କନକ ବ୍ୟୁରୋ: ଗାଜାରେ ଖାଦ୍ୟ ପାଇଁ ହାହାକାର । ଖାଦ୍ୟ ବଦଳରେ ଗାଜା ଲୋକଙ୍କୁ ମିଳୁଛି ମୃତ୍ୟୁ । ଇସ୍ରାଏଲ ସେନାର ଏପରି ଆକ୍ରମଣକୁ ଅନ୍ତର୍ଜାତୀୟ ସ୍ତରରେ ଘୋର ନିନ୍ଦା କରାଯାଇଛି । ତେବେ ଦୀର୍ଘ ଦିନରୁ ଲାଗି ରହିଥିବା ଯୁଦ୍ଧ କାରଣରୁ ଗାଜାରେ ଦେଖାଦେଇଥିବା ଭୟାବହ ମାନବୀୟ ସଙ୍କଟ ଏବଂ ଅନାହାର ପରିସ୍ଥିତିକୁ ନେଇ ଅନ୍ତର୍ଜାତୀୟ ସ୍ତରରେ ତୀବ୍ର ସମାଲୋଚନାର ଶିକାର ହୋଇଛି ଇସ୍ରାଏଲ । ପରେ ଇସ୍ରାଏଲ୍ ନରମ ମନୋଭାବ ପୋଷଣ କରିଛି । ବଢୁଥିବା ଚାପ ଆଗରେ ମୁଣ୍ଡ ନୁଆଁଇ ଇସ୍ରାଏଲ୍ ବର୍ତ୍ତମାନ ଆକାଶ ମାର୍ଗରୁ ଗାଜାରେ  ଖାଦ୍ୟ  ପହଞ୍ଚାଇବାକୁ ରାଜି ହୋଇଛି ।  ଏହି ନିଷ୍ପତ୍ତି ପରେ ବିଭିନ୍ନ ଦେଶ ପକ୍ଷରୁ ସହାୟତା  ଆରମ୍ଭ ହୋଇଯାଇଛି ।

Advertisment

ଗତ କିଛି ମାସ ଧରି ଇସ୍ରାଏଲର କଠୋର ଅବରୋଧ ଯୋଗୁଁ ଗାଜାରେ ଖାଦ୍ୟ, ପାନୀୟ ଏବଂ ଅତ୍ୟାବଶ୍ୟକ ସାମଗ୍ରୀର ଘୋର ଅଭାବ ଦେଖାଦେଇଥିଲା ।  ଏହା ଫଳରେ ଲକ୍ଷ ଲକ୍ଷ ଲୋକ, ବିଶେଷକରି ଶିଶୁମାନେ ଭୋକରେ ଆଉଟୁପାଉଟୁ ହେଉଥିଲେ ଏବଂ ଅପପୁଷ୍ଟିର ଶିକାର ହୋଇ ଅନେକଙ୍କର ମୃତ୍ୟୁ ଘଟିଥିବା ଖବର ମଧ୍ୟ ଆସିଥିଲା । ଏହି ହୃଦୟ ବିଦାରକ ପରିସ୍ଥିତିକୁ ନେଇ ବିଶ୍ୱର ବିଭିନ୍ନ ଦେଶ ଏବଂ ମାନବିକ ଅଧିକାର ସଂଗଠନଗୁଡ଼ିକ ଇସ୍ରାଏଲ୍ ଉପରେ ଚାପ ପକାଇ ଆସୁଥିଲେ ।  ଏହି ଅନ୍ତର୍ଜାତୀୟ ଚାପର ଫଳ ସ୍ୱରୂପ, ଇସ୍ରାଏଲ ସେନା ପକ୍ଷରୁ ଘୋଷଣା କରାଯାଇଛି ଯେ ସେମାନେ ଗାଜାରେ  ଲୋକମାନଙ୍କୁ ଖାଦ୍ୟ ଯୋଇଗାବ ।  ଏହି ସହାୟତାରେ ମୁଖ୍ୟତଃ ଅଟା, ଚିନି, ଏବଂ ଟିଣରେ ପ୍ୟାକ୍ ହୋଇଥିବା ଖାଦ୍ୟ ସାମଗ୍ରୀ ରହିଛି । ସଂଯୁକ୍ତ ଆରବ ଏମିରେଟ୍ସ (UAE), ବ୍ରିଟେନ, ଜୋର୍ଡାନ, ଫ୍ରାନ୍ସ, ଇଜିପ୍ଟ ଏବଂ ଆମେରିକା ଭଳି ଦେଶ ଏହି ଏୟାରଡ୍ରପ୍ ଅଭିଯାନରେ ସାମିଲ ହୋଇଛନ୍ତି । 

ତେବେ, କିଛି ସଂଗଠନଗୁଡ଼ିକ ଏହି ଏୟାରଡ୍ରପକୁ ନେଇ ମିଶ୍ରିତ ପ୍ରତିକ୍ରିୟା ଦେଇଛନ୍ତି । ମିଳିତ ଜାତିସଂଘର ଏଜେନ୍ସି UNRWA ପରି କିଛି ସଂସ୍ଥା କହିଛନ୍ତି ଯେ ଏୟାରଡ୍ରପ୍ ଏକ ମହଙ୍ଗା, ଅଦକ୍ଷ ଏବଂ ବିପଜ୍ଜନକ ପଦ୍ଧତି । ସେମାନଙ୍କ ମତରେ, ସ୍ଥଳପଥ ଦେଇ ସହାୟତା ପହଞ୍ଚାଇବା ହିଁ ଏକମାତ୍ର ସ୍ଥାୟୀ ସମାଧାନ । ଇସ୍ରାଏଲ୍ କିଛି ନିର୍ଦ୍ଦିଷ୍ଟ ଅଞ୍ଚଳରେ ଯୁଦ୍ଧରେ "କୌଶଳଗତ ବିରାମ" ଘୋଷଣା କରିଥିଲେ ମଧ୍ୟ ସମ୍ପୂର୍ଣ୍ଣ ଯୁଦ୍ଧବିରାମ କରିନାହିଁ ।  ଇସ୍ରାଏଲ୍ ଏହା ମଧ୍ୟ କହିଛି ଯେ ଗାଜାରେ ଅନାହାର ପାଇଁ ସେମାନେ ଦାୟୀ ନୁହଁନ୍ତି, ବରଂ ହମାସ ଏବଂ ଜାତିସଂଘର ବିତରଣ ବ୍ୟବସ୍ଥାରେ ତ୍ରୁଟି ଏଥିପାଇଁ ଦାୟୀ ।  ଏହି ପରିସ୍ଥିତିରେ, ଆକାଶ ମାର୍ଗରୁ ମିଳୁଥିବା ଏହି ସହାୟତା ଗାଜାର ଭୋକିଲା ଲୋକଙ୍କ ପାଇଁ ଏକ ଅସ୍ଥାୟୀ ଆଶ୍ୱାସନା ହୋଇଥିବା ବେଳେ ଏକ ସ୍ଥାୟୀ ଶାନ୍ତି ଏବଂ ନିରବଚ୍ଛିନ୍ନ ସହାୟତା ବ୍ୟବସ୍ଥା ହିଁ ପ୍ରକୃତ ସମାଧାନ ବୋଲି ବିଶେଷଜ୍ଞମାନେ ମତ ଦେଇଛନ୍ତି ।

ଇସ୍ରାଏଲ ଏବଂ ହମାସ ମଧ୍ୟରେ ଚାଲିଥିବା ଯୁଦ୍ଧ ଗାଜା ଉପତ୍ୟକାକୁ ଏକ ଖାଦ୍ୟ ସଙ୍କଟର ଗଭୀର ଗର୍ତ୍ତକୁ ଠେଲି ଦେଇଛି, ଯାହାର ସବୁଠାରୁ ଭୟାବହ ପରିଣାମ ଭୋଗୁଛନ୍ତି ସେଠାକାର ନିରୀହ ଶିଶୁମାନେ । ଖାଦ୍ୟ, ପାନୀୟ ଏବଂ ସ୍ୱାସ୍ଥ୍ୟସେବାର ଘୋର ଅଭାବ ଯୋଗୁଁ ପ୍ରାୟ ୯ ଲକ୍ଷ ଶିଶୁ ଭୋକରେ ଆଉଟୁପାଉଟୁ ହେଉଛନ୍ତି ଏବଂ ସେମାନଙ୍କର ରୋଗ ପ୍ରତିରୋଧକ ଶକ୍ତି ଗୁରୁତର ଭାବେ ଦୁର୍ବଳ ହୋଇପଡ଼ିଛି । ଏହା ସେମାନଙ୍କୁ ବିଭିନ୍ନ ସଂକ୍ରାମକ ରୋଗର ଶିକାର ହେବା ପାଇଁ ଅଧିକ ଆଶଙ୍କା ସୃଷ୍ଟି କରିଛି ।

ମିଳିତ ଜାତିସଂଘର ଶିଶୁ ପାଣ୍ଠି  ଏବଂ ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) ପରି ଅନ୍ତର୍ଜାତୀୟ ସଂସ୍ଥାଗୁଡ଼ିକ ଗାଜାର ପରିସ୍ଥିତିକୁ ନେଇ ବାରମ୍ବାର ସତର୍କବାଣୀ ଜାରି କରିଛନ୍ତି । ସେମାନଙ୍କ ରିପୋର୍ଟ ଅନୁଯାୟୀ, ଗାଜାରେ ପାଞ୍ଚ ବର୍ଷରୁ କମ୍ ବୟସର ଅଧିକାଂଶ ଶିଶୁ ଦିନକୁ ମାତ୍ର ଥରେ ଖାଇବାକୁ ବଞ୍ଚିତ ହେଉଛନ୍ତି ।  ଯାହାକୁ "ଗୁରୁତର ଖାଦ୍ୟ ଦାରିଦ୍ର୍ୟ" ଭାବେ ବର୍ଣ୍ଣନା କରାଯାଇଛି । ଦୀର୍ଘ ସମୟ ଧରି ଅପପୁଷ୍ଟିର ଶିକାର ହେବା କାରଣରୁ ଶିଶୁମାନଙ୍କ ଶରୀରର ବିକାଶ ବାଧାପ୍ରାପ୍ତ ହେଉଛି ଏବଂ ସେମାନଙ୍କର ରୋଗ ପ୍ରତିରୋଧକ ପ୍ରଣାଳୀ  ଭୁଶୁଡ଼ି ପଡୁଛି ।