ସରକାରୀ ଜମିରୁ ହଟିବ ଜବରଦଖଲ । ସରକାରଙ୍କ ନିର୍ଦ୍ଦେଶ ପରେ କୋକସରାରେ ସ୍କୁଲ ଜମିରୁ ଭଙ୍ଗା ଗଲା ବେଆଇନ୍ ଘର ।

କନକ ବ୍ୟୁରୋ: ବର୍ଷ ବର୍ଷ ଧରି ସରକାରୀ ଜମିକୁ ଜବର ଦଖଲରେ ରଖିଥିଲେ । ସ୍କୁଲ ଜମିରେ ଘର କରି ରହୁଥିଲେ ପୁରା ପରିବାର । ଏବେ ସେ ଘରକୁ ଭାଙ୍ଗି ଦେଇଛି ପ୍ରଶାସନ । ସରକାରୀ ଜମିରୁ ଜବରଦଖଲ ଉଚ୍ଛେଦ ନେଇ ସରକାର ଆକ୍ସନ ମୋଡରେ ଅଛନ୍ତି । ସରକାରଙ୍କ ନିର୍ଦ୍ଦେଶ ପରେ କଳାହାଣ୍ଡି କୋକସରା ତହସିଲ ଅନ୍ତର୍ଗତ ଅଂଚଳରୁ ଜବରଦଖଲ ଉଚ୍ଛେଦ ପ୍ରକ୍ରିୟା ଆରମ୍ଭ ହୋଇଛି ।  ଜବରଦଖଲକାରୀଙ୍କ ଘରେ ବୁଲିଲା ବୁଲଡୋଜର । ସରକାରୀ ଜମିରୁ ଜବରଦଖଲ ଉଚ୍ଛେଦ ପାଇଁ ସରକାରଙ୍କ ନିର୍ଦ୍ଦେଶ ପରେ କଳାହାଣ୍ଡି କୋକସରା ତହସିଲ ପକ୍ଷରୁ ଉଚ୍ଛେଦ ପ୍ରକ୍ରିୟା ଆରମ୍ଭ ହୋଇଛି । ମହିମା ପଞ୍ଚାୟତ ଡେଙ୍ଗାଗୁଡା ହାଇସ୍କୁଲ ନିକଟରେ ବୁଲଡୋଜର ବୁଲିଛି । ସ୍କୁଲ ଜମିରେ ତିଆରି ହୋଇଥିବା ଘରକୁ ଭାଙ୍ଗି ଦିଆଯାଇଛି। ବାହାରେ ଘରର ଆସବାବପତ୍ର ବିଛାଡ଼ି ହୋଇ ପଡିରହିଛି ।

ଅଭିଯୋଗ ଅନୁସାରେ ଡେଙ୍ଗାଗୁଡ଼ା ଉଚ୍ଚ ବିଦ୍ୟାଳୟ ଜମିରେ ଘର କରି ରହୁଥିଲେ ଅଭିମନ୍ୟୁ ନାଏକଙ୍କ ପରିବାର । ଫଳରେ ବିଦ୍ୟାଳୟର ଉନ୍ନତିକରଣ କାମରେ ବାଧା ଉପୁଜିଥିଲା । ଏନେଇ କୋକସରା ତହସିଲଦାରଙ୍କ ପାଖରେ ଅଭିଯୋଗ ହୋଇଥିଲା । ସେହି ଅଭିଯୋଗ ଆଧାରରେ ତହସିଲ ପକ୍ଷରୁ ଉଚ୍ଛେଦ ପାଇଁ ଅଭିମନ୍ୟୁଙ୍କୁ ନୋଟିସ ହୋଇଥିଲା । ଘର ଖାଲି କରିବାକୁ ୧୫ ଦିନ ସମୟ ଦିଆଯାଇଥିଲା । ଜବରଦଖଲକାରୀ ନିଜ ଜିନିଷ ପତ୍ର ବାହାର କରିବା ପରେ ପ୍ରଶାସନ ବୁଲଡୋଜର ଘର ଭାଙ୍ଗି ଦେଇଛି । ଅନ୍ୟ ସରକାରୀ ଜମିରୁ ମଧ୍ୟ ଜବରଦଖଲ ଉଚ୍ଛେଦ କରାଯିବ ବୋଲି ତହସିଲଦାର କହିଛନ୍ତି । ଅଭିମନ୍ୟୁଙ୍କ ଘର ଭଙ୍ଗା ଦେଖି ଅନ୍ୟ ଜବରଦଖଲକରୀଙ୍କ ଛାତିରେ ଛନକା ପଶିଛି । ଆଗୁକୁ ସେମାନଙ୍କ ପାଳି ପଡ଼ିବ ବୋଲି ଆଶଙ୍କା କରିଛନ୍ତି ।