ସୁପ୍ରିମକୋର୍ଟଙ୍କ ନିର୍ଦ୍ଦେଶ : ବୁଲା କୁକୁରଙ୍କୁ ଅଲଗା ସ୍ଥାନରେ ରଖି କରାଯାଉ ଦେଖାଶୁଣା ଓ ବନ୍ଧ୍ୟାକରଣ

କନକ ବ୍ୟୁରୋ : ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି ଯେ ଦିଲ୍ଲୀ-ଏନସିଆରର ସମସ୍ତ ବୁଲା କୁକୁରଙ୍କୁ ୮ ସପ୍ତାହ ମଧ୍ୟରେ ଡଗ୍ ସେଲଟରରେ ପଠାଯାଉ । ଦେଶର ସର୍ବୋଚ୍ଚ ଅଦାଲତ ଏକ ଗୁରୁତ୍ୱପୂର୍ଣ୍ଣ ନିର୍ଦ୍ଦେଶରେ ନଗର ନିଗମ ଏବଂ ଅନ୍ୟ ସିଭିକ୍ ଏଜେନ୍ସିମାନଙ୍କୁ ନିର୍ଦ୍ଧାରିତ ସମୟସୀମା ମଧ୍ୟରେ ପର୍ଯ୍ୟାପ୍ତ ଡଗ୍ ସେଲଟର୍ ନିର୍ମାଣ କରିବା ପାଇଁ ପରସ୍ପର ସହ ସମନ୍ୱୟ ରଖି କାର୍ଯ୍ୟ କରିବାକୁ ଏବଂ ଏହା ସୁନିଶ୍ଚିତ କରିବାକୁ କହିଛନ୍ତି ଯେ ବୁଲା କୁକୁରମାନଙ୍କୁ ସର୍ବସାଧାରଣ ସ୍ଥାନରୁ ହଟାଯିବ । ତେବେ ଦେଶର ରାଜଧାନୀରେ ବୁଲା କୁକୁରଙ୍କୁ ରଖିବା ପାଇଁ ଏପରି କୌଣସି ସ୍ଥାନ ଉପଲବ୍ଧ ନାହିଁ । ଏମସିଡି ସୂତ୍ରରୁ ଜଣାପଡିଛି ଯେ ଏହି ସମୟରେ ଦିଲ୍ଲୀରେ ବୁଲା କୁକୁରମାନଙ୍କର ବନ୍ଧ୍ୟାକରଣ କରିବା ପାଇଁ ୨୦ ଟି ଷ୍ଟେରଲାଇଜେସନ୍ ସେଣ୍ଟର ଅଛି ଏବଂ କୌଣସି ଡଗ୍ ସେଲଟର୍ ନାହିଁ । ଉପଲବ୍ଧ ଷ୍ଟେରଲାଇଜେସନ୍ ସେଣ୍ଟରଗୁଡ଼ିକର କ୍ଷମତା ୨୫୦୦ କୁକୁରଙ୍କର ବନ୍ଧ୍ୟାକରଣ କରିବାର ଅଛି ।

ଏମସିଡି ସୂତ୍ରରୁ କୁହାଯାଇଛି ଯେ ବୁଲା କୁକୁରମାନଙ୍କର ଜନସଂଖ୍ୟାକୁ ନିୟନ୍ତ୍ରଣ କରିବା ପାଇଁ ଦିଲ୍ଲୀରେ ଉପସ୍ଥିତ ଥିବା ସେମାନଙ୍କ ଜନସଂଖ୍ୟାର ଅତି କମରେ ୭୦ ପ୍ରତିଶତର ବନ୍ଧ୍ୟାକରଣ କରିବାକୁ ପଡିବ କିନ୍ତୁ ଏଥିପାଇଁ ପର୍ଯ୍ୟାପ୍ତ ଷ୍ଟେରଲାଇଜେସନ୍ ସେଣ୍ଟର ନ ଥିବାରୁ ଏହି ଲକ୍ଷ୍ୟ ପୂରଣ ହୋଇପାରିବ ନାହିଁ । ଦିଲ୍ଲୀରେ ଏହି ସମୟରେ ବୁଲା କୁକୁରମାନଙ୍କର ସଂଖ୍ୟା ପ୍ରାୟ ୬ ଲକ୍ଷ ଏବଂ ଏହି ସଂଖ୍ୟାକୁ କମ୍ କରିବା ପାଇଁ ପ୍ରତିବର୍ଷ ୪.୫ ଲକ୍ଷ କୁକୁରଙ୍କର ବନ୍ଧ୍ୟାକରଣ କରିବାକୁ ପଡ଼ିବ । ଯଦି ସରକାର ଏବଂ ଅଧିକାରୀମାନେ ଉପଲବ୍ଧ ସୁବିଧା ସହିତ ଅଦାଲତଙ୍କ ଆଦେଶ ପାଳନ କରନ୍ତି ତେବେ ପ୍ରତିବର୍ଷ କେବଳ ୧.୨୫ ଲକ୍ଷ କୁକୁରଙ୍କର ହିଁ ବନ୍ଧ୍ୟାକରଣ ହୋଇପାରିବ । ଏମସିଡିର ପଶୁ ଚିକିତ୍ସା ବିଭାଗର ପୂର୍ବ ନିର୍ଦ୍ଦେଶକ ଡାକ୍ତର ଭି.କେ. ସିଂ କହିଛନ୍ତି ଯେ ବୁଲା କୁକୁରମାନଙ୍କର ଜନସଂଖ୍ୟାରେ ଅତ୍ୟଧିକ ବୃଦ୍ଧି ହେତୁ ଆହୁରି ଅଧିକ ଆଶ୍ରୟସ୍ଥଳୀ ନିର୍ମାଣ କରିବାକୁ ପଡ଼ିବ ଏବଂ ବନ୍ଧ୍ୟାକରଣରେ ସମୟ ଲାଗିବ । ସେ ଆହୁରି ମଧ୍ୟ କହିଛନ୍ତି ଯେ ଦୁଇ ପ୍ରକାରର ଆଶ୍ରୟସ୍ଥଳୀ ତିଆରି କରିବାକୁ ହେବ । ଗୋଟିଏ ବନ୍ଧ୍ୟାକରଣ କରାଯାଇଥିବା କୁକୁରମାନଙ୍କ ପାଇଁ ଏବଂ ଅନ୍ୟଟି ବିନା ବନ୍ଧ୍ୟାକରଣ ହୋଇଥିବା କୁକୁରମାନଙ୍କ ପାଇଁ ।

ସୁପ୍ରିମକୋର୍ଟ କଡ଼ା ଭାଷାରେ କହିଛନ୍ତି ଯେ ଆମେ କୌଣସି ବି ପରିସ୍ଥିତିରେ ଶିଶୁ ଏବଂ ଛୋଟ ପିଲାମାନଙ୍କୁ ବୁଲା କୁକୁରଙ୍କ ଶିକାର ହେବାକୁ ଦେବାକୁ ଚାହୁନାହୁଁ । ଶୁଣାଣି ସମୟରେ ସଲିସିଟର ଜେନେରାଲ ତୁଷାର ମେହତା ବୁଲା କୁକୁରଙ୍କ କାମୁଡ଼ିବାର ସମସ୍ୟା ବିରୋଧରେ କିଛି କରିବାକୁ ଦାବି କରିଥିଲେ । ସେ କହିଥିଲେ, 'ଆମେ କେବଳ ଏଥିପାଇଁ ନିଜ ପିଲାମାନଙ୍କର ବଳି ଦେଇପାରିବୁ ନାହିଁ ଯେ କିଛି ଲୋକ ନିଜକୁ ବଡ଼ ପଶୁପ୍ରେମୀ ବୋଲି ଭାବୁଛନ୍ତି।' ସୁପ୍ରିମକୋର୍ଟ ଗତ ମାସରେ କୁକୁର କାମୁଡ଼ିବା କାରଣରୁ ରେବିଜ୍ ହେବାର ଘଟଣାଗୁଡ଼ିକ ବିଷୟରେ ମିଡିଆ ରିପୋର୍ଟ ଉପରେ ସ୍ୱତଃ ଆଲୋକପାତ କରିଥିଲେ,ଯେଉଁଥିରେ କୁହାଯାଇଥିଲା କି ସହର ଏବଂ ଏହାର ଆଖପାଖ ଅଞ୍ଚଳରେ ପ୍ରତିଦିନ କୁକୁର କାମୁଡ଼ିବାର ଶହ ଶହ ଘଟଣା ସାମ୍ନାକୁ ଆସୁଛି ; ଯେଉଁଥିପାଇଁ ରେବିଜ୍ ବ୍ୟାପୁଛି ଏବଂ ଶେଷରେ ପିଲା ଏବଂ ବୃଦ୍ଧ ଏହି ଭୟାନକ ରୋଗର ଶିକାର ହେଉଛନ୍ତି ।