କନକ ବ୍ୟୁରୋ : ଜମ୍ମୁ-କାଶ୍ମୀରର କିସ୍ତୱାଡ ଜିଲ୍ଲାରେ ବାଦଲ ଫଟା ବର୍ଷା । ୪୦ଜଣଙ୍କ ମୃତ୍ୟୁ । ଉଦ୍ଧାର କାର୍ଯ୍ୟ ଜାରି । ଶହେରୁ ଅଧିକ ଲୋକ ନିଖୋଜ ଥିବାରୁ ମୃତ୍ୟୁସଂଖ୍ୟା ବୃଦ୍ଧି ପାଇବା ଆଶଙ୍କା କରାଯାଉଛି । ଜମ୍ମୁ ଓ କାଶ୍ମୀରର କିସ୍ତୱାଡ ଜିଲ୍ଲା ଅନ୍ତର୍ଗତ ଚିଶୋଟି ଗାଁରେ ଗୁରୁବାର ପ୍ରଳୟଙ୍କରୀ ବାଦଲ ଫଟା ବର୍ଷା ହୋଇଛି । ଅନେକ ଲୋକଙ୍କ ମୃତ୍ୟୁ ହୋଇଥିବା ଆଶଙ୍କା କରାଯାଉଛି । ଉଦ୍ଧାର କାର୍ଯ୍ୟ ଜାରି ରହିଥିବାରୁ  ମୃତ୍ୟୁସଂଖ୍ୟା ବଢ଼ିବା ଆଶଙ୍କା କରାଯାଉଛି । ଏହି ଅଞ୍ଚଳରେ ମାଚୈଲ ମାତା ତୀର୍ଥଯାତ୍ରା ଚାଲିଥିବା ବେଳେ ଏଭଳି  ବଡ଼ ଧରଣର ପ୍ରାକୃତିକ ବିପର୍ଯ୍ୟୟ ଘଟିଛି । ଚିସୋଟି ଗାଁରେ ତୀର୍ଥଯାତ୍ରୀମାନେ ସେମାନଙ୍କର ଯାନବାହନ ରଖି ପାଦରେ ଚାଲି ଚାଲି ମାଚୈଲ ମାତାଙ୍କ ମନ୍ଦିରକୁ ଯାଆନ୍ତି । ଏହାଠାରୁ ଆଗକୁ ଯାନବାହନରେ ଯାଇ ହୁଏ ନାହିଁ । ଏହି ସ୍ଥାନ ୨ ହଜାର ୮ ଶହ ମିଟର ଉଚ୍ଚତାରେ ଅବସ୍ଥିତ । ଗତ ଜୁଲାଇ ୨୫ ତାରିଖରେ ମାଚୈଲ ମାତା ତୀର୍ଥଯାତ୍ରା ଆରମ୍ଭ ହୋଇଥିଲା । ସେପ୍ଟେମ୍ବର ୫ ତାରିଖରେ ଯାତ୍ରା ଶେଷ ହେବାର ଥିଲା । ତା’ପୂର୍ବରୁ ବଡ଼ ଅଘଟଣ ଘଟିଛି । ପ୍ରାଶାସନିକ କର୍ତ୍ତୃପକ୍ଷ ମାଚୈଲ ମାତା ତୀର୍ଥଯାତ୍ରା ବନ୍ଦ କରି ଦେଇଛନ୍ତି । ସମ୍ପୃକ୍ତ ଅଞ୍ଚଳକୁ ଯୋଗାଯୋଗ ବ୍ୟବସ୍ଥା ସହ ବିପନ୍ନ ଲୋକଙ୍କ ପାଖକୁ ଖାଦ୍ୟ ଓ ଅନ୍ୟ ଅତ୍ୟାବଶ୍ୟକ ସାମଗ୍ରୀ ପଠାଯାଉଛି । ବରିଷ୍ଠ ଅଧିକାରୀମାନେ ଘଟଣାସ୍ଥଳକୁ ଯାଇ ସ୍ଥିତି ଅନୁଧ୍ୟାନ କରୁଛନ୍ତି । ବିପର୍ଯ୍ୟୟ ସମ୍ପର୍କରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କ ସହିତ ଜମ୍ମୁ-କାଶ୍ମୀର ମୁଖ୍ୟମନ୍ତ୍ରୀ ଓମାର ଅବଦୁଲ୍ଲା ଆଲୋଚନା କରିଛନ୍ତି । ଏହି ଘଟଣାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦୁଃଖ ପ୍ରକାଶ କରିବା ସହ  ଉଦ୍ଧାର ଓ ସାହାଯ୍ୟ କରିବା ପାଇଁ ନିର୍ଦ୍ଦେଶ ଦେଇଛନ୍ତି ।