କ୍ଷମା ମାଗିଲେ  ଗୃହମନ୍ତ୍ରୀ ; ମହିଳା ଉତ୍ପୀଡନ ନେଇ ଦେଇଥିଲେ ବୟାନ

କନକ ବ୍ୟୁରୋ: ବିବାଦୀୟ ବୟାନ ପରେ କ୍ଷମା ମାଗିଲେ କର୍ଣ୍ଣାଟକ ମନ୍ତ୍ରୀ ଜି.ପରମେଶ୍ବର । ବେଙ୍ଗାଲୁରୁରେ ଏକ ଯୌନ ନିର୍ଯାତନା ଘଟଣା ଉପରେ ମନ୍ତ୍ରୀଙ୍କ ମନ୍ତବ୍ୟ ଜନ ଅସନ୍ତୋଷ ସୃଷ୍ଟି କରିବା ପରେ କର୍ଣ୍ଣାଟକର ଗୃହମନ୍ତ୍ରୀ ଜି ପରମେଶ୍ୱର କ୍ଷମା ପ୍ରାର୍ଥନା କରିଛନ୍ତି । ବେଙ୍ଗାଲୁରୁର ଏକ ରାସ୍ତାରେ ଜଣେ ପୁରୁଷ ଜଣେ ମହିଳାଙ୍କୁ ସ୍ପର୍ଶ କରୁଥିବାର ଏକ ଭିଡିଓ ଭାଇରାଲ ହେବା ପରେ ବଡ଼ ବଡ଼ ସହରରେ ଏପରି ଘଟଣା ଘଟୁଥିବା ମନ୍ତ୍ରୀ କହିଥିଲେ , ଯାହାକୁ ବିରୋଧୀ ବିଜେପି ସମାଲୋଚନା କରିଛି ।

କ୍ଷମା ମାଗି ଶ୍ରୀ ପରମେଶ୍ୱର କହିଛନ୍ତି , ତାଙ୍କ ବକ୍ତବ୍ୟକୁ ଭୁଲ ବୁଝାଯାଇଥିଲା, ଏବଂ ସେ ଏହାକୁ ଆହୁରି ବିକୃତ କରିବାକୁ ଚାହୁଁନଥିଲେ । ଆହୁରି ମଧ୍ୟ କହିଛନ୍ତି, ’ମୁଁ ସ୍ପଷ୍ଟ କରିବାକୁ ଚାହୁଁଛି ଯେ ଗତକାଲି ମୁଁ ଯେଉଁ ବକ୍ତବ୍ୟ ଦେଇଥିଲି ତାହା ଠିକ୍ ଭାବରେ ବୁଝାଯାଇ ନଥିଲା, ମୁଁ ଏପରି ଜଣେ ବ୍ୟକ୍ତି ଯିଏ ସବୁବେଳେ ମହିଳାଙ୍କ ସୁରକ୍ଷା ପାଇଁ ବହୁତ ଚିନ୍ତା କରେ । ଯଦି କୌଣସି ମହିଳା ଆଘାତ ପାଇଛନ୍ତି, ତେବେ ମୁଁ ମୋର ଦୁଃଖ ପ୍ରକାଶ କରୁଛି ଏବଂ କ୍ଷମା ପ୍ରାର୍ଥନା କରୁଛି’ ବୋଲି ମନ୍ତ୍ରୀ ଗଣମାଧ୍ୟମ ଆଗରେ କହିଛନ୍ତି। ଭିଡିଓ ଭାଇରାଲ ହେବା ପରେ ପୋଲିସ ଆକ୍ରମଣ ଏବଂ ଯୌନ ନିର୍ଯାତନା ପାଇଁ ଏକ ମାମଲା ରୁଜୁ କରିଛି ।