ଭାରତର ‘ସମୁଦ୍ରଯାନ’  ମିଶନ ;  ୬ ହଜାର ମିଟର ଗଭୀରତାରେ ସମୁଦ୍ରର ତଳଦେଶର ହେବ ଅନୁସନ୍ଧାନ

କନକ ବ୍ୟୁରୋ : ଭାରତ ଆରମ୍ଭ କରିବ ମିଶନ ‘ସମୁଦ୍ରଯାନ’ । ୬ ହଜାର ମିଟର ଗଭୀରତାରେ ସମୁଦ୍ରର ତଳଦେଶ ଅନୁସନ୍ଧାନ ପାଇଁ ତିନି ଜଣ ମଣିଷ ପଠାଇବା ଲକ୍ଷ୍ୟ ରଖାଯାଇଛି । ଭାରତ ନିଜର ପ୍ରଥମ ମାନବଯୁକ୍ତ ଗଭୀର ସମୁଦ୍ର ଅନୁସନ୍ଧାନ ଅଭିଯାନ ‘ସମୁଦ୍ରଯାନ’ ଜରିଆରେ ଇତିହାସ ରଚିବାକୁ ଯାଉଛି । ଏନେଇ ସୂଚନା ଦେଇଛନ୍ତି ଭାରତର ଗଭୀର ସମୁଦ୍ର ଅଭିଯାନର ଦାୟିତ୍ୱରେ ଥିବା ବୈଜ୍ଞାନିକ ଡ. ଏସ୍ ରମେଶ । ମତ୍ସ୍ୟ-୬୦୦୦ ବୁଡ଼ାଜାହାଜ ସମୁଦ୍ର ଭିତରକୁ ପଶିବା ପରଠାରୁ ମିସନ ଶେଷ ହେବା ଯାଏ ୧୨ ଘଣ୍ଟା ଧରି ସମୁଦ୍ରଯାନ ଅଭିଯାନ ଚାଲିବ । ଏହି ୧୨ ଘଣ୍ଟା ଭିତରେ କର୍ମଚାରୀମାନେ ସମୁଦ୍ର ତଳେ ସେମାନଙ୍କର ଅନୁସନ୍ଧାନ ଓ ଗବେଷଣା କରିବେ । ଜରୁରିକାଳୀନ ପରିସ୍ଥିତିରେ , ମତ୍ସ୍ୟ-୬୦୦୦ ଅତିରିକ୍ତ ୯୬ ଘଣ୍ଟା କ୍ରୁମାନଙ୍କୁ ବଞ୍ଚିରହିବାରେ ସାହାଯ୍ୟ କରିପାରିବ । ଏହି ସମ୍ପ୍ରସାରିତ କ୍ଷମତା ଅପ୍ରତ୍ୟାଶିତ ପରିସ୍ଥିତିରେ କର୍ମଚାରୀଙ୍କ ସୁରକ୍ଷା ସୁନିଶ୍ଚିତ କରିବ ।

ନ୍ୟାସନାଲ ଇନଷ୍ଟିଚ୍ୟୁଟ୍ ଅଫ୍ ଓସେନ୍ ଟେକ୍ନୋଲୋଜି , ସମୁଦ୍ରଯାନ ମିସନ ଡିଜାଇନ୍‌ର ନେତୃତ୍ୱ ନେଇଛି । ଏଥିରେ ଲାଇଫ୍ ସପୋର୍ଟ ସିଷ୍ଟମ , ବ୍ୟାଟେରି , ଯୋଗାଯୋଗ ଉପକରଣ , ଖାଦ୍ୟ ଯୋଗାଣ , ବର୍ଜ୍ୟବସ୍ତୁ ପରିଚାଳନା , ଅମ୍ଳଜାନ ବ୍ୟବସ୍ଥା ଏବଂ ସିଓ-୨ ସ୍କ୍ରବର ରହିଛି । ଭାରତର ଗବେଷଣା ଜାହାଜ ସାଗରନିଧିରୁ ମତ୍ସ୍ୟ-୬୦୦୦କୁ ସମୁଦ୍ର ଭିତରକୁ ଛଡ଼ାଯିବ । ଏହି ମିସନ ଜରିଆରେ ଭାରତ ଗଭୀର ସମୁଦ୍ର ଅନୁସନ୍ଧାନରେ ସକ୍ଷମ ରାଷ୍ଟ୍ରମାନଙ୍କର ଏକ ଏଲିଟ୍ ଗ୍ରୁପ୍‌ରେ ସାମିଲ ହେବାକୁ ଯାଉଛି । ୨ ଦଶମିକ ୧ ମିଟର ବ୍ୟାସ ତଥା ଗୋଲାକାର ହଲ୍ ବିଶିଷ୍ଟ ମତ୍ସ୍ୟ-୬୦୦୦ର ଡିଜାଇନ୍ ରୁଷିଆର ମୀର ସିରିଜ୍ , ଫ୍ରାନ୍ସର ନଟିଲ , ଜାପାନର ଶିଙ୍କାଇ ଏବଂ ଚୀନ୍‌ର ଜାଓଲଙ୍ଗ୍ ଭଳି ହୋଇଛି । ଭାରତ ସମୁଦ୍ରର ଗଭୀରତାକୁ ୧୨ ଘଣ୍ଟାର ଏହି ଯାତ୍ରା ଆରମ୍ଭ କରିବାକୁ ପ୍ରସ୍ତୁତ ହେଉଥିବା ବେଳେ ସମୁଦ୍ରଯାନ ମିଶନ ଗଭୀର ସମୁଦ୍ରର ବିଶାଳ ରହସ୍ୟମୟ କ୍ଷେତ୍ରର ଅନୁସନ୍ଧାନ କରିପାରିବ ।