କଳାହାଣ୍ଡି ଦାଦନର କରୁଣ କାହାଣୀ; ଶବ ପାଲଟୁଛନ୍ତି ଜଣେ ପରେ ଜଣେ ଶ୍ରମିକ

କନକ ବ୍ୟୁରୋ : କଳାହାଣ୍ଡିରେ ଥମୁନି ଦାଦନ ଶ୍ରମିକଙ୍କ ଯନ୍ତ୍ରଣା । ବିଶେଷ କରି ଦାଦନ ପ୍ରବଣ ଦଣ୍ଡପାଟ ଓ କୋକସରା ଅଞ୍ଚଳର ଶ୍ରମିକ ପେଟ ବିକଳରେ, ଅଧିକ ରୋଜଗାର ଆଶାରେ ବାହାର ରାଜ୍ୟକୁ ଯାଉଛନ୍ତି । ସେଠାରେ ନିର୍ଯାତନା କିମ୍ୱା ଦୁର୍ଘଟଣା କିମ୍ୱା ରୋଗରେ ପଡ଼ି ପ୍ରାଣ ହରାଇବା ଘଟଣା ଖବରର ଶିରୋନାମା ପାଲଟୁଛି । ଏବେ ପୁଣି ଜଣେ ଶ୍ରମିକଙ୍କ ମୃତଦେହ ଫେରି ଗାଁ ମାଟିକୁ ଲୁହରେ ଭିଜାଇବା ରାଜ୍ୟରେ ଆଲୋଡ଼ନ ସୃଷ୍ଟି କରିଛି ।

କାନ୍ଦ ବୋବାଳିରେ ଫାଟିପଡୁଛି ଗାଁ ଦାଣ୍ଡ । ବାହୁନି ବାହୁନି କାନ୍ଦି ଭୂଇଁରେ ଲୋଟିଯାଉଛନ୍ତି ସ୍ତ୍ରୀ ଓ ଜ୍ଞାତିପରଜନ । ଯାହାଙ୍କ ଫେରିବା ବାଟକୁ ପରିବାର ଖୁସିରେ ଚାହିଁରହିଥିଲେ । ସେ ଶବ ହୋଇ ଫେରିଛି । କଳାହାଣ୍ଡି ଜିଲ୍ଲା ଆମପାଣି ଥାନା ଡୁଡ଼ୁକାଠେଙ୍ଗା ନିକଟ ନୂଆପଡ଼ା ଗାଁର ଯୋଗୀ ଧଙ୍ଗଡାମାଝୀଙ୍କ ବାଙ୍ଗାଲୋରରେ ହୃଦଘାତରେ ପ୍ରାଣ ହରାଇଛନ୍ତି । ପରିବାରର ଦୁଃଖ ଦୂର କରିବାକୁ ଦାଦନ ଯାଇଥିଲେ, ଏବେ ପରିବାର ଉପରେ ଦୁଃଖର ପାହାଡ ଲଦି ଦେଇ ଆରପାରିକୁ ଚାଲିଯାଇଛନ୍ତି ଯୋଗୀ ।

ତିନି ମାସ ତଳେ ରୋଜଗାର ଆଶାରେ ବାପା-ପୁଅ ଦୁହେଁ ଦାଦନ ଖଟିବାକୁ ବାଙ୍ଗାଲୋର ଯାଇଥିଲେ । ହୃଦଘାତରେ ବାପାଙ୍କ ଦେହାନ୍ତ ପରେ ଆମ୍ବୁଲାନ୍ସରେ ଗାଁକୁ ମରଶରୀର ଆଣିଛି ପୁଅ । ଯୋଗୀଙ୍କ ଭଳି ଅନେକ ଶ୍ରମିକ ରାଜ୍ୟ ବାହାରେ ପ୍ରାଣ ହରାଉଛନ୍ତି । କୋକସରା ବ୍ଲକରେ ବାରମ୍ୱାର ଦାଦନ ଶ୍ରମିକଙ୍କ ମୃତଦେହ ଫେରୁଥିବାରୁ ସାଧାରଣରେ ଚିନ୍ତା ପ୍ରକାଶ ପାଇଛି ।

କୋକସରାରେ ଗତ ୩ ମାସରେ ୬ଜଣ ଦାଦନ ଶ୍ରମିକଙ୍କ ଶବ ଫେରିଛି । ଜିଲ୍ଲା ଶ୍ରମ ବିଭାଗ ଏହାକୁ ଗୁରୁତ୍ୱ ଦେଇ ଦାଦନ ଚାଲାଣ ରୋକିବା ଦିଗରେ ପଦକ୍ଷେପ ନେବାକୁ ଦାବି ହେଉଛି ।