ହାତୀ-ମଣିଷ ଲଢେଇ...କେତେବେଳେ ମଣିଷ ଜୀବନ ତ ଆଉ କେତେବେଳେ ହାତୀର ଯାଉଛି ଜୀବନ

କନକ ବ୍ୟୁରୋ: ସାରା ରାଜ୍ୟରେ ହାତୀ ଆତଙ୍କ । ଲୋକଙ୍କ ଘରେ ପଶି ଭଙ୍ଗାରୁଜା କରିବା ସହ ହାତୀ ଆକ୍ରମଣରେ ଅନେକଙ୍କ ଜୀବନ ଚାଲିଯାଉଛି । ପ୍ରତିଦିନ କିଛି ନା କିଛି ଏମିତି ଅଘଟଣ ଘଟୁଛି । ଯାହାକୁ ନେଇ ବନବିଭାଗର ଚିନ୍ତା ବଢ଼ିବାରେ ଲାଗିଛି । 

କୋଇଡ଼ା, ଘୁ.ଉଦୟଗିରି, ଜି.ଉଦୟଗିରି, ତେଲକୋଇ, ପଦ୍ମପୁର, ନୟାଗଡ଼ । ହାତୀ-ମଣିଷ ଲଢ଼େଇର ଘଟଣା ଏହି ସବୁ ଅଞ୍ଚଳରୁ ବିଶେଷ ଭାବରେ ଆସୁଛି । କେଉଁଠି ହାତୀ ଆକ୍ରମଣରେ କାହା ଜୀବନ ଚାଲିଯାଇଛି ତ’ କାହାର ଘର ଭାଙ୍ଗିଯାଇଛି । ଆଉ କାହାର ଫସଲ ଉଜାଡ଼ିଦେଉଛନ୍ତି ହାତୀପଲ । ପ୍ରତିଦିନ କିଛି ନା କିଛି ଏମିତି ଅଘଟଣ ଘଟୁଛି । ଜନ୍ତୁ, ମଣିଷ ଓ ପରିବେଶ ସବୁ ପ୍ରଭାବିତ ହେଉଛି । 

ଜଙ୍ଗଲ କମୁଛି, ଜନବସତିରେ ଜଙ୍ଗଲୀ ଜନ୍ତୁଙ୍କ ଉପଦ୍ରବ ବଢ଼ୁଛି
ଜୀବନ ଯାଉଛି, ଜୀବିକା ପ୍ରଭାବିତ ହେଉଛି

କିଛି ବର୍ଷ ଭିତରେ ରାଜ୍ୟରେ ହାତୀ ଉପଦ୍ରବ ବଢ଼ିଯାଇଛି । ଜଙ୍ଗଲ ଛାଡ଼ି ଜନବସତି ମୁହାଁ ହେଉଛନ୍ତି ହାତୀପଲ । ଜଙ୍ଗଲୀ ଜନ୍ତୁ ଗାଁ ମୁହାଁ ହେବାର କାରଣ କ’ଣ ? ଏ ପ୍ରଶ୍ନର ଉତ୍ତର କେବେ କିଏ ଖୋଜିଛନ୍ତି ? ଯଦି ଖୋଜିବା, ତେବେ ଉତ୍ତରରେ ଏ ମାନବ ସମାଜ ନିଜକୁ ପାଇବ । କିଛି ମାତ୍ରାରେ ସରକାରଙ୍କୁ ମଧ୍ୟ ଦାୟୀ କରାଯାଇପାରେ । ଆଧୁନିକତାର ଚାକଚକ୍ୟପୂର୍ଣ୍ଣ ଜୀବନ ଓ ଖଣିଖାଦାନ ପାଇଁ ଜଙ୍ଗଲ କଟା ଚାଲିଛି । ସେମାନଙ୍କ ବାସ ଉଜୁଡ଼ି ଯାଉଛି, ଖାଦ୍ୟ ଓ ପାନୀୟର ଅଭାବ ରହୁଛି । ଫଳରେ ଜଙ୍ଗଲୀ ଜନ୍ତୁ ଜନବସତି ମୁହାଁ ହେଉଛନ୍ତି, ଯାହାର ପରିଣାମ ଏବେ ଆମମାନଙ୍କ ସାମ୍ନାରେ । ଯାହା ଏକ ଗମ୍ଭୀର ସମସ୍ୟା ଭାବରେ ଉଭା ହେଲାଣି । କନ୍ଧମାଳ ଜିଲ୍ଲାର ୨ ଦିନରେ ହାତୀ ଆକ୍ରମଣରେ ୨ ଜଣଙ୍କ ଜୀବନ ଯାଇଛି ।

ହାତୀ-ମଣିଷ ଦୁହିଁକୁ କିଏ ଦେବ ସୁରକ୍ଷା ? କେବଳ କ୍ଷତିପୂରଣ ଦେଇ ଦେଲେ ସମସ୍ୟାର ସମାଧାନ ହେବ ନାହିଁ । ବନ ବିଭାଗ ଓ ସରକାର ଏସବୁ ଦିଗରେ ଗୁରୁତ୍ବ ଦେବା ନିହାତି ଆବଶ୍ୟକ । ନହେଲେ ଆଗକୁ କେତେ ଜୀବନ ଯିବ ? କେତେ ଲୋକ ବାସହରା ହେବେ? ତାର କଳନା କରିବା ଅସମ୍ଭବ ।