ମହମ୍ମଦ ସିରାଜଙ୍କୁ ଦଣ୍ଡିତ କଲା ଆଇସିସି: ଓ୍ବିକେଟ ନେଇ ବିବାଦୀୟ ଢଙ୍ଗରେ କରିଥିଲେ ସେଲିବ୍ରେସନ୍

କନକ ବ୍ୟୁରୋ: ଭାରତୀୟ ଦ୍ରୁତ ବୋଲର ମହମ୍ମଦ ସିରାଜଙ୍କୁ ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି) ଦଣ୍ଡିତ କରିଛି । ଲର୍ଡ୍ସରେ ଇଂଲଣ୍ଡ ବିପକ୍ଷ ଟେଷ୍ଟ ମ୍ୟାଚର ଚତୁର୍ଥ ଦିନରେ ବେନ୍ ଡକେଟଙ୍କୁ ଆଉଟ୍ କରିବା ପରେ ଆକ୍ରମଣାତ୍ମକ ଭାବେ ଉତ୍ସବ ପାଳନ କରିବାରୁ ତାଙ୍କ ଉପରେ ଏହି କାର୍ଯ୍ୟାନୁଷ୍ଠାନ ନିଆଯାଇଛି । 

ସିରାଜ ଆଇସିସିର ଆଚରଣ ବିଧିର ଅନୁଚ୍ଛେଦ ୨.୫ର ଉଲ୍ଲଂଘନ କରିଥିବା ଜଣାପଡିଛି, ଯାହାକି ଜଣେ ବ୍ୟାଟ୍ସମ୍ୟାନଙ୍କୁ ଆଉଟ୍ କରିବା ପରେ ଅପମାନିତ କରିବା ଭଳି ଭାଷା କିମ୍ବା କାର୍ଯ୍ୟ ସହ ଜଡିତ । ଏହି କାରଣରୁ ସିରାଜଙ୍କ ମ୍ୟାଚ୍ ଫି'ର ୧୫ ପ୍ରତିଶତ ଜରିମାନା କଟାଯାଇଛି ଏବଂ ତାଙ୍କ ଖାତାରେ ଗୋଟିଏ ଡିମେରିଟ୍ ପଏଣ୍ଟ ମଧ୍ୟ ଯୋଡ଼ା ଯାଇଛି ।

ଏହି ଘଟଣାଟି ଇଂଲଣ୍ଡର ଦ୍ୱିତୀୟ ଇନିଂସରେ ଘଟିଥିଲା ଯେତେବେଳେ ସିରାଜ ଡକେଟଙ୍କୁ ଆଉଟ୍ କରିବା ପରେ ତାଙ୍କ ନିକଟକୁ ଯାଇ ଆକ୍ରମଣାତ୍ମକ ଭଙ୍ଗିରେ ପାଟି କରିଥିଲେ । ସିରାଜ ନିଜର ଦୋଷ ସ୍ୱୀକାର କରିନେଇଥିବାରୁ ଏହି ମାମଲାରେ କୌଣସି ଆନୁଷ୍ଠାନିକ ଶୁଣାଣିର ଆବଶ୍ୟକତା ପଡ଼ିନାହିଁ । ଗତ ୨୪ ମାସ ମଧ୍ୟରେ ସିରାଜଙ୍କର ଏହା ଦ୍ୱିତୀୟ ଭୁଲ ଥିଲା, ଯାହାଫଳରେ ତାଙ୍କର ମୋଟ ଡିମେରିଟ୍ ପଏଣ୍ଟ ଦୁଇକୁ ବୃଦ୍ଧି ପାଇଛି ।