କନକ ବ୍ୟୁରୋ : ସୁପ୍ରିମକୋର୍ଟରେ କର୍ଣ୍ଣାଟକର ବହୁଚର୍ଚ୍ଚିତ ମହୀଶୂର ଅର୍ବାନ ଡେବଲପମେଣ୍ଟ ଅଥରିଟି ବା ମୁଦା ଦୁର୍ନୀତି  ମାମଲାର ଶୁଣାଣି ହୋଇଛି ।   ମୁଖ୍ୟମନ୍ତ୍ରୀ ସିଦ୍ଦରମୈୟା ଓ ତାଙ୍କ ପତ୍ନୀ ପାର୍ବତୀଙ୍କୁ ସୁପ୍ରିମକୋର୍ଟ ବଡ଼ ଆଶ୍ବସ୍ତି ଦେଇଛନ୍ତି । ଅନ୍ୟପଟେ ତଦନ୍ତକାରୀ ସଂସ୍ଥା ଇଡିକୁ କଡ଼ା ଶବ୍ଦରେ ଭର୍ତ୍ସନା କରିଛନ୍ତି ସର୍ବୋଚ୍ଚ ଅଦାଲତ  । ପ୍ରଧାନ ବିଚାରପତି ଜଷ୍ଟିସ ବି.ଆର ଗଭାଇ ଓ ଜଷ୍ଟିସ କେ. ବିନୋଦ ଚନ୍ଦ୍ରନଙ୍କୁ ନେଇ ଗଠିତ ଖଣ୍ଡପୀଠ କହିଛନ୍ତି, ରାଜନୈତିକ ଲଢ଼େଇରେ ଇଡିର ଭୂମିକା କ’ଣ? ଇଡି ନିଜର ଭୂମିକା ଓ ସୀମାକୁ ଜାଣିବା ଜରୁରୀ । ସୀମା ଅତିକ୍ରମ କରିବା ଠିକ୍‌ ନୁହେଁ । ତଦନ୍ତକାରୀ ସଂସ୍ଥା ପାଇଁ ଗାଇଡଲାଇନ୍‌ ଆବଶ୍ୟକ । ଇଡିକୁ ରାଜନୈତିକ ଅସ୍ତ୍ରଭାବେ ବ୍ୟବହାର କଲେ ଏହା ଆଇନଗତ ପ୍ରକ୍ରିୟାର ସ୍ୱତନ୍ତ୍ରତାକୁ ପ୍ରଭାବିତ କରିବ । କର୍ଣ୍ଣାଟକର ବହୁଚର୍ଚ୍ଚିତ ମୁଦା ମାମଲା ଓ ଇଡିର ନିରପେକ୍ଷ ତଦନ୍ତ ସପକ୍ଷରେ ସଲିସିଟର ଜେନେରାଲ ଏସ୍.ବି ରାଜୁ ଯୁକ୍ତି ବାଢ଼ିବା ବେଳେ କୋର୍ଟ ଅସନ୍ତୋଷ ପ୍ରକାଶ କରି କହିଥିଲେ, ଇଡି ବିରୋଧରେ ଅଧିକ କଠୋର ଟିପ୍ପଣୀ କରିବାକୁ ବାଧ୍ୟ କରନ୍ତୁ ନାହିଁ । କିଛି ଦିନ ଧରି ତଦନ୍ତକାରୀ ସଂସ୍ଥାର ଭୂମିକା ନେଇ କୋର୍ଟ ଅଗବତ ଅଛନ୍ତି । କର୍ଣ୍ଣାଟକର ବହୁଚର୍ଚ୍ଚିତ ମହୀଶୂର ଅର୍ବାନ ଡେବଲପମେଣ୍ଟ ଅଥରିଟି ବା ମୁଦା ମାମଲାରେ ଉଭୟ ମୁଖ୍ୟମନ୍ତ୍ରୀ ଓ ପତ୍ନୀଙ୍କ ନାଁରେ ବଡ଼ ଧରଣର ଦୁର୍ନୀତି ମାମଲା ଚାଲିଛି । ହାଇକୋର୍ଟ ଉଭୟଙ୍କ ବିରୋଧରେ ଚାଲିଥିବା ମାମଲା ଉପରେ ଅସ୍ଥାୟୀ ରୋକ୍ ଲଗାଇବା ପରେ ସୁପ୍ରିମକୋର୍ଟଙ୍କ ଦ୍ବାରସ୍ଥ ହୋଇଥିଲା ଇଡି । କର୍ଣ୍ଣାଟକ ହାଇକୋର୍ଟ ଅଭିଯୁକ୍ତଙ୍କ ବିରୋଧରେ ଇଡି ଦ୍ୱାରା ଜାରି ସମନକୁ ରଦ୍ଦ କରିଥିଲେ । ଯାହାକୁ ବର୍ତ୍ତମାନ ସୁପ୍ରିମକୋର୍ଟ ସମର୍ଥନ କରିଛନ୍ତି । ସୁପ୍ରିମକୋର୍ଟ କହିଛନ୍ତି,  ହାଇକୋର୍ଟଙ୍କ ନିଷ୍ପତ୍ତିରେ କୌଣସି ତ୍ରୁଟି ନାହିଁ ।  ବିଚାରପତିଙ୍କ ଚିନ୍ତାଧାରା ଏବଂ ଆଭିମୁଖ୍ୟରେ କୌଣସି ତ୍ରୁଟି ନାହିଁ । ବିଶେଷ ତଥ୍ୟ ଏବଂ ପରିସ୍ଥିତିକୁ ବିଚାର କରି ଆମେ ଆବେଦନକୁ ଖାରଜ କରୁଛୁ । ସେପଟେ କୋର୍ଟରେ ଆଉ ଏକ ପିଟିସନ ଦାଖଲ କରିଛନ୍ତି କର୍ଣ୍ଣାଟକ ସରକାର। କେନ୍ଦ୍ର ସରକାର ସିବିଆଇ, ଆଇଟି ଓ ଇଡି ପରି ତଦନ୍ତକାରୀ ସଂସ୍ଥାଙ୍କୁ ଅପବ୍ୟବହାର କରୁଛନ୍ତି । ଏ ଦିଗରେ ଧ୍ୟାନ ଦେବାକୁ ଅପିଲ  କରାଯାଇଛି । ଏଥିସହ ଇଡି ଉପରେ କଡ଼ା ଟିପ୍ପଣୀ ପାଇଁ କୋର୍ଟଙ୍କୁ ଧନ୍ୟବାଦ ଜଣାଇଛନ୍ତି ମୁଖ୍ୟମନ୍ତ୍ରୀ ସିଦ୍ଦରମୈୟା ।