ସହର ଜଗୁଛି ଅଚଳ ସିସିଟିଭି; ଅସୁରକ୍ଷିତ ମନେ କରୁଛନ୍ତି ସହରବାସୀ

କନକ ବ୍ୟୁରୋ : ସିସିଟିଭି ସ୍କାନରରେ ରହିବ ପୂରା ସହର । ଦିନକୁ ଦିନ ବଢ଼ୁଥିବା ଜନସଂଖ୍ୟା ଓ ଆପରାଧିକ କାର୍ଯ୍ୟକଳାପକୁ ଦୃଷ୍ଟିରେ ରଖି ଢେଙ୍କାନାଳ ଜିଲ୍ଲା କାମାକ୍ଷାନଗରର ପ୍ରତ୍ୟେକ ସ୍ଥାନରେ ଲାଗିଥିଲା ସିସିଟିଭି । ହେଲେ ଅଳ୍ପ କିଛି ବର୍ଷ ଚାଲିବା ପରେ ସିସିଟିଭି ଗୁଡ଼ିକ ଅଚଳ ହୋଇପଡ଼ିଛି । ଯାହା ଦ୍ୱାରା ସହରବାସୀ ନିଜକୁ ଅସୁରକ୍ଷିତ ମନେ କରୁଛନ୍ତି ।

ଅପରାଧକୁ ନିୟନ୍ତ୍ରଣ କରାଯିବ, ସହରବାସୀ କିପରି ସୁରକ୍ଷିତରେ ଚଳପ୍ରଚଳ କରିପାରିବେ । ଏସବୁକୁ ଦୃଷ୍ଟିରେ ରଖି ୫ ବର୍ଷ ତଳେ କାମାକ୍ଷାନଗର ଏନ୍‌ଏସି ପକ୍ଷରୁ ଲକ୍ଷଲକ୍ଷ ଟଙ୍କା ବ୍ୟୟରେ ସହରର ପ୍ରତ୍ୟେକ ସ୍ଥାନରେ ଲଗାଯାଇଥିଲା ସିସିଟିଭି । ଏହାଦ୍ୱାରା ଅନେକାଂଶରେ ଆପରାଧିକ କାର୍ଯ୍ୟକଳାପକୁ ମଧ୍ୟ ନିୟନ୍ତ୍ରଣ କରାଯାଇପାରିଥିଲା । ହେଲେ ଏବେ ସହରରେ ଲାଗିଥିବା ସମସ୍ତ ସିସିଟିଭି ଅଚଳ ହୋଇପଡ଼ିଛି । ଫଳରେ ସହରବାସୀ ନିଜକୁ ଅସୁରକ୍ଷିତ ମନେ କରୁଛନ୍ତି ।

ପ୍ରତ୍ୟେକ ଦିନ ସହରରେ ହଜାର ହଜାର ଗାଡ଼ି ଚଳପ୍ରଚଳ କରୁଛି । ସହର ଠାରୁ କିଛି ଦୂରରେ କାମାକ୍ଷାନଗର ମହାବିଦ୍ୟାଳୟ ରହିଛି । ତେଣୁ ସିସିଟିଭି ଗୁଡ଼ିକର ମରାମତି ପାଇଁ ବିଭିନ୍ନ ସଂଗଠନ ତରଫରୁ ଦାବି ଜଣାଯାଇଥିଲେ ମଧ୍ୟ ଏଯାଏଁ କିଛି ସୁଫଳ ମିଳିପାରିନି । ଅନ୍ୟପଟେ ଫଣ୍ଡ ଅଭାବରୁ ସିସିଟିଭିଗୁଡ଼ିକ ମରାମତି ହୋଇପାରିନଥିବା କହିଛନ୍ତି କାମାକ୍ଷାନଗର ଏନ୍‌ଏସି ନିର୍ବାହୀ ଅଧିକାରୀ । ସିସିଟିଭି ଗୁଡ଼ିକୁ ତୁରନ୍ତ ମରାମତି କରି କାର୍ଯ୍ୟକ୍ଷମ କରାଗଲେ ସହରବାସୀ ସୁରକ୍ଷିତ ଭାବେ ଚଳପ୍ରଚଳ କରିପାରିବେ ।