ଆରପାରିରେ ଜେଏମ୍‌ଏମ୍‌ର ତୁଙ୍ଗ ନେତା ଶିବୁ ସୋରେନ, ଆସନ୍ତାକାଲି ପୈତୃକ ବାସଭବନରେ ଅନ୍ତିମ ସଂସ୍କାର

କନକ ବ୍ୟୁରୋ: ଆରପାରିରେ ଜେଏମ୍‌ଏମ୍‌ର ତୁଙ୍ଗ ନେତା ତଥା ପୂର୍ବତନ ମୁଖ୍ୟମନ୍ତ୍ରୀ ଶିବୁ ସୋରେନ । ୮୧ବର୍ଷ ବୟସରେ ତାଙ୍କର ପରଲୋକ ହୋଇଛି ।ଆସନ୍ତାକାଲି ପୈତୃକ ବାସଭବନରେ ହେବ ଅନ୍ତିମ ସଂସ୍କାର  । ଶିବୁ ସୋରେନ  ଥିଲେ ଆଦିବାସୀଙ୍କ ଆସ୍ଥା, ବିଶ୍ବାସ, ଅଧିକାର ଲଢ଼େଇର ମହାନାୟକ । କେବେ ଜଙ୍ଗଲ, ଜମି ରକ୍ଷା ପାଇଁ ସଂଗ୍ରାମ କରୁଥିଲେ ତ ପୁଣି କେବେ ଅଧିକାରର ଲଢ଼େଇ ପାଇଁ ଜେଲ୍‌ ଯାଇଥିଲେ । ଝାଡ଼ଖଣ୍ଡ ରାଜନୀତିର ସବୁଠୁ ବଡ଼ ଚେହେରା ଶିବୁ ସୋରେନ । ସମସ୍ତଙ୍କ ଗହଣରେ ଗୁରୁଜୀ ଭାବେ ଜଣାଉଥିବା ଶିବୁ ସୋରେନଙ୍କ ୮୧ବର୍ଷ ବୟସରେ ପରଲୋକ ରାଜନୀତିରେ ବଡ ଶୂନ୍ୟସ୍ଥାନ ସୃଷ୍ଟି କରିଛି । ଦିଲ୍ଲୀ ଗଙ୍ଗାରାମ ଡାକ୍ତରଖାନାରେ ଚିକିତ୍ସାଧୀନ ଅବସ୍ଥାରେ ତାଙ୍କର ପରଲୋକ ହୋଇଛି । କାଲି ଝାଡ଼ଖଣ୍ଡ ରାମଗଢ଼ ସ୍ଥିତି ପୈତୃକ ବାସଭବନରେ ହେବ ଅନ୍ତିମ ସଂସ୍କାର ।

 ୧୯୪୪ ମସିହା ଜାନୁଆରି ୧୧ରେ ଜନ୍ମ ଗ୍ରହଣ କରିଥିବା ଶିବୁ ସୋରେନ ।
-୧୯୭୦ରେ ଝାଡ଼ଖଣ୍ଡ ମୁକ୍ତି ମୋର୍ଚ୍ଚା ଦଳ ଗଠନ କରିଥିଲେ
-ବିହାରଠୁ ଅଲଗା କରି ଝାଡ଼ଖଣ୍ଡକୁ ସ୍ବତନ୍ତ୍ର ରାଜ୍ୟ ଗଠନର ପୁରୋଧା ଶିବୁ 
-୩୦ବର୍ଷର ଲଢ଼େଇ ପରେ ୨୦୦୦ ମସିହାରେ ଝାଡ଼ଖଣ୍ଡକୁ ମିଳିଥିଲା ସ୍ବତନ୍ତ୍ର ରାଜ୍ୟ ମାନ୍ୟତା
-୧୯୮୦ରୁ ୨୦୧୪ ମଧ୍ୟରେ ୮ଥର ଲୋକସଭା ସାଂସଦ ଭାବେ ନିର୍ବାଚିତ  
-ଦୁଇ ଥର ରାଜ୍ୟସଭା ସାଂସଦ 
-୨୦୦୪ରେ ୟୁପିଏ ସରକାରଙ୍କ ସମୟରେ କ୍ୟାବିନେଟ୍‌ ମନ୍ତ୍ରୀ

ଜଣେ ରାଜନେତା ଭାବେ ପୁରପଲ୍ଲୀଠୁ ନେଇ ଜାତୀୟ ରାଜନୀତିରେ କେବଳ ସ୍ବତନ୍ତ୍ର ସ୍ଥାନ ବନାଇନଥିଲେ ଶିବୁ। ବରଂ ଆଦିବାସୀଙ୍କ ଅସ୍ମିତାକୁ ନୂଆ ପରିଚୟ ଦେବାରେ ତାଙ୍କର ଅତୁଳନୀୟ ଅବଦାନ ରହିଥିଲା ।