ଶୀତଦିନେ ‘ଅଁଳା’ ଶରୀର ପାଇଁ ଅମୃତ ; ଖାଇଲେ ରୋଗ ହେବ ଦୂର,ବଢ଼ିବ ଚେହେରାର ଚମକ

କନକ ବ୍ୟୁରୋ : ଶୀତର ଶିଶିର ଭିଜା ସକାଳେ ଯଦି ପ୍ରକୃତିର କୌଣସି ଅମୂଲ୍ୟ ଉପହାର ଥାଏ, ତେବେ ତାହା ହେଉଛି 'ଅଁଳା' । ଆୟୁର୍ବେଦରେ ଏହାକୁ 'ଧାତ୍ରୀ ଫଳ' ବୋଲି କୁହାଯାଏ, ଯାହାର ଅର୍ଥ ହେଉଛି ମା’ ପରି ରକ୍ଷା କରୁଥିବା ଫଳ । ଏହି ଛୋଟ ଶାଗୁଆ ରଙ୍ଗର ଫଳଟି ଗୁଣର ଭଣ୍ଡାର ଏବଂ ଶୀତଦିନେ ଯେତେବେଳେ ଆମର ରୋଗ ପ୍ରତିରୋଧକ ଶକ୍ତି କମିଯାଏ, ସେତେବେଳେ ଅଁଳା ଏକ ‘ସଞ୍ଜୀବନୀ’ ଭଳି କାମ କରିଥାଏ । ମାତ୍ର ଏହାର ସୁଫଳ ପାଇବା ପାଇଁ ଏହାକୁ ସଠିକ୍ ପରିମାଣରେ ଏବଂ ସଠିକ୍ ପ୍ରକ୍ରିୟାରେ ଖାଇବା ନିହାତି ଜରୁରୀ ।

ଅଁଳାର ଚମତ୍କାରୀ ଉପକାରିତା ବିଷୟରେ କହିବାକୁ ଗଲେ, ଏଥିରେ ପ୍ରଚୁର ପରିମାଣରେ ଭିଟାମିନ୍-ସି ଥାଏ, ଯାହା ଶରୀରକୁ ସଂକ୍ରମଣରୁ ରକ୍ଷା କରିବା ସହ ସାଧାରଣ ଥଣ୍ଡା, କାଶ ଏବଂ ଜ୍ୱରକୁ ଦୂରେଇ ରଖେ । କେବଳ ସେତିକି ନୁହେଁ, ଯଦି ଆପଣ କେଶ ଝଡ଼ିବା ସମସ୍ୟାରେ ଚିନ୍ତିତ କିମ୍ବା ତ୍ୱଚାରେ ପ୍ରାକୃତିକ ଚମକ ଚାହୁଛନ୍ତି, ତେବେ ଅଁଳା ସେବନ ନିଶ୍ଚିତ କରନ୍ତୁ । ଏଥିରେ ଥିବା ଆଣ୍ଟି-ଅକ୍ସିଡାଣ୍ଟ ବାର୍ଦ୍ଧକ୍ୟର ଛାପକୁ ରୋକିଥାଏ ଏବଂ କେଶକୁ ମୂଳରୁ ଶକ୍ତ କରିଥାଏ । ପେଟ ଜନିତ ସମସ୍ୟା ଯଥା ଗ୍ୟାସ୍, ଏସିଡିଟି ଏବଂ କୋଷ୍ଠକାଠିନ୍ୟ ପାଇଁ ଏହା ରାମବାଣ ସଦୃଶ ଏବଂ ଶରୀରରୁ ବିଷାକ୍ତ ପଦାର୍ଥ ବାହାର କରିବାରେ ବେଶ୍ ସହାୟକ ହୋଇଥାଏ । ଏହା ସହିତ ଏଥିରେ ଥିବା ଭିଟାମିନ୍-ଏ ଆଖିର ଦୃଷ୍ଟିଶକ୍ତି ବଢ଼ାଇବାରେ ସାହାଯ୍ୟ କରେ ।

ଅଧିକ ପଢ଼ନ୍ତୁ---ସୂର୍ଯ୍ୟମୁଖୀ ମଞ୍ଜିର ଚମତ୍କାର: କାଚ ଭଳି ଚମକିବ ଆପଣଙ୍କ ଚେହେରା !

ମନେ ରଖନ୍ତୁ ଅଁଳା ଖାଇବା ଯେତିକି ଭଲ, ଏହାର ଅତ୍ୟଧିକ ସେବନ ମଧ୍ୟ ସେତିକି କ୍ଷତିକାରକ ମଧ୍ୟ ହୋଇପାରେ । ସାଧାରଣତଃ ଜଣେ ସୁସ୍ଥ ବ୍ୟକ୍ତି ଦିନକୁ ମାତ୍ର ଗୋଟିଏ ରୁ ଦୁଇଟି ମଧ୍ୟମ ଆକାରର କଞ୍ଚା ଅଁଳା ଖାଇବା ଉଚିତ୍ । ଯଦି ଆପଣ ଅଅଁଳା ରସ ପିଉଛନ୍ତି, ତେବେ ୧୦ ରୁ ୨୦ ମିଲିଲିଟର ରସକୁ ଏକ ଗ୍ଲାସ୍ ପାଣିରେ ମିଶାଇ ପିଇବା ସବୁଠାରୁ ନିରାପଦ । ବିଶେଷ କରି ସକାଳୁ ଖାଲି ପେଟରେ ଅଅଁଳା ରସ କିମ୍ବା କଞ୍ଚା ଅଁଳା ସେବନ କରିବା ସବୁଠାରୁ ଅଧିକ ଲାଭଦାୟକ ହୋଇଥାଏ । ଯଦି କାହାକୁ କଞ୍ଚା ଅଁଳା ଖାଇବା ପସନ୍ଦ ନୁହେଁ, ତେବେ ସେମାନେ ଏହାକୁ ମୁରବା, ଚଟଣି କିମ୍ବା ଶୁଖିଲା ପାଉଡର ଭାବେ ମଧ୍ୟ ବ୍ୟବହାର କରିପାରିବେ ।

ତେବେ ଜାଣି ରଖନ୍ତୁ ଅଁଳାର ପ୍ରକୃତି ଶୀତଳ, ତେଣୁ ଯେଉଁମାନଙ୍କର ଅଧିକ ଥଣ୍ଡା ପ୍ରକୃତି କିମ୍ବା କିଡନୀ ସମସ୍ୟା ରହିଛି, ସେମାନେ ଡାକ୍ତରଙ୍କ ପରାମର୍ଶ ନେଇ ଏହାକୁ ସେବନ କରିବା ଉଚିତ୍ । ଏହାବ୍ୟତୀତ ଅଁଳା ଖାଇବା ପରେ ଅଧିକ ପରିମାଣରେ ପାଣି ପିଇବା ଶରୀର ପାଇଁ ହିତକର । ଶୀତଦିନେ ନିଜ ଖାଦ୍ୟ ତାଲିକାରେ ଏହି ସୁପରଫୁଡକୁ ସାମିଲ କରି ଆପଣ ନିଜକୁ ସୁସ୍ଥ ଓ ସତେଜ ରଖିପାରିବେ । ଏହା କେବଳ ଏକ ଫଳ ନୁହେଁ ବରଂ ପ୍ରକୃତିର ଏକ ବରଦାନ, ଯାହା ଶରୀରର ପ୍ରାୟ ସମସ୍ତ ଅଙ୍ଗକୁ ସୁରକ୍ଷା ପ୍ରଦାନ କରିଥାଏ ।