‘ରାହୁଲ ଗାନ୍ଧୀ ମୋତେ ଭେଟନ୍ତି ନାହିଁ, ସେ ମୋତେ ପସନ୍ଦ କରନ୍ତିନି’…ଚର୍ଚ୍ଚାରେ ବରିଷ୍ଠ କଂଗ୍ରେସ ନେତା ମଣିଶଙ୍କର ଆୟାରଙ୍କ ଇଣ୍ଟରଭ୍ୟୁ

କନକ ବ୍ୟୁରୋ: ଚର୍ଚ୍ଚାରେ ବରିଷ୍ଠ କଂଗ୍ରେସ ନେତା ତଥା ପୂର୍ବତନ କେନ୍ଦ୍ରମନ୍ତ୍ରୀ ମଣିଶଙ୍କର ଆୟାର । ଏକ ୟୁଟ୍ୟୁବ୍ ଚ୍ୟାନେଲକୁ ଦେଇଥିବା ସାକ୍ଷାତକାରରେ ସେ ପୂର୍ବ ପ୍ରଧାନମନ୍ତ୍ରୀ ରାଜୀବ ଗାନ୍ଧୀଙ୍କ ଶିକ୍ଷାଗତ ଯୋଗ୍ୟତା ନେଇ ମନ୍ତବ୍ୟ ରଖିଛନ୍ତି । ଯାହା ଏବେ ଚର୍ଚ୍ଚା ସୃଷ୍ଟି କରିଛି । ଏଥିସହ ଏହି ଇଣ୍ଟରଭ୍ୟୁରେ ସେ ଗାନ୍ଧୀ ପରିବାର ସହ ତାଙ୍କର ସମ୍ପର୍କକୁ ନେଇ ମଧ୍ୟ ବହୁତ କିଛି ଖୁଲାସା କରିଛନ୍ତି ।

ଏକ YouTube ପୋର୍ଟାଲକୁ ଦିଆଯାଇଥିବା ସାକ୍ଷାତକାରରେ, ଯେତେବେଳେ ମଣିଶଙ୍କରଙ୍କୁ ଗାନ୍ଧୀ ପରିବାର ସହିତ ତାଙ୍କ ସମ୍ପର୍କ ବିଷୟରେ ପଚରାଗଲା, ସେ କହିଥଲେ, 'ବନ୍ଧୁତା ଜାରି ରହିଛି। ସେମାନେ ମୋତେ ଶତ୍ରୁ ଭାବରେ ଦେଖନ୍ତି ନାହିଁ, କିନ୍ତୁ ରାହୁଲ ଗାନ୍ଧୀ ଭାବନ୍ତି ଯେ ମୁଁ ବହୁତ ବୃଦ୍ଧ । ହେଲେ ସେ ଏହା ଉପରେ ଆପତ୍ତି ପ୍ରକାଶ କରନ୍ତି ବୋଲି ସେ ଏହି ଇଣ୍ଟରଭ୍ୟୁରେ ଖୁଲାସା କରିଛନ୍ତି । ଏହାବାଦ୍, ରାହୁଲ ଗାନ୍ଧୀ କାହିଁକି ତାଙ୍କଠାରୁ ପରାମର୍ଶ ନେବାକୁ ଚାହୁଁନାହାଁନ୍ତି, ସେନେଇ ମଧ୍ୟ ପ୍ରଶ୍ନ କରିଛନ୍ତି ମଣିଶଙ୍କର ଆୟାର ।

'ମୁଁ ୨୦ ବର୍ଷ ଧରି ପ୍ରସ୍ତୁତ ଅଛି'

ମଣିଶଙ୍କର ଆୟାରଙ୍କୁ, ଯେତେବେଳେ ପଚରାଗଲା ଯେ, ସେ ରାହୁଲ ଗାନ୍ଧୀଙ୍କ ମାର୍ଗଦର୍ଶନରେ ସାହାଯ୍ୟ କରିବାକୁ ଏବଂ ଦଳକୁ ପୁନର୍ଜୀବିତ କରିବାକୁ ପ୍ରସ୍ତୁତ କି? ଏହି ସମୟରେ ସେ କହିଥିଲେ, ମୁଁ ରାହୁଲଙ୍କୁ ୨୦ ବର୍ଷ ହେଲା ମାର୍ଗଦର୍ଶନ କରିବାକୁ ପ୍ରସ୍ତୁତ, କିନ୍ତୁ ସେ ତାହା ଚାହାଁନ୍ତି ନାହିଁ। ସେମାନେ ମୋତେ ନାପସନ୍ଦ କରନ୍ତି ଏବଂ ମୁଁ କିଏ ଯେ ସେମାନଙ୍କ ଉପରେ ମୋର ମତାମତ ଲଦିବି? 
ଆୟର ଆହୁରି ମଧ୍ୟ କହିଛନ୍ତି ଯେ, ସେ ଆଶା କରୁଛନ୍ତି ଯେ କିଛି ଲୋକ ତାଙ୍କ ବିଷୟରେ ଅଭିଯୋଗ କରିବା ପାଇଁ ରାହୁଲ ଗାନ୍ଧୀଙ୍କ ପାଖକୁ ଯିବେ ଏବଂ ଏହା ତାଙ୍କୁ ତାଙ୍କ ମନ୍ତବ୍ୟ ଉପରେ ଦୃଷ୍ଟି ଦେବାକୁ ବାଧ୍ୟ କରିବ।

'ରାହୁଲ ଗାନ୍ଧୀ ମୋତେ ଭେଟି ନାହାଁନ୍ତି'

ଏହା ବ୍ୟତୀତ, ଯେତେବେଳେ ତାଙ୍କୁ ପଚରାଗଲା ଯେ ସେ ମତଭେଦ ସମାଧାନ ପାଇଁ ବ୍ୟକ୍ତିଗତ ଭାବରେ ରାହୁଲ ଗାନ୍ଧୀଙ୍କୁ କାହିଁକି ଭେଟୁନାହାଁନ୍ତି, ସେ କହିଥିଲେ, ଯଦି ସେ ମୋତେ ଭେଟୁନାହାଁନ୍ତି ତେବେ ମୁଁ ତାଙ୍କୁ କିପରି ଭେଟିବି? ୨୦୦୪ ମସିହାର ଏକ ଘଟଣା ବର୍ଣ୍ଣନା କରି ସେ କହିଥିଲେ, ଥରେ ମୋ ସ୍ତ୍ରୀ ସୁନିତା ରାହୁଲଙ୍କୁ ମୋ କଥା ନ ଶୁଣିବାକୁ କହିଥିଲେ। ତେଣୁ ରାହୁଲ ଉତ୍ତର ଦେଲେ, ମୁଁ ସବୁବେଳେ ତାଙ୍କ କଥା ଶୁଣିବି। କାରଣ ସେ ମୋ ବାପାଙ୍କର ବନ୍ଧୁ ଏବଂ ମୋ ବାପା ସବୁବେଳେ ତାଙ୍କ କଥା ଶୁଣୁଥିଲେ। କିନ୍ତୁ ଏବେ ସେ ମୋତେ ଭେଟନ୍ତି ନାହିଁ ଏବଂ ପ୍ରିୟଙ୍କା ଗାନ୍ଧୀ ମଧ୍ୟ ମୋତେ ଭେଟନ୍ତି ନାହିଁ ବୋଲି ସେ କହିଛନ୍ତି । ଯାହାକୁ ନେଇ ଏବେ ରାଜନୀତି ସରଗରମ ହେଇଛି ।