କାରଗିଲ୍‌ର ମହାଯୋଦ୍ଧା : ୧୭ ଗୁଳି ଖାଇ ପାକିସ୍ତାନକୁ ହରାଇଥିବା ୧୯ ବର୍ଷୀୟ ବୀର ଯବାନ

କନକ ବ୍ୟୁରୋ : କାରଗିଲ୍‌ ଯୁଦ୍ଧରେ ଏମିତି ଅନେକ ବୀର ଯୋଦ୍ଧା ଥିଲେ , ଯାହାଙ୍କ ଅଦମ୍ୟ ସାହସ ଓ ବଳିଦାନ ଆଗରେ ଶତ୍ରୁ ସୈନ୍ୟ ମୁଣ୍ଡ ନୁଆଁଇବାକୁ ବାଧ୍ୟ ହୋଇଥିଲା । ଏହି ବୀରମାନଙ୍କ ମଧ୍ୟରେ ଜଣେ ହେଉଛନ୍ତି ସୁବେଦାର ମେଜର ଯୋଗେନ୍ଦ୍ର ସିଂହ ଯାଦବ, ଯିଏ ମାତ୍ର ୧୯ ବର୍ଷ ବୟସରେ ନିଜ ବୀରତ୍ୱ ପାଇଁ ଭାରତର ସର୍ବୋଚ୍ଚ ସାମରିକ ସମ୍ମାନ ‘ପରମବୀର ଚକ୍ର’ରେ ସମ୍ମାନିତ ହୋଇଥିଲେ । ଟାଇଗର ହିଲ୍‌ର ସେହି ଯୁଦ୍ଧରେ ନିଜ ଶରୀରରେ ୧୭ଟି ଗୁଳି ବାଜିବା ସତ୍ତ୍ୱେ ସେ ଯେଉଁ ଅଦ୍ଭୁତ ସାହସର ପରିଚୟ ଦେଇଥିଲେ, ତାହା ଭାରତୀୟ ସେନାର ଇତିହାସରେ ସ୍ୱର୍ଣ୍ଣାକ୍ଷରରେ ଲିପିବଦ୍ଧ ହୋଇ ରହିଛି ।

ଘାତକ ପ୍ଲାଟୁନ୍‌ର ସାହସୀ ଯୋଦ୍ଧା :

୧୯୯୯ ମସିହା ଜୁଲାଇ ୩ ଓ ୪ ତାରିଖର ରାତି...ଆଦେଶ ଆସିଲା ୧୮ ଗ୍ରେନେଡିୟର୍ସର ଘାତକ କମାଣ୍ଡୋ ପ୍ଲାଟୁନ୍‌କୁ । ଟାଇଗର ହିଲ୍‌ରେ ଥିବା ତିନୋଟି ଗୁରୁତ୍ୱପୂର୍ଣ୍ଣ ବଙ୍କରକୁ କବ୍‌ଜା କରିବାର ଦାୟିତ୍ୱ ଦିଆଯାଇଥିଲା । ଏହି ଅପରେସନ୍‌ର ନେତୃତ୍ୱ ନେବାକୁ ଯୋଗେନ୍ଦ୍ର ସିଂହ ଯାଦବ ସ୍ୱେଚ୍ଛାକୃତ ଭାବେ ଆଗେଇ ଆସିଥିଲେ । ପ୍ରାୟ ୧୬,୫୦୦ ଫୁଟ ଉଚ୍ଚର ଏହି ପାହାଡ଼କୁ ଚଢ଼ିବା ଅତ୍ୟନ୍ତ କଠିନ ଥିଲା । ଯେତେବେଳେ ଭାରତୀୟ ସୈନିକମାନେ ଉପରକୁ ଚଢ଼ିବା ଆରମ୍ଭ କଲେ, ପାକିସ୍ତାନୀ ସୈନ୍ୟମାନେ ପ୍ରବଳ ଗୁଳି, ଗ୍ରେନେଡ୍ ଏବଂ ରକେଟ୍ ମାଡ଼ କରିଥିଲେ । ଏହି ଆକ୍ରମଣରେ ପ୍ଲାଟୁନ୍ କମାଣ୍ଡର ଏବଂ ଅନ୍ୟ ଦୁଇଜଣ ସୈନିକ ସହିଦ ହୋଇଯାଇଥିଲେ ।

୧୭ ଗୁଳି ଖାଇ ମଧ୍ୟ ହାରି ନଥିଲେ ୧୯ ବର୍ଷୀୟ ଯୋଦ୍ଧା : 

ପରିସ୍ଥିତିର ଗମ୍ଭୀରତାକୁ ବୁଝି ଯୋଗେନ୍ଦ୍ର ସିଂହ ଯାଦବ ନିଜ ଜୀବନକୁ ବାଜି ଲଗାଇ ଶତ୍ରୁଙ୍କ ବଙ୍କର ଆଡ଼କୁ କ୍ରଲ୍ କରିବା ଆରମ୍ଭ କରିଥିଲେ । ଏହି ସମୟରେ ତାଙ୍କ ଶରୀରରେ ଅନେକ ଗୁଳି ବାଜିଥିଲା । ଅସହ୍ୟ ଯନ୍ତ୍ରଣା ସତ୍ତ୍ୱେ ସେ ପଛକୁ ହଟିନଥିଲେ । ସେ ଏକାକୀ ପ୍ରଥମ ବଙ୍କରରେ ଏକ ଗ୍ରେନେଡ୍ ଫିଙ୍ଗି ଚାରିଜଣ ପାକିସ୍ତାନୀ ସୈନିକଙ୍କୁ ମାରିବାରେ ସଫଳ ହୋଇଥିଲେ । ଏହା ଦେଖି ତାଙ୍କ ପ୍ଲାଟୁନର ଅନ୍ୟ ସଦସ୍ୟମାନେ ଅଧିକା ଜୋସ୍‌ ଓ ଉତ୍ସାହର ସହିତ ଆଗକୁ ବଢ଼ିଥିଲେ । ଯୋଗେନ୍ଦ୍ର ଗୁରୁତର ଭାବେ ଆହତ ହୋଇଥିଲେ ମଧ୍ୟ ସେଠାରୁ ଫେରିବାକୁ ମନା କରିଦେଇଥିଲେ ଏବଂ ଅନ୍ୟ ସାଥୀମାନଙ୍କ ସହ ମିଶି ଶେଷ ପର୍ଯ୍ୟନ୍ତ ଲଢ଼ିଥିଲେ । ତାଙ୍କର ଏହି ଅଦମ୍ୟ ସାହସିକତା ଦେଖି ପ୍ଲାଟୁନ୍‌ର ଅନ୍ୟ ସୈନିକମାନେ ଦ୍ୱିଗୁଣିତ ଉତ୍ସାହରେ ଶତ୍ରୁଙ୍କ ଉପରେ ଆକ୍ରମଣ କରି ଟାଇଗର ହିଲ୍‌କୁ କବ୍‌ଜା କରିଥିଲେ ।

‘ପକେଟ୍‌ରେ ଥିବା ୫ ଟଙ୍କିଆ କଏନ୍ ବଞ୍ଚାଇଦେଲା ଜୀବନ’

ଯୋଗେନ୍ଦ୍ର ସିଂହ ଯାଦବ ଆହତ ହୋଇଯିବା ପରେ ପାକିସ୍ତାନୀ ସୈନିକମାନେ ଜଣ ଜଣ କରି ମୃତ ଭାରତୀୟ ସୈନିକଙ୍କ ଶରୀର ଉପରକୁ ଗୁଳି ଚଳାଇବା ଆରମ୍ଭ କରିଦେଇଥିଲେ । ଏହି କ୍ରମରେ, ଆହତ ଏବଂ ଅଚେତ ଅବସ୍ଥାରେ ପଡ଼ିଥିବା ଯୋଗେନ୍ଦ୍ରଙ୍କ ଛାତି ଆଡ଼କୁ ମଧ୍ୟ ଜଣେ ପାକିସ୍ତାନୀ ସୈନିକ ରାଇଫଲ୍ ଉଠାଇଲା । ଶତ୍ରୁର ଏକ ଗୁଳି ତାଙ୍କ ଛାତି ଆଡ଼କୁ ଆସିଲା, କିନ୍ତୁ ତାହା ତାଙ୍କ ଛାତି ପାଖ ପକେଟରେ ଥିବା ୫ ଟଙ୍କିଆ କଏନ୍‌ ସହ ବାଜି ଅଟକିଗଲା ଏବଂ ଯୋଗେନ୍ଦ୍ର ଜୀବିତ ରହିଗଲେ । ସେଥିପାଇଁ ଲେ କୁହନ୍ତି , ପକେଟ୍‌ରେ ଥିବା ୫ ଟଙ୍କିଆ କଏନ୍‌ ମୋ ଜୀବନ ବଞ୍ଚାଇ ଦେଲା । 

ମୃତ୍ୟୁକୁ ମାତ୍ ଦେଇ ସେନାକୁ କଲେ ସତର୍କ :

ଅନେକ ପାକିସ୍ତାନୀ ସୈନିକଙ୍କୁ ମାରି ସେମାନଙ୍କୁ ଚକମା ଦେଇଥିଲେ ।  ଯୋଗେନ୍ଦ୍ରଙ୍କ ମନରେ କେବଳ ଏତିକି ଇଚ୍ଛା ବାକି ଥିଲା ଯେ, ସେ କୌଣସି ପ୍ରକାରେ ତଳୁ ଉପରକୁ ଆସୁଥିବା ନିଜ ସେନାକୁ ଶତ୍ରୁର ସ୍ଥିତି ବିଷୟରେ ସୂଚନା ଦେଇପାରିବେ । ଏହି ଇଚ୍ଛା ନେଇ ସେ ଅନେକ ଗୁଳି ଖାଇ ମଧ୍ୟ ଏକ ନାଳ ସାହାଯ୍ୟରେ ତଳକୁ ଖସି ଆସିଥିଲେ । ତାଙ୍କ ସୂଚନା ଓ ସାହସ ବଳରେ, ଦ୍ୱିତୀୟ ଆକ୍ରମଣରେ ଭାରତୀୟ ସେନା ବିନା କୌଣସି ସୈନିକ ହରାଇ ଟାଇଗର ହିଲ୍ ଉପରେ କବ୍‌ଜା କରିନେଇଥିଲା। ଯାଦବ ନିଜେ କୁହନ୍ତି ଯେ, ତାଙ୍କର ଜୀବିତ ରହିବାର ଉଦ୍ଦେଶ୍ୟ ହେଉଛି ନିଜ ସାଥୀମାନଙ୍କ ବୀରତ୍ୱର ସତ୍ୟ କାହାଣୀକୁ ସାରା ଦୁନିଆରେ ପହଞ୍ଚାଇବା ।

ପ୍ରଥମେ ଯୋଗେନ୍ଦ୍ର ସିଂହ ଯାଦବଙ୍କୁ ମୃତ ବୋଲି ଭାବି ମରଣୋତ୍ତର ଭାବେ ପରମବୀର ଚକ୍ର ପାଇଁ ଘୋଷଣା କରାଯାଇଥିଲା । କିନ୍ତୁ ପରେ ଜଣାପଡ଼ିଥିଲା ଯେ ସେ ହସ୍ପିଟାଲରେ ଚିକିତ୍ସିତ ହେଉଛନ୍ତି ଏବଂ ତାଙ୍କ ନାମରେ ଅନ୍ୟ ଜଣେ ସୈନିକ ସହିଦ ହୋଇଥିଲେ । ଯୋଗେନ୍ଦ୍ର ସିଂହ ଯାଦବ ମାତ୍ର ୧୯ ବର୍ଷ ବୟସରେ ଏହି ସମ୍ମାନ ପାଇ ସବୁଠାରୁ କନିଷ୍ଠ ପରମବୀର ଚକ୍ର ବିଜେତା ହୋଇଥିଲେ । ତାଙ୍କର ଏହି ବୀରତ୍ୱର କାହାଣୀ ଆଜି ମଧ୍ୟ ଦେଶର ଯୁବପିଢ଼ିଙ୍କୁ ପ୍ରେରଣା ଯୋଗାଉଛି ।