍ୟାଙ୍କ କର୍ତ୍ତୃପକ୍ଷଙ୍କୁ ଚିଠି ଲେଖାଯାଇଛି ।

ଡକ୍ଟର ମହାନ୍ତିଙ୍କୁ ରବିବାର କ୍ରାଇମବ୍ରାଞ୍ଚ ଗିରଫ କରିବା ପରେ ପ୍ରଶ୍ନପତ୍ର ଲିକ୍ ପଛରେ ହୋଇଥିବା ବଡ଼ ଧରଣର ଆର୍ଥିକ ଡିଲ୍ ସାମନାକୁ ଆସିଛି   ।  ଡକ୍ଟର ମହାନ୍ତି ବୋର୍ଡର ଡାଟା  ଏଣ୍ଟ୍ରି ଅପରେଟର ଜିତନ ମହାରଣା ମାଧ୍ୟମରେ ନଗଦ ଆକାରରେ ଆର୍ଥିକ କାରବାର କରିଥିବା କ୍ରାଇମବ୍ରାଞ୍ଚ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି । 

ଜିତନ ମାଧ୍ୟମରେ ପ୍ରଶ୍ନପତ୍ର ରାଜ୍ୟ ପୂର୍ବତନ କ୍ୟାଡର୍‌ ଶିକ୍ଷକ ସଂଘର କାର୍ଯ୍ୟକାରୀ ସଭାପତି ବିଜୟ ମିଶ୍ରଙ୍କ ନିକଟରେ ପହଞ୍ଚିବା ପରେ କଟକ ସମେତ ଗଞ୍ଜାମ, ରାୟଗଡ଼ା, କୋରାପୁଟ, କଳାହାଣ୍ଡି, ବାଲେଶ୍ବର ଜିଲ୍ଲାରେ ବିକ୍ରି ହୋଇଥିଲା ।  ଡକ୍ଟର ମହାନ୍ତିଙ୍କଠାରୁ ବିଜୟଙ୍କ ଯାଏଁ ପ୍ରଶ୍ନପତ୍ର କାରବାର ଓ ବିକ୍ରି ପଛର କାର୍ପଟଦାର ବୋଲି ସ୍ପଷ୍ଟ ପ୍ରମାଣ ମିଳିଛି । ତେଣୁ କ୍ରାଇମବ୍ରାଞ୍ଚ ତିନି ଦିନିଆ ରିମାଣ୍ଡରେ ଏମାନଙ୍କୁ ଆଣିବାକୁ ଯୋଜନା କରୁଛି  ।  ରିମାଣ୍ଡରେ ଆସିବା ପରେ ସେମାନଙ୍କୁ ସାମନାସାମନି ଜେରା କରାଯିବ । 

ବିଜୟ ଏହି ପ୍ରଶ୍ନପତ୍ରକୁ କୋରାପୁଟ ଜିଲ୍ଲା ପୂର୍ବତନ କ୍ୟାଡର୍‌ ଶିକ୍ଷକ ସଂଘର ସଭାପତି ସନାତନ ବିଷୋୟୀଙ୍କ ମାଧ୍ୟମରେ ବିକ୍ରି ପାଇଁ ଛାଡ଼ିଥିଲା । ତେବେ ଏହି ଆର୍ଥିକ କେଳେଙ୍କାରୀରେ ବର୍ତ୍ତମାନ ସୁଦ୍ଧା କେବଳ ଜିତନଙ୍କ ପତ୍ନୀଙ୍କ ବ୍ୟାଙ୍କ ଆକାଉଣ୍ଟକୁ ୨ ଲକ୍ଷ ୫୦ ହଜାର ଟଙ୍କା ଫୋନ୍ ପେ’ରେ ଆସିଥିବାର ଡିଜିଟାଲ୍ ପ୍ରମାଣ ମିଳିଛି  ।

ଏହାବାଦ୍ ଅନ୍ୟ କୌଣସି ଡିଜିଟାଲ୍ ପ୍ରମାଣ ମିଳିନଥିବାରୁ କ୍ରାଇମବ୍ରାଞ୍ଚ ବୋର୍ଡ ଉପସଭାପତି ଡକ୍ଟର ମହାନ୍ତି, ଜିତନ ଓ ବିଜୟଙ୍କ ବ୍ୟାଙ୍କ ଆକାଉଣ୍ଟ ସମେତ ପରିବାର  ଓ ସମ୍ପର୍କୀୟଙ୍କ  ବ୍ୟାଙ୍କ ଆକାଉଣ୍ଟ ବି ଯାଞ୍ଚ ଆରମ୍ଭ କରିଛି  ।  ଗଲା ଏପ୍ରିଲରୁ ଡକ୍ଟର ମହାନ୍ତି ୧୦୦ ଥର ଜିତନଙ୍କ ସହିତ ଅଫିସ ସମୟ ବାଦ୍ କଥାବାର୍ତ୍ତା ହୋଇଥିବାରୁ ଆର୍ଥିକ କାରବାର ସମ୍ପର୍କିତ ଗଲା ଦୁଇ ମାସର ତଥ୍ୟ ମଗାଯାଇଥିବା କ୍ରାଇମବ୍ରାଞ୍ଚ ସୂତ୍ରରୁ ସୂଚନା ମିଳିଛି  ।