କନକ ବ୍ୟୁରୋ: ଉପ-ରାଷ୍ଟ୍ରପତି ପଦରୁ ଇସ୍ତଫା ଦେଇସାରିଛନ୍ତି ଜଗଦୀପ ଧନଖଡ଼ । ତାଙ୍କ ଇସ୍ତଫାକୁ ରାଷ୍ଟ୍ରପତି ମଧ୍ୟ ସ୍ୱୀକାର କରିସାରିଛନ୍ତି । ଆଉ ତା ପରେ ଏବେ ସବୁଠୁ ବଡ଼ ପ୍ରଶ୍ନ ହେଉଛି, ଦେଶର ଆଗାମୀ ଉପ-ରାଷ୍ଟ୍ରପତି କିଏ ହେବ? ବିଜେପି ଏହା ଭିତରେ ଧନଖଡ଼ଙ୍କ ବିକଳ୍ପ ଖୋଜିବା ଆରମ୍ଭ କରିଥିବାବେଳେ, ଏକାଧିକ ନାମକୁ ନେଇ ଚର୍ଚ୍ଚା ଆରମ୍ଭ ହୋଇଛି ।

Advertisment

କୁହାଯାଉଛି, ବିଜେପି ପାଖରେ ଉଭୟ ଲୋକସଭା ଏବଂ ରାଜ୍ୟସଭାରେ ପର୍ଯ୍ୟାପ୍ତ ସଂଖ୍ୟାବଳ ଅଛି । ତେଣୁ ମେଣ୍ଟ ସହଯୋଗୀଙ୍କୁ ଉପ-ରାଷ୍ଟ୍ରପତି ପଦ ଗିଫ୍ଟ ନଦେଇ, ନିଜ ପାଖରେ ଏହି ପଦ ରଖିପାରେ ବିଜେପି । ସୂତ୍ରରୁ ମିଳିଥିବା ଖବର ମୁତାବକ, ପାର୍ଟିର ବିଚାରଧାରା ସହ ମଜଭୁତ ଭାବେ ଜଡ଼ିତ ଥିବା କୌଣସି ନେତାଙ୍କୁ ଉପ-ରାଷ୍ଟ୍ରପତି କରିପାରେ ବିଜେପି ।

ବିଜେପି କରିବ ନିଜ ଦଳରୁ ଉପ-ରାଷ୍ଟ୍ରପତି

ଧନଖଡ଼ଙ୍କ ଉତ୍ତରାଧିକାରୀ କିଏ ହେବ, ଏବେ ତାକୁ ନେଇ ମାନସମନ୍ଥନ ଆରମ୍ଭ ହୋଇଛି । ଚର୍ଚ୍ଚା ହେଉଛି ମୋଦୀ କ୍ୟାବିନେଟର ଜଣେରୁ ଦୁଇ ଜଣ ମନ୍ତ୍ରୀ ଉପ-ରାଷ୍ଟ୍ରପତି ରେସରେ ଆଗରେ ରହିଛନ୍ତି । ଖାସ୍ କରି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଏହି ରେସରେ ଆଗରେ ଅଛନ୍ତି । ଏହାସହ ବିହାର ଫର୍ମୁଲାରେ ରବି ଶଙ୍କର ପ୍ରସାଦ ମଧ୍ୟ ରେସରେ ସାମିଲ ହୋଇଛନ୍ତି ।

ରାମନାଥ ଠାକୁରଙ୍କୁ ନେଇ ବଢ଼ୁଛି ଚର୍ଚ୍ଚା

ବୁଧବାର ରାମନାଥ ଠାକୁରଙ୍କୁ ଭେଟିଛନ୍ତି ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା । ଆଉ ଏହାପରେ ଚର୍ଚ୍ଚା ଆରମ୍ଭ ହୋଇଛି ବିଜେପି ତାଙ୍କୁ ଉପ-ରାଷ୍ଟ୍ରପତି ଆସନରେ ବସାଇପାରେ । ତେବେ ଜାଣିରଖିବା ଉଚିତ ଯେ, ରାମନାଥ ଠାକୁର ହେଉଛନ୍ତି ବିହାରର ପୂର୍ବତନ ମୁଖ୍ୟମନ୍ତ୍ରୀ କର୍ପୂରୀ ଠାକୁରଙ୍କ ପୁଅ, ଯିଏକି ପଛୁଆ ଜାତିରୁ ଆସୁଛନ୍ତି । ଆଗକୁ ବିହାରରେ ବିଧାନସଭା ନିର୍ବାଚନ ହେବାକୁ ଅଛି । ଆଉ କର୍ପୂରୀ ଠାକୁରଙ୍କୁ ଉପ-ରାଷ୍ଟ୍ରପତି ଆସନରେ ବସାଇ, ଦଳ ବଡ଼ ଗେମ୍ ଖେଳିବାକୁ ଲକ୍ଷ୍ୟ ରଖିଛି ।