ଟ୍ରମ୍ପ ହୁକୁମ୍ ଦେଲେ: ଶେହବାଜ ଛିଡ଼ା ହେଲେ, ବିଶ୍ଵ ଦରବାରରେ ପୁଣି ପାକିସ୍ତାନର ଛବି ମଳିନ

କନକ ବ୍ୟୁରୋ: ଆମେରିକାରେ ଆୟୋଜିତ ‘ବୋର୍ଡ ଅଫ୍ ପିସ୍’ (ଶାନ୍ତି ବୋର୍ଡ ବୈଠକ)ରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ ସରିଫଙ୍କ ସହିତ ସାର୍ବଜନୀନ ଭାବରେ ଏକ ଅସ୍ଵାଭାବିକ୍ ପରିସ୍ଥିତି ସୃଷ୍ଟି କରିଥିଲେ । ଶେହବାଜ ସରିଫଙ୍କୁ ଡୋନାଲ୍ଡ ଟ୍ରମ୍ପ ହୁକୁମ୍ ଦେଲା ଭଳି କହିଥିଲେ ଠିଆ ହୋଇଯାଅ । ଟ୍ରମ୍ପଙ୍କ ହୁକୁମ ଶୁଣି ଶେହବାଜ ମଧ୍ୟ ମୁଣ୍ଡ ନୁଆଁଇ ଛିଡ଼ା ହୋଇଯାଇଛିଲେ । ଏହି ଘଟଣା ବିଶ୍ଵ ଦରବାରରେ ପାକିସ୍ତାନର ଛବିକୁ ପୁଣି ମଳିନ କରିଦେଇଛି । ଶାନ୍ତି ବୋର୍ଡ ବୈଠକରେ ଟ୍ରମ୍ପ ଭାରତ-ପାକିସ୍ତାନ ଯୁଦ୍ଧରେ ନିଜକୁ "ମଧ୍ୟସ୍ଥି" ବୋଲି କହି ନିଜ ପ୍ରଶଂସାରେ ଦୀର୍ଘ ସମୟ ଧରି କଥା ହୋଇଥିଲେ। ଟ୍ରମ୍ପ ଦାବି କରିଥିଲେ ଯେ ସେ ୨୦୨୫ମସିହାରେ ଭାରତ ଓ ପାକିସ୍ତାନ ମଧ୍ୟରେ ସାମରିକ ମୁକାବିଲା ବନ୍ଦ କରିବାକୁ ଦୁଇ ଦେଶକୁ ବାଧ୍ୟ କରିଥିଲେ, ଏହି ପ୍ରକ୍ରିୟାରେ ୨.୫ କୋଟି ଲୋକଙ୍କ ଜୀବନ ବଞ୍ଚାଇଥିଲେ ।

ଅଧିକ ପଢନ୍ତୁ: ଇରାନ ଉପରେ ଆକ୍ରମଣ କଲେ ପରିଣାମ ଭାୟାବହ ହେବ, ଆମେରିକାକୁ କଡ଼ା ଚେତାବନୀ ଦେଲା ରୁଷ

ଯୁଦ୍ଧ ବନ୍ଦ ନହେଲେ ଉଭୟ ଦେଶ ଉପରେ ୨୦୦ ପ୍ରତିଶତ ଶୁଳ୍କ ଲାଗୁ କରିବାକୁ ଧମକ ଦେଇଥିବା କଥା ମଧ୍ୟ ଦାବି କରିଥିଲେ। ଟ୍ରମ୍ପ କହିଛନ୍ତି, "ମୁଁ ଉଭୟଙ୍କୁ ଫୋନ୍ କରିଥିଲି। "ମୁଁ କହିଥିଲି, ''ଯଦି ତୁମେମାନେ ଯୁଦ୍ଧ ବନ୍ଦ ନକର, ତେବେ ମୁଁ ତୁମମାନଙ୍କ ମଧ୍ୟରୁ କାହା ସହିତ ବାଣିଜ୍ୟ ଚୁକ୍ତି କରିବି ନାହିଁ ।'' ତା''ପରେ, ହଠାତ୍, ଆମେ ଏକ ଚୁକ୍ତିରେ ପହଞ୍ଚିଲୁ।
ଟ୍ରମ୍ପ ଏହା ମଧ୍ୟ କହିଥିଲେ ଯେ ଭାରତ-ପାକିସ୍ତାନ ସଂଘର୍ଷରେ ୧୧ଟି ଜେଟ୍ ଖସିଥିଲା ଏବଂ ସେଗୁଡ଼ିକ ମହଙ୍ଗା ଥିଲା, ଯେତେବେଳେ କି ପୂର୍ବରୁ ସେ ଦାବି କରିଥିଲେ ଯେ ସଂଘର୍ଷରେ ସାତଟି ଜେଟ୍ ଖସାଇ ଦିଆଯାଇଛି । ଭାରତ ଏହି ଦାବିଗୁଡ଼ିକୁ ନିରନ୍ତର ଅସ୍ୱୀକାର କରିଆସିଥିବାରୁ ତାଙ୍କର ବକ୍ତବ୍ୟ ବାରମ୍ବାର ବିବାଦର କେନ୍ଦ୍ର ହୋଇଛି। ଭାରତ କହିଛି ଯେ ସାମରିକ ସଂଘର୍ଷ ସମୟରେ କୌଣସି ତୃତୀୟ ପକ୍ଷ ମଧ୍ୟସ୍ଥତା ହୋଇନଥିଲା ଏବଂ ଦୁଇ ସେନାର ସାମରିକ ଅଭିଯାନ ମହାନିର୍ଦ୍ଦେଶକ (ଡିଜିଏମ୍ଓ) ମଧ୍ୟରେ ସିଧାସଳଖ ଆଲୋଚନା ପରେ ହିଁ ଯୁଦ୍ଧବିରତି ହୋଇଥିଲା ।