କନକ ବ୍ୟୁରୋ : ଜଣ୍ଡିସ୍ କବଳରେ କଟକ ସହର । ଦୂଷିତ ପାଣି ପିଇ ଲୋକମାନେ ଜଣ୍ଡିସରେ ଆକ୍ରାନ୍ତ ହେଉଛନ୍ତି। ଦୀର୍ଘ ଦିନ ହେବ ସିଏମ୍‌ସିର ୧୦ ନମ୍ବର ଏବଂ ୧୨ ନମ୍ବର ୱାର୍ଡର ମାନସିଂହପାଟଣା, ମସ୍ତରାମଠ ଗଳି ଓ କାଫଲା ବଜାର ଅଞ୍ଚଳରେ ଜଣ୍ଡିସ ବ୍ୟାପୁଛି। ଆଉ ଏହାରି ମଧ୍ୟରେ ଆକ୍ରାନ୍ତଙ୍କ ସଂଖ୍ୟାକୁ ନେଇ ଦେଖାଦେଇଛି ଦ୍ଵନ୍ଦ୍ବ। 
Advertisment
ପ୍ରକୃତରେ ଜଣ୍ଡିସ୍‌ ଆକ୍ରାନ୍ତଙ୍କ ସଂଖ୍ୟା କେତେ? 
କାହିଁକି ତଥ୍ୟ ଲୁଚାଉଛି ସିଏମ୍‌ସି? 
କଟକରେ ଡ୍ରେନ୍ ଭିତର ଦେଇ ଯେଉଁ ପାଣି ପାଇପ୍ ଯାଇଛି । ସେହି ପାଣି ପାଇପ୍‌ ହିଁ ଜଣ୍ଡିସ ମୂଳ କାରଣ । ଦୁଇ ଦିନ ତଳେ ସିଏମ୍‌ସି ମେୟର, କମିସନର ଓ ୱାଟକୋ କର୍ମଚାରୀମାନେ ସମ୍ପୃକ୍ତ ବୁଲି ସ୍ଥିତି ଅନୁଧ୍ୟାନ କରିଥିଲେ । ତେବେ ଏହାରି ଭିତରେ ଜଣ୍ଡିସ ଆକ୍ରାନ୍ତଙ୍କ ସଂଖ୍ୟାକୁ ନେଇ ଦ୍ଵନ୍ଦ୍ବ ଦେଖାଦେଇଛି । ମେୟର କହୁଛନ୍ତି ୧୫ ଜଣ ଆକ୍ରାନ୍ତ ହୋଇଛନ୍ତି । କିନ୍ତୁ ସ୍ଥାନୀୟ ବାସିନ୍ଦା ଓ କଂଗ୍ରେସ କହୁଛି ୫୦ରୁ ୬୦ ଜଣ ଆକ୍ରାନ୍ତ ହୋଇଛନ୍ତି ।
ବଡ଼ କଥା ହେଉଛି କଟକ ସହରରେ ପାଣି ପାଇପ ସମସ୍ୟା କେବଳ ଏହି ଦୁଇଟି ୱାର୍ଡରେ ନୁହେଁ । ବରଂ ଅଧିକାଂଶ ୱାର୍ଡରେ ଏଭଳି ଡ୍ରେନ ଭିତରେ ପାଣି ପାଇପ ସମସ୍ୟା ଦେଖିବାକୁ ମିଳିଛି। ଡ୍ରେନ ଭିତର ଦେଇ ଯାଇଥିବା ପାଣି ପାଇପ୍‌ରେ ଲିକେଜ୍‌ ଥିବାରୁ ଲୋକେ ଦୂଷିତ ପାଣି ପିଉଛନ୍ତି। ଫଳରେ ଜଣ୍ଡିସ ବ୍ୟାପୁଛି । ତେବେ ଆଗାମୀ ଦିନରେ ସିଏମ୍‌ସି ଜଣ୍ଡିସକୁ କେମିତି ନିୟନ୍ତ୍ରଣକୁ ଆଣୁଛି ଦେଖିବାକୁ ବାକି ରହିଲା।