କର୍ଣ୍ଣାଟକରେ ଭୟଙ୍କର ବସ୍ ଦୁର୍ଘଟଣା : ଜୀବନ୍ତ ଜଳିଗଲେ ୫ ଯାତ୍ରୀ,ସାମ୍ନାକୁ ଆସିଲା ହୃଦୟ ବିଦାରକ ଫଟୋ

କନକ ବ୍ୟୁରୋ : କର୍ଣ୍ଣାଟକର ଚିତ୍ରଦୁର୍ଗ ଜିଲ୍ଲାରେ ଘଟିଥିବା ଏକ ହୃଦୟବିଦାରକ ବସ୍ ଦୁର୍ଘଟଣା ସାରା ଦେଶକୁ ସ୍ତବ୍ଧ କରିଦେଇଛି । ସାମାନ୍ୟ ଅସାବଧାନତା ଯୋଗୁଁ ଏକ ହସଖୁସିର ପରିବାର ମାତ୍ର କେଇ ସେକେଣ୍ଡରେ ଛାରଖାର ହୋଇଯାଇଛି । ମଙ୍ଗଳବାର ସକାଳେ NH-୪୮ ରେ ଯାତ୍ରା କରୁଥିବା 'ସିବାର୍ଡ କୋଚ୍' ନାମକ ଏକ ଘରୋଇ ସ୍ଲିପର ବସ୍ ମୃତ୍ୟୁର ଯନ୍ତା ପାଲଟିଥିଲା ।

ସୂଚନା ଅନୁସାରେ, ହିରିୟୁର ଅଞ୍ଚଳରେ ଏକ ଦ୍ରୁତଗାମୀ କଣ୍ଟେନର୍ ହଠାତ୍ ନିୟନ୍ତ୍ରଣ ହରାଇ ଡିଭାଇଡର୍ ଡେଇଁ ବିପରୀତ ଦିଗରୁ ଆସୁଥିବା ବସକୁ ସିଧାସଳଖ ଧକ୍କା ଦେଇଥିଲା । ଧକ୍କାଟି ଏତେ ଜୋରଦାର ଥିଲା ଯେ ବସର ଡିଜେଲ ଟାଙ୍କି ଫାଟି ଯାଇଥିଲା ଏବଂ ପଲକ ପକାଇବା ପୂର୍ବରୁ ପୂରା ବସଟି ଏକ ଅଗ୍ନିପିଣ୍ଡୁଳାରେ ପରିଣତ ହୋଇଥିଲା । ଏହି ଭୟଙ୍କର ଅଗ୍ନିକାଣ୍ଡରେ ୫ ଜଣ ଯାତ୍ରୀ ଜୀବନ୍ତ ଜଳିଯାଇ ପ୍ରାଣ ହରାଇଛନ୍ତି । ସେମାନଙ୍କୁ ବାହାରକୁ ବାହାରିବା ପାଇଁ ସାମାନ୍ୟତମ ସୁଯୋଗ ମଧ୍ୟ ମିଳିନଥିଲା । ଏହି ଦୁର୍ଘଟଣାରେ ଲରି ଚାଳକଙ୍କର ମଧ୍ୟ ମୃତ୍ୟୁ ଘଟିଥିବା ବେଳେ ୨୧ ଜଣ ଯାତ୍ରୀ ଗୁରୁତର ଅବସ୍ଥାରେ ହସ୍ପିଟାଲରେ ଭର୍ତ୍ତି କରାଯାଇଛି ।

ଦୁର୍ଘଟଣାରୁ ଅଳ୍ପକେ ବର୍ତ୍ତି ଯାଇଥିବା ଯାତ୍ରୀ କୋହଭରା କଣ୍ଠରେ କହିଛନ୍ତି, "ନିଆଁ ଏତେ ଶୀଘ୍ର ବ୍ୟାପିଗଲା ଯେ ଆମେ କିଛି ବୁଝିପାରିଲୁ ନାହିଁ । ଚାରିଆଡ଼େ ଚିତ୍କାର ଶୁଭୁଥିଲା, ଲୋକେ ସାହାଯ୍ୟ ପାଇଁ ପାଟି କରୁଥିଲେ, କିନ୍ତୁ ନିଆଁର ପ୍ରକୋପ ଯୋଗୁଁ ଆମେ ଚାହି ମଧ୍ୟ ଅନେକଙ୍କୁ ବାହାର କରିପାରିଲୁ ନାହିଁ ।"

ଅନ୍ୟ ଜଣେ ପ୍ରତ୍ୟକ୍ଷଦର୍ଶୀଙ୍କ ସୂଚନା ଅନୁସାରେ, ଲରିଟି ଧକ୍କା ଦେବା ମାତ୍ରେ ଏକ ପ୍ରଚଣ୍ଡ ଶବ୍ଦ ହୋଇଥିଲା, ଯେମିତି କୌଣସି ବୋମା ବିସ୍ଫୋରଣ ହୋଇଛି । ବର୍ତ୍ତମାନ ଆହତମାନଙ୍କୁ ସ୍ଥାନୀୟ ଡାକ୍ତରଖାନାରେ ଭର୍ତ୍ତି କରାଯାଇଛି, ଯେଉଁଠାରେ ସେମାନଙ୍କ ଅବସ୍ଥା ସଙ୍କଟାପନ୍ନ ରହିଛି । ଏହି ଛାତିଥରା ଘଟଣା ସାରା ଅଞ୍ଚଳରେ ଶୋକର ଛାୟା ଖେଳାଇ ଦେଇଛି ।