ଲାଞ୍ଚ ନେଉଥିବା ଜଗନ୍ନାଥ ପୁଲିସ ବିରୋଧରେ ଏକାଠିହେଲେ ଶ୍ରଦ୍ଧାଳୁ; ଜିଲ୍ଲାପାଳଙ୍କୁ ଅଭିଯୋଗ ପତ୍ର ଦେଲେ ୫୦ରୁ ଅଧିକ ଭକ୍ତ

କନକ ବ୍ୟୁରୋ : ପୁଣି ବିବାଦରେ ଶ୍ରୀଜଗନ୍ନାଥ ଟେମ୍ପୁଲ ପୋଲିସ ସ୍କ୍ୱାର୍ଡ । ଲାଞ୍ଚ ନଦେଲେ ଦର୍ଶନାର୍ଥୀଙ୍କୁ ଦୁର୍ବ୍ୟବହାର କରୁଥିବା ଅଭିଯୋଗ । ଦୁର୍ବ୍ୟବହାର ନେଇ ପ୍ରାୟ ୫୦ ଅଧିକ ଭକ୍ତ ଅଭିଯୋଗ କରିଛନ୍ତି । ଚିନ୍ମୟ ସେନାପତି ନାମକ ଜଣେ ଜେଟିପି ଶ୍ରୀମନ୍ଦିର ଭିତରେ ଦର୍ଶନ ସମୟରେ ଏଭଳି ବ୍ୟବହାର କରିଥିବା ଅଭିଯୋଗ ହୋଇଛି । ଅଷଭ୍ୟ ଭାଷାରେ ଗାଳି କରିଥିବା ମଧ୍ୟ ଅଭିଯୋଗ ହୋଇଛି । ଏଥିରେ ଶ୍ରଦ୍ଧାଳୁମାନେ ଜିଲ୍ଲାପାଳଙ୍କ ଦ୍ୱାରସ୍ଥ ହୋଇଛନ୍ତି । ଜିଲ୍ଲାପାଳଙ୍କୁ ଅଭିଯୋଗ ପତ୍ର ଦେବା ସହ ଜେଟିପିଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ଅନୁରୋଧ କରିଛନ୍ତି ।

ଗତ ୩ ମାସ ତଳେ ଜଗନ୍ନାଥ ମନ୍ଦିର ପୋଲିସ ନାମରେ ଆଉଟ୍ ସୋର୍ସେିଂ ମାଧ୍ୟମରେ ପ୍ରାୟ ୭୫ କର୍ମଚାରୀ ନିୟୋଜିତ ହୋଇଛନ୍ତି । ଏମାନେ ଶ୍ରୀଜଗନ୍ନାଥ ମନ୍ଦିର ପୋଲିସଙ୍କ ଭଳି ସ୍ଥାୟୀ ନୁହନ୍ତି କିନ୍ତୁ ଜଗନ୍ନାଥ ମନ୍ଦିର ପୋଲିସ ସ୍କ୍ୱାର୍ଡ ନାମରେ ଡ୍ୟୁଟି କରୁଛନ୍ତି । ଗତ ୬ ତାରିଖରେ ଲାଞ୍ଚ ନେଉଥିବା ବେଳେ ଜଣେ ଜେଟିପି ଭିଡିଓରେ କଏଦ ହୋଇଥିଲେ । ଶ୍ରୀମନ୍ଦିର ମୁଖ୍ୟ ପ୍ରଶାସକ ତାଙ୍କୁ କାର୍ଯ୍ୟରୁ ବହିଷ୍କାର କରିଥିଲେ । ତେବେ ପୁଣି ଜଣେ ଜେଟିପିଙ୍କ ଭୂମିକା ସନ୍ଦେହକୁ ଆସିବା ପରେ ଅସନ୍ତୋଷ ଲାଗି ରହିଛି ।