ବୃଦ୍ଧ ବାପା, ମା’ଙ୍କ ଯତ୍ନ ନନେଲେ ମିଳିବନି ସମ୍ପତ୍ତି ; ସୁପ୍ରିମକୋର୍ଟଙ୍କ ଗୁରୁତ୍ବପୂର୍ଣ୍ଣ ରାୟ

 କନକ ବ୍ୟୁରୋ: ଯେଉଁ ପିଲାମାନେ ବୃଦ୍ଧ ପିତାମାତାଙ୍କଠାରୁ ସମ୍ପତ୍ତି ସେମାନଙ୍କ ନାମକୁ ସ୍ଥାନାନ୍ତର କରନ୍ତି କିମ୍ବା ସେମାନଙ୍କଠାରୁ ଉପହାର ଭାବେ ଏସବୁ ଗ୍ରହଣ କରି ପରେ ସେମାନଙ୍କୁ ପରିତ୍ୟାଗ କରନ୍ତି । ସେମାନଙ୍କୁ ଏବେ ଏବିଷୟରେ ସାବଧାନ ହେବାର ସମୟ ଆସିଛି । ଏ ସମ୍ପର୍କରେ ସୁପ୍ରିମକୋର୍ଟ ଏକ ଐତିହାସିକ ରାୟ ପ୍ରଦାନ କରିଛନ୍ତି । ବର୍ତ୍ତମାନ ଯେଉଁ ସନ୍ତାନମାନେ ଏଭଳି କରିବେ ତାଙ୍କ ପ୍ରତି କଠୋର ପଦକ୍ଷେପ ଗ୍ରହଣ କରାଯିବ । ଏଭଳି ସନ୍ତାନମାନଙ୍କୁ ଉତ୍ତରାଧିକାରୀ ସୂତ୍ରରେ ମିଳିଥିବା ସମ୍ପତ୍ତିକୁ ଫେରସ୍ତ କରିବାକୁ ପଡିବ । ସର୍ବୋଚ୍ଚ ଅଦାଲତର ଏହି ରାୟ ସମ୍ପୂର୍ଣ୍ଣ ସ୍ପଷ୍ଟ କରିଛି ଯେ, ବୃଦ୍ଧ ପିତାମାତାଙ୍କର ଯତ୍ନ ନେବାକୁ ପଡିବ । ସେମାନଙ୍କୁ ଅସହାୟ ଭାବେ ଛାଡିଲେ ଦୃଢ଼ କାର୍ୟ୍ୟାନୁଷ୍ଠାନ ଗ୍ରହଣ କରାଯିବ। ସୁପ୍ରିମକୋର୍ଟଙ୍କ ଏହି ରାୟକୁ ଐତିହାସିକ ଏବଂ ଗୁରୁତ୍ୱପୂର୍ଣ୍ଣ କୁହାଯାଉଛି। 

ସୁପ୍ରିମକୋର୍ଟଙ୍କ ରାୟରେ ସ୍ପଷ୍ଟ ଭାବରେ ଉଲ୍ଲେଖ କରାଯାଇଛି ଯେ, ଯଦି ପିଲାମାନେ ସେମାନଙ୍କର ପିତାମାତାଙ୍କର ଯତ୍ନ ନେବାରେ ବିଫଳ ହୁଅନ୍ତି, ତେବେ ପିତାମାତାଙ୍କ ଦ୍ବାରା ଦିଆଯାଇଥିବା ସମ୍ପତ୍ତି ଏବଂ ଉପହାରଗୁଡ଼ିକ ବରିଷ୍ଠ ନାଗରିକ ରକ୍ଷଣାବେକ୍ଷଣ ଏବଂ କଲ୍ୟାଣ ଅଧିନିୟମ ଆଧାରରେ ବାତିଲ ହୋଇପାରିବ । ପିତାମାତା ଏବଂ ବରିଷ୍ଠ ନାଗରିକ ଅଧିନିୟମ ଅନୁଯାୟୀ ଏହା କାର୍ୟ୍ୟକାରୀ ହେବ । ସାଧାରଣତଃ ଦେଖାଯାଇଥାଏ ଯେ, ସମ୍ପତ୍ତି ଏବଂ ଉପହାର ପାଇବା ପରେ ଅନେକ ପିତାମାତା ସେମାନଙ୍କ ପିଲାମାନଙ୍କ ଦ୍ୱାରା ଅବହେଳିତ ହୋଇଥାନ୍ତି । ବୃଦ୍ଧ, ବୃଦ୍ଧାଙ୍କ ଅବସ୍ଥା ସୁଧାରିବା ପାଇଁ ପ୍ରୟାସର ଏକ ଅଂଶ ଭାବରେ ସୁପ୍ରିମକୋର୍ଟ ଏହି ରାୟ ଦେଇଛନ୍ତି । କୋର୍ଟ କହିଛନ୍ତି ଯେ, ବର୍ତ୍ତମାନ ପିତାମାତାଙ୍କ ସମ୍ପତ୍ତି ଏବଂ ପିଲାମାନଙ୍କୁ ଅନ୍ୟାନ୍ୟ ଉପହାର ଦେବା ପରେ ଏଥିରେ ଏକ ସର୍ତ୍ତ ଅନ୍ତର୍ଭୁକ୍ତ କରାଯିବ। ସର୍ତ୍ତ ଅନୁଯାୟୀ ପିଲାମାନଙ୍କୁ ପିତାମାତାଙ୍କ ଯତ୍ନ ନେବାକୁ ପଡ଼ିବ । ସେମାନଙ୍କର ଆବଶ୍ୟକତା ପୂରଣ କରିବାକୁ ପଡିବ। ଯଦି ପିଲାମାନେ ଏହି ସର୍ତ୍ତଗୁଡିକ ପାଳନ କରନ୍ତି ନାହିଁ ଏବଂ ପିତାମାତାଙ୍କୁ ଏକାକୀ ଛାଡିଦିଅନ୍ତି, ତେବେ ସମସ୍ତ ସମ୍ପତ୍ତି ଏବଂ ଅନ୍ୟାନ୍ୟ ଉପହାର ସେମାନଙ୍କଠାରୁ ଫେରାଇ ନିଆଯିବ। ସମ୍ପତ୍ତି ସ୍ଥାନାନ୍ତର ଶୂନ୍ୟ ଘୋଷିତ ହେବ ।