ତୀବ୍ର ହେଉଛି ଇରାନ-ଇସ୍ରାଏଲ ଲଢ଼େଇ

କନକ ବ୍ୟୁରୋ: ଇରାନ-ଇସ୍ରାଏଲ ମଧ୍ୟରେ ଚାଲିଛି ଘମାଘୋଟ ଲଢ଼େଇ । ଆମେରିକା ଇରାନ ଉପରେ ପରମାଣୁ ଘାଟି ଉପରେ ଆକ୍ରମଣ କରିବା ପରେ ତୀବ୍ର ହୋଇଛି ଯୁଦ୍ଧ । ଅଧିକ ପ୍ରତିକ୍ରିୟାଶୀଳ ହୋଇଉଠିଛି ଇରାନ୍, ଇସ୍ରାଏଲ୍ ଉପରେ ଆକ୍ରମଣକୁ ତୀବ୍ର କରିଛି ତେହେରାନ । ତେଲ ଅଭିଭ୍, ହାଇଫା ଏବଂ ଜେରୁଝେଲମ ସମେତ ଇସ୍ରାଏଲର ୨୫ଟି ସହରରେ ଇରାନ ପକ୍ଷରୁ ୩୦ରୁ ଅଧିକ ମିସାଇଲ୍ ମାଡ଼ କରାଯାଇଛି । ଏହି ଆକ୍ରମଣରେ ଜନବସତି ଅଞ୍ଚଳଗୁଡ଼ିକ ଧ୍ବସ୍ତ ସ୍ତୁପରେ ପରିଣତ ହୋଇଛି । ସେପଟେ ଇରାନକୁ ମୁହଁତୋଡ଼ ଜବାବ ଦିଆଯାଉଥିବା କହିଛି ଆଇଡିଏଫ୍ ।

Advertisment

ଜୁନ୍ ୧୩ ତାରିଖରୁ ଉଭୟ ଦେଶ ମଧ୍ୟରେ ଲାଗି ରହିଛି ଯୁଦ୍ଧ
ଇସ୍ରାଏଲ ଆକ୍ରମଣରେ ଇରାନରେ ୬୫୭ ଜଣଙ୍କର ହେଲାଣି ମୃତ୍ୟୁ
୨୦୦୦ ରୁ ଅଧିକ ଲୋକ ଆହତ ହୋଇଛନ୍ତି
ଇସ୍ରାଏଲରେ ୨୪ ଜଣ ନାଗରିକଙ୍କର ମୃତ୍ୟୁ, ଆହତ ସଂଖ୍ୟା ୯୦୦

ଆମେରିକାର ତେହେରାନ ଉପରେ ଆକ୍ରମଣ ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଇରାନ ରାଷ୍ଟ୍ରପତି ମାସୁଦ ପେଜେଶକିଆନଙ୍କ ସହ ଫୋନ୍ ଯୋଗେ ଆଲୋଚନା କରିଛନ୍ତି । ପରିସ୍ଥିତିକୁ ତୁରନ୍ତ ହ୍ରାସ କରିବା, ଆଲୋଚନା ଏବଂ କୂଟନୀତିକୁ ଆଗକୁ ବଢ଼ାଇବା ଏବଂ ଆଞ୍ଚଳିକ ଶାନ୍ତି, ସୁରକ୍ଷା ଏବଂ ସ୍ଥିରତାର ଶୀଘ୍ର ପୁନଃସ୍ଥାପନ ଆହ୍ବାନ ଦେଇଛନ୍ତି ମୋଦୀ । ପରମାଣୁ ଘାଟି ଉପରେ ଆମେରିକା ଆକ୍ରମଣ କରିବାର କିଛି ସମୟ ମଧ୍ୟରେ ଉଭୟ ରାଷ୍ଟ୍ରନେତାଙ୍କ ମଧ୍ୟରେ ଏହି ଆଲୋଚନା ହୋଇଛି ।

ତେବେ ମଧ୍ୟପ୍ରାଚ୍ୟରେ ଦୁଇ ଦେଶ ମଧ୍ୟରେ ଆରମ୍ଭ ହୋଇଥିବା ଏହି ଲଢ଼େଇ ଧୀରେ ଧୀରେ ତୃତୀୟ ବିଶ୍ବଯୁଦ୍ଧ ମୁହାଁ ହୋଇଛି । ରବିବାର ଆକ୍ରମଣ ପରେ ଯୁଦ୍ଧକୁ ଆମେରିକା ପ୍ରତ୍ୟକ୍ଷ ଭାବେ ପ୍ରବେଶ କରିଥିବା ବେଳେ ଆଗକୁ ବିଶ୍ବର ଅନ୍ୟ ଦୁଇ ମହାଶକ୍ତି ଋଷ୍ ଓ ଚୀନ କଣ ପଦକ୍ଷେପ ନେଉଛନ୍ତି ତାହା ଉପରେ ପୂରା ବିଶ୍ବବାସୀଙ୍କ ନଜର ରହିଛି ।