କନକବ୍ୟୁରୋ :  ଯାଜପୁରରେ ଅଣାୟତ୍ତ ଝାଡ଼ାବାନ୍ତି । ବ୍ୟାପିବାରେ ଲାଗିଛି ଡାଇରିଆ । ଜିଲ୍ଲାର ୭ଟି ବ୍ଲକ ଓ ଦୁଇଟି ପୌରାଞ୍ଚଳରେ ଝାଡ଼ାବାନ୍ତି ଆକ୍ରାନ୍ତଙ୍କ ସଂଖ୍ୟା ୭୦୦ ରୁ ଅଧିକ ରହିଥିବା ସୂଚନା ମିଳିଛି । ସେପଟେ କିଛି ରୋଗୀ ସୁସ୍ଥ ହୋଇ ଅଧାରୁ ଅଧିକ ଘରକୁ ଫେରିଛନ୍ତି । ଯାଜପୁର ରୋଡ଼ ମେଡ଼ିକାଲରେ ଆଜି  ଆଠ ନୂଆ ଆକ୍ରାନ୍ତ  ଭର୍ତ୍ତି ହୋଇଥିବାବେଳେ ବର୍ତ୍ତମାନ ୪୨ଜଣ ଚିକିତ୍ସିତ ହେଉଛନ୍ତି । ଦାନଗଦି ମେଡ଼ିକାଲରେ ସାତ ଜଣ ନୂଆ ଆକ୍ରାନ୍ତ ଭର୍ତ୍ତି ହୋଇଛନ୍ତି। ବର୍ତ୍ତମାନ ୩୨ ଜଣ ଚିକିତ୍ସାଧିନ ଅଛନ୍ତି  ।

Advertisment

ସେହିପରି କୋରେଇ ମେଡ଼ିକାଲରେ ଆଜି ଜଣେ ନୂତନ ଆକ୍ରାନ୍ତଙ୍କ ଭର୍ତ୍ତି ହୋଇଥିବାବେଳେ ବର୍ତ୍ତମାନ ୮ ଜଣ ଚିକିତ୍ସାଧୀନ ଅଛନ୍ତି  ।  ଧୀରେ ଧୀରେ ଝାଡ଼ାବାନ୍ତି ଆକ୍ରାନ୍ତ ରୋଗୀ ମାନେ ସୁସ୍ଥ ହୋଇ ଘରକୁ ଫେରିଥିଲେ ମଧ୍ୟ ନୂତନ ଆକ୍ରାନ୍ତ ମେଡ଼ିକାଲକୁ ଆସୁଛନ୍ତି ।  ସେହିପରି ବର୍ତ୍ତମାନ ସୁଦ୍ଧା ୧୧ ଜଣଙ୍କ ଝାଡ଼ାବାନ୍ତିରେ ମୃତ୍ୟୁବରଣ ହୋଇଥିବା ସୂଚନା ମିଳିଛି  ।  ଏପର୍ଯ୍ୟନ୍ତ ଝାଡ଼ାବାନ୍ତି କାରଣ ସ୍ପଷ୍ଟ ହୋଇପାରିନି । ପରିସ୍ଥିତିକୁ ଆଖିଆଗରେ ରଖି ଜିଲ୍ଲା ପ୍ରଶାସନ ଓ ସ୍ୱାସ୍ଥ୍ୟ ବିଭାଗ ପକ୍ଷରୁ ସମସ୍ତ ଚିକିତ୍ସା ସେବା ଯୋଗାଇ ଦିଆଯାଇଛି । ଯାଜପୁର ରୋଡ଼ ମେଡ଼ିକାଲରେ ରୋଗୀମାନଙ୍କୁ ରନ୍ଧା ଖାଦ୍ୟ ଯୋଗାଣ ଆରମ୍ଭ କରାଯାଇଛି ।