କାମ କରୁନି କୋଟିକୋଟି ଟଙ୍କାର ଡପଲର୍‌ ରାଡାର, ବିପର୍ଯ୍ୟୟ ମୁକାବିଲା ପାଇଁ ଆନ୍ତରିକତା ଏମିତି!

କନକ ବ୍ୟୁରୋ : ପ୍ରାକୃତିକ ବିପର୍ଯ୍ୟୟ ପ୍ରବଣ ଓଡ଼ିଶା । ପ୍ରତିବର୍ଷ ବାତ୍ୟା, ବନ୍ୟା, ବଜ୍ରପାତର ସାମନା କରୁଛି । ମୁକାବିଲା ପାଇଁ ଡପଲର ରାଡାର ଦ୍ୱାରା ପାଣିପାଗର ଆଗୁଆ ସୂଚନା ମିଳିପାରେ । ହେଲେ  ଦୁର୍ଭାଗ୍ୟର କଥା ପାଣିପାଗର ପୂର୍ବାନୁମାନ ପାଇଁ ଆମ ରାଜ୍ୟ ଏକମାତ୍ର ରାଡାର ଉପରେ ନିର୍ଭରଶୀଳ । ପାରାଦୀପକୁ ଛାଡ଼ିଦେଲେ ଆଉ କେଉଁଠି ଡପଲର ରାଡାର ନାହିଁ  ।  ଆଇଏମ୍‌ଡି ଏବେ କେବଳ ପାରାଦୀପ ରାଡାର ତଥ୍ୟ ଉପରେ ହିଁ ଭରସା କରି ବସିଛି । ସମ୍ବଲପୁରରେ କୋଠା ତିଆରି ଚାଲିଥିବାବେଳେ ବାଲେଶ୍ବରରେ ରାଡାର ସ୍ଥାପନ ହୋଇପାରିନି । ଫଳରେ ପାଣିପାଗ ଜନିତ ଅନେକ ଗୁରତ୍ବପୂର୍ଣ୍ଣ ତଥ୍ୟ ପାଇପାରୁନି ଆଇଏମ୍‌ଡି । ସରକାରଙ୍କ ଉଦାସୀନତା ଯୋଗୁ ଏଭଳି ଅବ୍ୟବସ୍ଥା । ଦୀର୍ଘ ୨୦ ବର୍ଷ ବିତିଯାଇଥିଲେ ବି ପ୍ରକଳ୍ପ ଅଧପନ୍ତରିଆ । 

ଭାତ ହାଣ୍ଡିରୁ ଗୋଟିଏ ଚିପି ଅବସ୍ଥା ଜାଣିଲା ଭଳି ଅନ୍ୟ ଜିଲ୍ଲାରେ ଥିବା ପାଣିପାଗ କାର୍ଯ୍ୟାଳୟର ଅବସ୍ଥା ଏଇଥିରୁ ହିଁ ଅନୁମାନ କରାଯାଇପାରେ । ଗତ ୮ ମାସ ହେଲାଣି ଗୋପାଳପୁର ରାଡାର ଅଚଳ । ଭୁବନେଶ୍ୱରରେ ରାଡାର ପ୍ରତିଷ୍ଠା ପାଇଁ ସ୍ଥାନ ଚିହ୍ନଟ ପରେ ବି ଆଗେଇ ପାରୁନି କାମ । ସେପଟେ ମନ୍ତ୍ରୀ କହିଛନ୍ତି ଖୁବଶୀଘ୍ର ଭୁବନେଶ୍ବରରେ ପ୍ରତିଷ୍ଠା ହେବ ଡପଲର ରାଡାର ସିଷ୍ଟମ । ବାଲେଶ୍ଵର ଓ ସମ୍ବଲପୁର ରାଡାର ପ୍ରତିଷ୍ଠା ପାଇଁ ଭିତ୍ତିଭୂମି କାର୍ଯ୍ୟ ସରିଛି । ରାଡାର ପ୍ରସଙ୍ଗକୁ ନେଇ ରାଜ୍ୟସଭାରେ ‘ଗଭର୍ଣ୍ଣମେଣ୍ଟ ଆସୁରାନ୍ସ' କମିଟି ମଧ୍ୟ କ୍ଷୋଭ ପ୍ରକାଶ କରିଛି ।