କୋରାପୁଟର ଅସୁସ୍ଥ ସ୍ୱାସ୍ଥ୍ୟସେବା ! କାମରେ ଲାଗୁନି ବାଇକ୍ ଆମ୍ୱୁଲାନ୍ସ, ଅଟୋରେ ଆସୁଛନ୍ତି ପ୍ରସୂତୀ

କନକ ବ୍ୟୁରୋ : ସ୍ୱାସ୍ଥ୍ୟସେବାକୁ ନେଇ ସବୁବେଳେ ଚର୍ଚ୍ଚାରେ କୋରାପୁଟ ଜିଲ୍ଲା । କେତେବେଳେ ରାସ୍ତାକଡ଼ରେ ପ୍ରସବ ତ ଆଉ କେତେବେଳେ ଖଟିଆରେ ବୁହା ହୁଅନ୍ତି ରୋଗୀ । ସେହି ଜିଲ୍ଲାରେ ଖତ ଖାଉଛି ବାଇକ ଆମ୍ବୁଲାନ୍ସ । କେଉଁଠି ମେଡ଼ିକାଲ କଡ଼ରେ ପଡ଼ିରହିଛି ତ କେଉଁଠି ଅଳିଆ ଗଦାରେ । ନାମକୁ ମାତ୍ର ଯୋଜନା କରାଯାଇଛି । କିନ୍ତୁ ଆଜି ଯାଏଁ ଆମ୍ବୁଲାନ୍ସ ସ୍ୱାସ୍ଥ୍ୟସେବାରେ ଲାଗି ପାରିନି । କୋରାପୁଟ ଜିଲ୍ଲାରୁ ଆସିଛି ସ୍ୱାସ୍ଥ୍ୟସେବାର ବିକଳ ଚିତ୍ର ।

ଜିଲ୍ଲାର ସ୍ୱାସ୍ଥ୍ୟସେବାରେ ସୁଧାର ଆସିବ । ଉପାନ୍ତ ଅଚଂଳରେ ଉତ୍ତମ ସେବା ମିଳିବ । ଏଥିପାଇଁ ୨୦୨୦ରେ ସ୍ୱାସ୍ଥ୍ୟ ବିଭାଗ ପକ୍ଷରୁ ୮ଟି ବାଇକ୍‌ ଆମ୍ବୁଲାନ୍ସ ଆସିଲା । ଦୁର୍ଗମ ଅଞ୍ଚଳରୁ ରୋଗୀଙ୍କୁ ଡାକ୍ତରଖାନା ଆଣିବାକୁ ପ୍ରୟାସ ହୋଇଥିଲା । କିନ୍ତୁ ସେମିତି କିଛି ହେଲା ନାହିଁ, ଆଜି ପର୍ଯ୍ୟନ୍ତ ସେବା ଯୋଗାଇବା ତ ଦୂରର କଥା, ବାଇକ ଆମ୍ବୁଲାନ୍ସର ରକ୍ଷଣାବେକ୍ଷଣା ହୋଇପାରୁନି । ଖତ ହୋଇଗଲାଣି ଆମ୍ବୁଲାନ୍ସ । ପଟାଙ୍ଗି ବ୍ଲକ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଓ ବିସିଙ୍ଗପୁର ସ୍ୱାସ୍ଥ୍ୟକେନ୍ଦ୍ରର ଦୃଶ୍ୟ ବାଇକ୍ ଆମ୍ବୁଲାନ୍ସର ସତ ବଖାଣୁଛି ।

ବାଇକ ଆମ୍ବୁଲାନ୍ସ ସ୍ୱାସ୍ଥ୍ୟ ସେବାରେ ମାଇଲ ଖୁଣ୍ଟ ସାଜିବ, ସେଥିପାଇଁ ଲକ୍ଷାଧିକ ଟଙ୍କା ଖର୍ଚ୍ଚ ହୋଇଛି । ହେଲେ ଆଜି ପର୍ଯ୍ୟନ୍ତ ସ୍ୱାସ୍ଥ୍ୟ ସେବାରେ କୌଣସି ପରିବର୍ତ୍ତନ ଦେଖିବାକୁ ମିଳିଲାନି । ପୂର୍ବରୁ ଯାହା ଯେମିତି ଥିଲା ଏବେ ବି ଠିକ୍ ସେମିତି । ରୋଗୀ ଭାରରେ ବୁହା ହେଉଛନ୍ତି, ମହିଳା ଅଟୋରେ ପ୍ରସବ କରୁଛନ୍ତି । ସ୍ୱାସ୍ଥ୍ୟ ସେବାର ଏଭଳି ସ୍ଥିତି ବାବଦରେ ଜିଲ୍ଲା ସ୍ୱାସ୍ଥ୍ୟ ଅଧିକାରୀଙ୍କ ପାଖରେ କିଛି ଉତ୍ତର ନାହିଁ ।

ଯଦି ପଲିଥିନ୍ ତଳେ ରଖିବାର ଥିଲା, ତେବେ ବାଇକ୍ ଆମ୍ବୁଲାନ୍ସ କିଣା ଯାଇଥିଲା କାହିଁକି ? କାହା ସ୍ୱାର୍ଥରେ ଖର୍ଚ୍ଚ ହେଲା ଏତେ ଟଙ୍କା ? କୋରାପୁଟ ଜିଲ୍ଳାର ସ୍ୱାସ୍ଥ୍ୟ ସେବା ଚିତ୍ର କେବେ ବଦଳିବ ତାକୁ ହିଁ ଅପେକ୍ଷା ।