ଷ୍ଟେସନ କିମ୍ବା ଟ୍ରେନରେ MRP ଠାରୁ ଅଧିକ ଟଙ୍କା ନେଉଥିଲେ , ଏମିତି କରନ୍ତୁ ଅଭିଯୋଗ ; ନିଆଯିବ କଡ଼ା କାର୍ଯ୍ୟାନୁଷ୍ଠାନ

କନକ ବ୍ୟୁରୋ : ଦେଶରେ ସମସ୍ତ ସାମଗ୍ରୀର ଏକ ନିର୍ଦ୍ଧାରିତ ମୂଲ୍ୟ ଥାଏ । ଯଦି କେହି ବ୍ୟକ୍ତି ସର୍ବାଧିକ ଖୁଚୁରା ମୂଲ୍ୟ (MRP) ଠାରୁ ଅଧିକ ମୂଲ୍ୟରେ କୌଣସି ସାମଗ୍ରୀ ବିକ୍ରି କରନ୍ତି ତେବେ ଏହା ଏକ ବେଆଇନ ଅପରାଧ । ରେଳ ଷ୍ଟେସନରେ ଯାତ୍ରୀମାନେ ଟ୍ରେନ୍ ଧରିବା ପାଇଁ ବ୍ୟସ୍ତ ହୋଇଥା’ନ୍ତି ଯାହାର ସୁଯୋଗ ନେଇ ସେଠାରେ ଜିନିଷ ବିକ୍ରି କରୁଥିବା ବ୍ୟକ୍ତି ଟଙ୍କା ଲୋଭରେ ଅଧିକ ପଇସା ନେଇଥା’ନ୍ତି । ରେଳ ଷ୍ଟେସନ କିମ୍ବା ଟ୍ରେନରେ ଯାତ୍ରୀମାନେ ଅଭିଯୋଗ କରନ୍ତି ଯେ ପ୍ଲାଟଫର୍ମରେ ଥିବା ଖାଦ୍ୟ ଷ୍ଟଲ୍ କିମ୍ବା ଖାଦ୍ୟ ଦୋକାନରେ MRP ଠାରୁ ଅଧିକ ମୂଲ୍ୟରେ ଜିନିଷ ବିକ୍ରି କରାଯାଉଛି । ତେବେ ଏପରି ପରିସ୍ଥିତିରେ ଅର୍ଥାତ ଟ୍ରେନ୍ କିମ୍ବା ଷ୍ଟେସନରେ MRP ଠାରୁ କେହି ଅଧିକ ମୂଲ୍ୟରେ ଜିନିଷ ଯଦି ବିକ୍ରି କରନ୍ତି ତେବେ ଆପଣ କେଉଁଠାରେ ଏବଂ କିପରି ଅଭିଯୋଗ କରିପାରିବେ ? ତେବେ ଆସନ୍ତୁ ଏ ବିଷୟରେ ଅଧିକ ଜାଣିବା ।

କେଉଁଠାରେ ଏବଂ କିପରି ଅଭିଯୋଗ କରିବେ?

ଭାରତୀୟ ରେଳବାଇ ଯାତ୍ରୀମାନଙ୍କ ସହିତ ଜଡ଼ିତ ସମସ୍ତ ସମସ୍ୟାର ସମାଧାନ ପାଇଁ ଏକ ହେଲ୍ପଲାଇନ ନମ୍ବର 139 ଜାରି କରିଛି । ଏହା ବ୍ୟତିତ ଯାତ୍ରୀମାନେ ମଧ୍ୟ 'ରେଳ ମଦଦ' ନାମକ ଏକ ଆପ୍ ଡାଉନଲୋଡ୍ କରି ସେମାନଙ୍କର ଫୋନରେ ଅଭିଯୋଗ କରିପାରିବେ । ଆମେ ପ୍ରାୟତଃ ଭାବୁ ଯେ ଅଭିଯୋଗ କରି କ'ଣ ଲାଭ, କାରଣ ସରକାରୀ କାମରେ ଅଭିଯୋଗର ପ୍ରଭାବ ବିଳମ୍ବରେ ହୋଇଥାଏ । ତେବେ ରେଳ ମଦଦ କିମ୍ବା 139 ହେଲ୍ପଲାଇନ ନମ୍ବରରେ ଏଭଳି ଆଦୌ ହୁଏନାହିଁ । ଏଠାରେ ଅଭିଯୋଗ କରିବା ପରେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଏ ଏବଂ ସମାଧାନ ମଧ୍ୟ କରାଯାଏ । ଆପଣ ଏହି ଆପ୍ କିମ୍ବା ହେଲ୍ପଲାଇନ ନମ୍ବରକୁ କଲ୍ କରି ଆପଣଙ୍କର ଅଭିଯୋଗ ଦାଖଲ କରନ୍ତୁ ଏବଂ କିଛି ମିନିଟ୍ ମଧ୍ୟରେ ଆପଣଙ୍କ ଅଭିଯୋଗ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।

ଏହି କଥାଗୁଡ଼ିକ ଉପରେ ଧ୍ୟାନ ଦିଅନ୍ତୁ :

ଯେତେବେଳେ ଆପଣ ଅଭିଯୋଗ କରିବାକୁ ଯାଉଛନ୍ତି କିଛି ଜରୁରୀ ତଥ୍ୟ ଜାଣିବା ଉଚିତ । ଯେପରିକି ଆପଣ ଯେଉଁ ଦୋକାନୀଙ୍କ ବିରୁଦ୍ଧରେ ଅଭିଯୋଗ ଦାଖଲ କରିବାକୁ ଯାଉଛନ୍ତି ତାଙ୍କ ଖାଦ୍ୟ ଷ୍ଟଲର ନାମ, ସେହି ଦୋକାନୀଙ୍କ ନାମ (ଯଦି ୟୁନିଫର୍ମରେ ଲେଖାଯାଇଥାଏ), ଷ୍ଟେସନର ନାମ, ପ୍ଲାଟଫର୍ମ ନମ୍ବର, ଖାଦ୍ୟ ଷ୍ଟଲ୍ ନମ୍ବର (ଯଦି ଲେଖାଯାଇଥାଏ) ଟିପି ନିଅନ୍ତୁ । ସମ୍ପୂର୍ଣ୍ଣ ଏବଂ ସଠିକ୍ ସୂଚନା ଦେଲେ ଉକ୍ତ ଦୋକାନୀ କିମ୍ବା ବିକ୍ରେତାଙ୍କ ଉପରେ ଉପଯୁକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଏ ।