ସାମ୍ନାକୁ ଆସିଲା ଆଇପିଏଲ ମେଗା ଅକ୍ସନର ଖେଳାଳି ଲିଷ୍ଟ: ଅକ୍ସନରେ ସାମିଲ ହେବେ ୧୩ ବର୍ଷିୟ ବାଳକ

କନକ ବ୍ୟୁରୋ: ଆଇପିଏଲ ୨୦୨୫ ମେଗା ଅକ୍ସନ ନଭେମ୍ବର ୨୪ ଓ ୨୫ରେ ସାଉଦି ଆରବର ଜେଦ୍ଧାରେ ହେବ । ଏହି ନିଲାମୀରେ ୫୭୪ ଖେଳାଳିଙ୍କର ସର୍ଟଲିଷ୍ଟ କରାଯାଇଛି । ସେହିପରି ଅକ୍ସନ ପାଇଁ ୧୫୭୪ ଖେଳାଳି ରେଜିଷ୍ଟର କରିଛନ୍ତି । ହେଲେ ଶେଷ ପର୍ଯ୍ୟାୟରେ ହଜାର ହଜାର ଖେଳାଳିଙ୍କୁ ବାହାର କରିଦିଆଯାଇଛି । 

ନିଲାମ ପାଇଁ ସର୍ଟ ଲିଷ୍ଟ ହୋଇଥିବା ୫୭୪ ଖେଳାଳିଙ୍କ ମଧ୍ୟରୁ ୩୬୬ ଭାରତୀୟ ଓ ୨୦୮ ବିଦେଶୀ ଖେଳାଳି । ଯେଉଁଥିରେ ଆସୋସିଏଟ ଦେଶର ୩ ଖେଳାଳି ସାମିଲ ଅଛନ୍ତି । ଆଇପିଏଲ ୨୦୨୫ ପାଇଁ ସମସ୍ତ ୧୦ ଦଳ ପାଖରେ ୨୦୪ ଖେଳାଳି ହିଁ ବିକ୍ରି ହୋଇପାରିବେ । ଅର୍ଥାତ ସର୍ଟଲିଷ୍ଟ ହୋଇଥିବା ୫୭୪ ଖେଳାଳିଙ୍କ ମଧ୍ୟରେ ୨୦୪ ଖେଳାଳି ହିଁ ବିକ୍ରି ହୋଇପାରିବେ । ସେହିପରି ୧୦ ଟିମଙ୍କ ପର୍ସରେ ମୋଟ ୬୪୧ କୋଟି ଟଙ୍କା ରହିଛି । 

ଦେଖିବାକୁ ଗଲେ ୫୭୪ ଖେଳାଳିଙ୍କ ଲିଷ୍ଟରେ ୮୧ ଖେଳାଳି ଏମିତି ଅଛନ୍ତି ଯାହାର ବେସ ପ୍ରାଇସ ୨ କୋଟି ଟଙ୍କା । ଯେମିତି କି ୨୭ ଖେଳାଳିଙ୍କ ବେସ ପ୍ରାଇସ ୧.୫ କୋଟି ଟଙ୍କା ରଖାଯାଇଛି । ଏହା ବ୍ୟତୀତ ୧.୨୫ କୋଟି, ୧ କୋଟି, ୭୫ ଲକ୍ଷ, ୫୦ ଲକ୍ଷ, ୪୦ ଲକ୍ଷ, ୩୦ ଲକ୍ଷ ଭଳି ବେସ ପ୍ରାଇସ ଖେଳାଳି ବି ଲିଷ୍ଟରେ ସାମିଲ ଅଛନ୍ତି । 

ଏଥର ନିଲାମରେ ରିଷଭ ପନ୍ତ, କେଏଲ ରାହୁଲ, ମହମ୍ମଦ ସାମୀ, ଶ୍ରେୟାସ ଆୟର, ରବି ଚନ୍ଦ୍ରନ ଅଶ୍ୱିନୀ, ୟୁଜବେନ୍ଦ୍ର ଚହଲଙ୍କ ଭଳି ବଡ ଖେଳାଳି ସାମିଲ ଅଛନ୍ତି । ଏହି ସମସ୍ତ ଖେଳାଳି ନିଜକୁ ୨ କୋଟି ଟଙ୍କାର ବେସ ପ୍ରାଇସ ରଖିଛନ୍ତି । ସେହିପରି ବିଦେଶୀ ଖେଳାଳିଙ୍କ ଲିଷ୍ଟରେ ଗ୍ଲେନ ମ୍ୟାକ୍ସୱେଲ, ମିଚେଲ ଷ୍ଟାର୍କ, ଜୋସ ବଟଲର, ଡେଭିଡ ୱାର୍ଣ୍ଣର, ଜେମ୍ସ ଆଣ୍ଡରସନ୍, ଟ୍ରେଣ୍ଟ ବୋଲ୍ଟ ଓ ଫାପ ଡୁପ୍ଲେସିସଙ୍କ ଭଳି ଷ୍ଟାର ସାମିଲ ଅଛନ୍ତି । 

ଆଇପିଏଲ ୨୦୨୫ର ମେଗା ଅକ୍ସନ ପାଇଁ ଜାରି ଫାଇନାଲ ଲିଷ୍ଟରେ ବିହାରର ବୈଭବ ସୂର୍ଯ୍ୟବଂଶୀଙ୍କୁ ଜାଗା ମିଳିଛି । ବୈଭବ ଅକ୍ସନ ଲିଷ୍ଟରେ ସାମିଲ ସବୁଠାରୁ ଯୁବ ଖେଳାଳି । ତାଙ୍କ ବେସ ପ୍ରାଇସ ୩୦ ଲକ୍ଷ ଟଙ୍କା । ସୂଚନା ଅନୁସାରେ ବୈଭବଙ୍କ ଜନ୍ମ ୨୭ ମାର୍ଚ୍ଚ ୨୦୧୧ରେ ହୋଇଥିଲା ଯାହାଙ୍କ ବୟସ ବର୍ତ୍ତମାନ ୧୩ ବର୍ଷ ୨୩୪ ଦିନ । ବୈଭବ ବିହର ପାଇଁ ଘରୋଇ କ୍ରିକେଟ ଖେଳନ୍ତି ।